Mike Kayihura yashyize hanze indirimbo ya kabiri iri kuri EP yise “Zuba”

Yanditswe na Uwiduhaye Theos
Kuya 1 Mata 2021 saa 10:28
Yasuwe :
0 0

Mike Kayihura uri mu bahanzi b’abahanga muri muzika nyarwanda, yashyize hanze indirimbo yise ‘Anytime’ ije ari iya kabiri kuri Extended Play ari gukoraho.

Iyi ndirimbo ije ikurikira indi aheruka gushyira hanze yise ‘Jaribu’.

Mike Kayihura yabwiye IGIHE ko guhimba ‘Anytime’ byaje ari muri Studio akaririmba akantu akumva ni keza agahita akabika.

Ati “Nari ndi mu cyumba cya studio ngira aka melodie nshyiramo amagambo mpita mpagara utunganya indirimbo arayincurangira kugira ngo ntazayibagirwa. Igitangira yari ifite inyikirizo gusa.”

Iyi ndirimbo iri kuri EP y’indirimbo umunani za Mike Kayihura yise ‘Zuba’. Avuga ko kugira ngo ayite gutya byaturutse ku muntu w’agaciro cyane kuri we gusa ntiyifuje ko ibye bimenyekana cyane mu itangazamakuru.

Ati “ Zuba ni umuntu w’agaciro kuri njye, usobanuye Isi kuri njye. Rero nahisemo kumwandikira iyi EP n’ubwo ntifuje ko ibyanjye nawe bijya mu itangazamakuru cyane.”

Yavuze ko izindi ndirimbo ziri kuri ‘Zuba’ zizagenda zijya hanze gake gake.

Mike Kayihura aririmba Afro-Soul ubuhanga bwe bwarenze u Rwanda bubonwa n’abanyamahanga ku buryo umwaka ushize yari mu bahanzi 10 bahataniraga Prix Découvertes 2020, n’ubwo atabashije kwegukana iki gihembo.

Amashuri abanza yayize muri La Colombière, aza gukomereza ayisumbuye muri Green Hills nyuma aza kujya kuba muri Kenya. Azwi nk’umuhanzi uririmba mu Cyongereza.

Yigeze kubwira IGIHE ko guhanga kwe yagiye agukura ku bahanzi batandukanye bakomeye hanze y’u Rwanda barimo Michael Jackson, Bob Marley n’abandi.

Uyu musore w’imyaka 29 yavuze ko yatangiye kuririmbira mu rusengero yibanda ku muziki wo kuramya no guhimbaza Imana, kuva ubwo ntiyigeze asubira inyuma mu muziki ndetse benshi mu bo basenganaga bagiye bamutera ingufu.

Ati “Maze kuba mukuru nakundaga Steve Wonder, sinibuka neza niba ari papa ariko hari umuntu waguze CD yari iriho indirimbo n’amagambo yazo ntangira kujya nzumva nkanaziririmba. Mfite imyaka 15 cyangwa 16 nibwo natangiye kugira indirimbo, icyo gihe nibwo nanditse indirimbo yanjye ya mbere yari iyo nahimbiye Imana. Nakuriye muri korali.”

Ni umwanditsi w’indirimbo, umuririmbyi akaba n’umucuranzi. Yavutse mu bana batatu ni uwa mbere mu bo bavukana ndetse akaba ari nawe muhungu wenyine.

Mike Kayihura ni umuhanzi w'umuhanga ndetse bibonwa na buri wese ukurikirana umuziki
Mike Kayihura ashobora kwicurangira ibicurangisho birimo na piano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .