Meddy yavuze ingaruka yatewe n’ababyeyi be batandukanye akibyiruka

Yanditswe na Munyengabe Murungi Sabin
Kuya 11 Nzeri 2017 saa 12:42
Yasuwe :
2 0

Meddy, umuhanzi nyarwanda umaze kubaka izina mu buryo bukomeye mu njyana ya R&B na Pop, yaje mu Rwanda nyuma y’imyaka irindwi atuye muri Leta ya Texas muri Amerika.

Ngabo Medard Jobert [Meddy], yavukiye i Bujumbura mu Burundi, taliki ya 7 Kanama 1989. Mu Burundi ni naho yigiye amashuri abanza muri Ecole Independante ayakomereza muri Ecole Primaire La Colombiere ari naho yize ayisumbuye mu ishami ry’Imibare n’Ubugenge.

Mu buto, Meddy yahuye n’ubuzima butamuryoheye nk’uko yabyifuzaga bitewe ahanini n’ibibazo byakuruwe no kuba ababyeyi be baratandukanye akiri muto cyane. Yabwiye Radio Rwanda ko ‘byasize icyuho mu buzima bwe’.

Meddy ni mwene Sindayihebura Alphonse na Cyabukombe Alphonsine, akaba umwana wa kabiri mu muryango w’abana bane , abahungu babiri n’abakobwa babiri.

Ababyeyi be bombi bafitanye inkuru yihariye y’urukundo ari nayo afata nk’umuzi watumye akurana inganzo yo kuririmba no kwandika indirimbo z’urukundo ari na wo mwuga akora.

Meddy avuga ko hari byinshi asanga yarabuze yakagombye kuba yarigishijwe na se Sindayihebura Alphonse. Ati “Ibyo nicuza mu by’ukuri sibyo nakoze ahubwo ni ibintu mbona nabuze mu buzima kubera icyo ikintu cyo kutagira ababyeyi bombi hamwe, cyo kutababona bari kumwe.”

Yongeraho ati “Ariko biranatangaje kuba ndirimba indirimbo z’urukundo kandi ntarigeze ndubona ku babyeyi banjye. Navuga ko nk’umusore hari ibintu byinshi nagiye niga mu buryo bugoye cyane kandi nari kubyiga mu buryo bworoheje iyo ngira ababyeyi bombi.”

Nubwo atarezwe na se ngo ntiyabayeho mu buzima bubi kuko nyina yagerageje kumubonera ibyo yakeneraga byose gusa ngo hari icyuho yakuranye.

Ati “Sinavuga ko nabayeho ubuzima bubi kuko mama yagerageje gukora ibishoboka kugira ngo tunyurwe n’ibyo turimo ariko aho biva bikagera hari icyuho umuntu aba afite muri we, ubyumva iyo urimo urakura mu mikorere no mu mitekerereze.”

“Sinakwirengagiza ko hari icyuho nari mfite mu mutima wanjye kutagira umuntu w’umugabo ukubwira iby’ubuzima, kandi bavuga ko iyo urerwa n’umugore akubwira ibintu ariko ntakwigisha byose nk’umugabo kuko aba atarabinyuzemo, hari byinshi niyigishije rero.”

Umuziki akora wiganjemo amagambo y’urukundo yawukomoye mu ruhererekane rw’inkuru y’urukundo rw’ababyeyi be yakuze abarirwa na nyina babanaga bya hafi.

Ati “Mama yakundaga kunganiriza cyane ku bintu bya papa, yambwiraga ukuntu bahuye, papa yitwa Alphonse mama akitwa Alphonsine. Bari bafite inkuru y’urukundo yihariye, bari bafite ibintu bahuriyeho, bombi bacurangaga gitari ndetse mama yakundaga kubwira papa ko amukunda cyane. Gukura numva ayo mateka byatumye nkura niyumvamo kwandika indirimbo z’urukundo.”

Meddy yavuze ko kutarerwa na se byamugizeho ingaruka

Mu myaka irindwi yari amaze mu mahanga yize kwigira no kumenya kubaho ku bwe nk’umusore wishakiraga buri kintu cyose yakeneraga mu buzima bwo muri Leta Zunze Ubumwe za Amerika atari kumwe n’ababyeyi.

Se wa Meddy yitabye Imana mu mwaka wa 2008, yaguye mu Burundi aho yari yaragiye kuba nyuma yo gutandukana na nyina wa Meddy.

Nyina wa Meddy ngo yahoraga abwira umuhungu we inkuru y'urukundo rwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza