Meddy yasobanuye imvano yo gukurwa ku rubyiniro atarangije kuririmba mu gitaramo cyo ‘Kwita Izina’

Yanditswe na Uwiduhaye Theos
Kuya 11 Nzeri 2019 saa 09:34
Yasuwe :
0 0

Meddy yasobanuriye abakunzi be ko imvano yo gukurwa ku rubyiniro mu gitaramo cyo ‘Kwita Izina’ cyabaye kuwa Gatandatu tariki 7 Nzeri 2019, ari uko igihe cyari cyamufashe.

Ngabo Médard Jobert [Meddy] mu gitaramo cyo ‘Kwita Izina’ akigera ahirengeye yakiranwe ubwuzu bwinshi n’abiganjemo igitsina gore banyurwa n’ibihangano bye byiganjemo ibiganisha ku rukundo.

Yaririmbye indirimbo ze eshatu gusa zirimo ‘Sibyo’, ‘Everything’ ye na Uncle Austin na ‘Ntawamusimbura’ aririmba agace gato k’iyo yise ‘Slowly’ arangije avangamo izindi ziganjemo iziri mu njyana ya Reggae nka ‘No Woman no cry’ , ‘Red Wine’ za Bob Marley n’izindi nke, hashize iminota itageze kuri 20 ahita avanwa ku rubyiniro mu gihe yari yagenewe kuririmba igihe kigera ku isaha.

Mu gace gato k’ikiganiro yagiranye yagiranye na Televiziyo Rwanda kizatambuka kuri uyu wa Gatanu, yavuze ko yagiye ku rubyiniro igihe yari kuririmbiraho cyarenze bigatuma igihe kingana n’isaha yagombaga kumara ku rubyiniro kigabanywa.

Ati “Ngombaga kuririmba isaha yuzuye. Abantu babyumve neza gukora igitaramo ntabwo byoroshye, kubera ko cyane cyane kuba ari igitaramo cya mbere cyari kibereye muri Kigali Arena, ibijyanye n’ibyuma ku munsi wa mbere ntabwo byari byoroshye niyo mpamvu habayeho ikibazo cy’umwanya."

"Ku ruhande rw’umushyitsi Ne-Yo wagombaga kuririmba mu gitaramo, nakoze uko nshoboye kugira ngo agire umwanya uhagije. Kuri njyewe n’abateguye igitaramo babikubwira, ni nk’aho natambye igihe cyanjye.”

Uyu muhanzi yavuye ku rubyiniro abakunzi be ubona bakinyotewe batangira kuririmba indirimbo ze zitandukanye, ‘hari n’abagize ngo aragaruka’ amaso yabo ahera mu kirere.

We n’ababyinnyi yari ari kumwe nabo ndetse n’abamufashaga kuririmba bose bahita bavaho.

IGIHE yahawe amakuru ko uyu muhanzi yakuwe ku rubyiniro kubera ko igihe cyari kigeze cyo gutunganya ibyuma Ne-Yo bahuriye muri iki gitaramo yari kuririmbiraho cyane ko ari nawe wagisoje akishimirwa ku rwego ruhambaye.

Muri iki gitaramo haririmbyemo n’abandi bahanzi bakomeye mu Rwanda nka Bruce Melodie, Riderman na Charly na Nina ariko bo nta kibazo cy’igihe bigeze bagongwa nacyo.

Kuwa 10 Nzeri Meddy yanditse ubutumwa yanditse ku rukuta rwe rwa Instagram agaragaza ko ibyamubayeho byari birenze ubushobozi bwe, kandi atabigizemo uruhare ndetse akihanganisha abafana be, ababwira ko azongera akabaririmbira muri Kigali Arena.

Meddy ni umwe mu bahanzi b'Abanyarwanda bafite abakunzi benshi
Meddy wagombaga kuririmba mu gihe cy'isaha yaririmbye iminota itageze kuri 20
Meddy yavuze ko ibyabaye mu gitaramo cyo Kwita Izina byatewe n'uko yagombaga kubisa umushyitsi, we agatamba igihe cye kugira ngo Ne-Yo abone umwanya uhagije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza