MC Tino yasezeye kuri Royal FM

Yanditswe na Nsengiyumva Emmy
Kuya 29 Mutarama 2021 saa 09:55
Yasuwe :
0 0

MC Tino, umunyamuziki akaba umushyushyarugamba mu bitaramo n’umunyamakuru ubimazemo igihe, yasezeye kuri Royal FM yari amazeho imyaka itanu yerekeza i Rusizi kuri radiyo nshya yitwa Country FM.

Ku wa Kane tariki 28 Mutarama 2021 nibwo MC Tino yashyikirije ubuyobozi bwa Royal FM ibaruwa isezera, mbere y’uko yerekeza kuri Country FM radiyo nshya igiye gufungura imiryango mu Mujyi wa Kamembe mu Karere ka Rusizi.

Mu kiganiro na IGIHE, MC Tino yavuze ko gusezera Royal FM ari icyemezo gikomeye yafashe nyuma yo kubona izindi nshingano kuri iyi radiyo y’i Rusizi.

Yagize ati “Ni ubundi buzima, umuntu aba akeneye guhindura imibereho. Ntekereza ko ari ikintu cyiza kuba ngiye kuba umwe mu bazatangiza iyi radiyo noneho nkaba naranahawe umwanya mu buyobozi bwayo.”

MC Tino uzaba ashinzwe gahunda za Country FM, yavuze ko igihe cyari kigeze ngo ahindure imibereho, ave i Kigali ajye kumva ku buzima bwo hanze y’Umujyi.

Yahishuye ko ari ibintu amaze igihe ategura ku buryo atazagorwa n’ubuzima bwo mu Karere ka Rusizi kuko ahafite inshuti nyinshi ziganjemo abo biganye muri Kaminuza.

Uyu musore wari umenyerewe nk’umunyamujyi wakuriye i Gikondo yahishuye ko agiye guhindura ubuzima no gushyira imbaraga nyinshi mu kumenyekanisha Akarere ka Rusizi.

Avuga ku byo kumenyekanisha Akarere ka Rusizi n’Umujyi wa Kamembe, MC Tino yahise asezera ku kuba umufana wa Gasogi United yari amaze iminsi yarihebeye avuga ko yimuriye amarangamutima ye kuri Espoir FC.

Kwimukira i Rusizi avuga ko bitazasubiza inyuma umuziki we kuko aribwo agiye kuwukora neza kuko ubuyobozi bw’iyi radiyo yimukiyeho aribwo buyobora Country Record, Studio igezweho muri iyi minsi.

Ati “Urumva no mu masezerano twagiranye harimo uburyo tuzakorana mu buryo bwa muzika, nibaza ko abantu bagiye kubona MC Tino mushya wahinduye ubuzima.”

Nyuma yo gusezera ku kazi yari asanzwe akora, MC Tino byitezwe ko mu ntangiriro z’ukwezi kwa Gashyantare 2021 aribwo agomba gutangira imirimo ye mishya.

MC Tino yasezeye kuri Royal Fm yari amazemo imyaka itanu, agiye i Rusizi kuri radiyo nshya
MC Tino yahishuye ko agiye i Rusizi mu buryo bwo guhindurirayo ubuzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .