Kwamamaza

MC Tino arashakishwa n’umukobwa umushinja kumwiba isakoshi

Yanditswe kuya 12-09-2016 saa 13:29' na Munyengabe Murungi Sabin


Kayisirye Martin [MC Tino] uririmba mu itsinda rya TBB arashakishwa n’umukobwa uvuga ko bahuriye mu kabari akamwiba isakoshi irimo amafaranga, telefone n’ibyangombwa byinshi.

MC Tino n’uyu mukobwa [wanze ko tumutangaza izina ku bw’umutekano we] bagiranye amakimbirane mu rukerera rwo kuri uyu wa 11 Nzeri 2016 ubwo bari mu kabari gaharawe cyane i Remera ahitwa kwa Jules.

Mu buhamya IGIHE yahawe n’uyu mukobwa yavuze ko byatangiye MC Tino ashaka kumutereta ku ngufu undi aramwangira ngo yakomeje ashaka kumubyinisha anamukoraho biza guteza imvururu nyuma y’uko umusore bakundana yahageze ashaka gutwara umukobwa Tino na we aramwitambika kugeza ubwo bashatse gukozanyaho.

Ati “Erega byari byahereye kare, twari twicaye araza ashaka kuntereta ndabyanga, yankoragaho nkumva anteye umujinya nkomeza kumwiyama. Yiyenzaga, nta n’ubwo tuziranye.”

Arongera ati “Ndamuzi bisanzwe nk’umuririmbyi wo mu Rwanda ariko nta kintu nziranyeho na we, icyo nifuza ni uko yagarura ibintu byanjye.

Trezor Kabagema, [musore ukundana n’uyu mukobwa], yabwiye IGIHE ko “MC Tino yabaye gashoza ntambara ashaka kurwana ngo yegukane umukobwa, abasore b’ibigango barinda umutekano muri aka kabari baramuterura bamujyana hanze.”

Yongeyeho ati “Njyewe umukobwa ni njye wari wamusohokanye, wabaza n’abandi wabonye bari bahari, yaje agashaka kumutereta, nabibonye kare ndihangana nanga kubyivangamo ariko ageze igihe antera umujinya mbona ari kumutesha umutwe [stress] nanjye mbyinjiramo.”

“Nabanje kumubuza ngo andekere umukobwa aranga, yashatse kurwana, mbonye bibaye birebire nibwo nahamagaye aba bouncers bamujyana hanze.”

Umukobwa avuga ko MC Tino yongeye kugaruka indi nshuro gusa bwo yaje atarwana, yicara mu mwanya wa Kabagema Trezor [umukunzi we] mu gihe bo bari bahagurutse babyina. Ngo yahamaze umwanya muto abacunga ku jisho ahita aterura isakoshi y’uyu mukobwa ataha ubwo.

Ati “Yagarutse twagiye kubyina, yaje yicara mu mwanya wa Trezor, nyuma nibwo nagarutse mpageze bambwira ko Tino asohokanye isakoshi yanjye. Nongeye ndamuhamagara[Trezor] ngo amfashe dushake Tino […] Bamukurikiye bageze hanze basanga yagiye kera.”

Yavuze ko mu byo MC Tino yatwaye harimo amafaranga, ibyangombwa binyuranye, telefone ihenze n’utundi dukoresho tw’ibanze abakobwa bifashisha.

MC Tino ngo yabanje gutereta uyu mukobwa ku ngufu

Kabagema Trezor yongeyeho ati “Icyamuteye gutwara iyi sakoshi sinkizi gusa aba bouncers batubwiye ko asanzwe yiba amasakoshi y’abakobwa, arabacunga akabashikuza ibyo bafite akiruka…”

Muri iryo joro, MC Tino yari kumwe na Bob baririmbana muri TBB. Uyu yabwiye IGIHE ko atazi neza icyateye mugenzi we gutwara isakoshi y’umukobwa gusa ngo ari gushakisha uko yabageza kuri uyu muhanzi akabasubiza ibyabo.

Ati “Abo bose bari kumwe na Tino mu kabari, bari banyoye, na we ni uko, sinzi neza impamvu […] Nkeka ko biraza gukemuka, nababwiye ko baza kunshaka nkabageza kuri Tino tugakemura ibibazo. Ndabafasha gushaka Tino.”

Kuva saa munani z’ijoro kugeza ubu Trezor n’umukunzi we baracyashakisha Tino ngo bamenye aho atuye kuko telefone ye ifunze. Ngo nibinanirana barateganya kwitabaza Polisi.

Bob uririmbana na Tino yavuze ko ataramenya impamvu mugenzi we yatahanye isakoshi y'umukobwa

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved