Kwamamaza

Mbabazi Lilian ntagitekereza umugabo nyuma yo gutandukana na Radio

Yanditswe kuya 26-09-2016 saa 12:00' na Munyengabe Murungi Sabin


Umuririmbyi Mbabazi Lilian yeruye ko atagishyize umutima ku bagabo no kongera gusubira mu rukundo nyuma y’imyaka ibiri atandukanye na Moses Nakintije Ssekibogo[Radio] uririmba mu itsinda rya Good Life.

Radio na Mbabazi Lilian bakundanye igihe kirekire ndetse kugeza ubu bafitanye abana babiri. Mu mwaka wa 2014, Mbabazi Lilian na Radio bagiranye agatotsi ndetse kuva icyo gihe kugeza ubu ntibagipfa kugaragara bari kumwe ari nacyo itangazamakuru ryahereyeho rishimangira ko batandukanye burundu.

Mbabazi Lilian ukomoka mu Rwanda yabwiye TNT ko atarongera gutekereza ku byo gushaka undi mukunzi kuko icyo ashyizeho umutima cyane muri iki gihe ari umuziki no gushakira imibereho abana amaze kubyara.

Yagize ati “Oya. Muri iki gihe ntabwo mbishaka. Niharamuka haje undi muntu nyawe, wenda byashoboka. Gusa kuri ubu ntabwo umutima wanjye ari byo werekejeho muri iki gihe. Umutima wanjye urangamiye umuziki no kwita ku bana banjye.”

Yavuze ko azirikana cyane u Rwanda nk’igihugu cyamwibarutse kandi afitemo urwibutso rukomeye, hari abavandimwe be ndetse n’umuryango we mugari niho utuye. Ati “U Rwanda ndufitemo ibintu byinshi by’urwibutso kuko ni mu rugo, ababyeyi banjye n’abo tuvukana batuye mu Rwanda ndetse narahakuriye.”

Lilian Mbabazi yabaye igihe kinini mu Rwanda mbere y’uko ajya gukomeza amashuri ye muri Kaminuza ya Makerere muri Uganda. Icyo gihe yaririmbaga mu tubari n’amahoteli nko kuri Mango pub na Hotel des Mille Collines aho yakundaga gukorera ibitaramo afatanyije na Kidum.

Muri Makerere University yize mu ishami rya Social Sciences, ari nabwo yatangiye ibyo kuririmbana n’abahanzi bo muri Uganda.

Muri 2003 yihuje na bagenzi be Jackie Chandiru na Cindy Sanyu bashing Blue 3 nyuma yo kumenyanira mu irushanwa rya Coca Cola Pop star. Iri tsinda ryaje gusenyuka hanyuma muri 2010 atangira kuririmba ku giti cye.

Azagaruka gutura mu Rwanda?

Yavuze ko kuba atagaruka mu Rwanda ahanini biterwa n’uko byinshi mu bikorwa bye biba muri Uganda ndetse umuziki akora n’abantu bamufasha bashingiye muri iki gihugu.

Ati “Ni uko muri Uganda hari amahirwe menshi atuma mpaguma nko kubonana byoroshye n’abahanzi bakomeye, abanyandikira indirimbo. Muri rusange akazi kanjye kari hano.”

Yongeraho ati “Mu rugo ni heza kurusha ibindi, ni nayo mpamvu nifuza kuzakora ibitaramo byinshi mu Rwanda mu mwaka utaha. Ni ikindi mfite mu mishinga ya vuba gusa muri iki gihe ndi kwibanda hano.”

Mbabazi yifuza kuririmbana na Masamba

Yakoranye indirimbo n’abahanzi bakomeye barimo Goodlyfe, Navio, AY, P-Unit ndetse na Kitoko wo mu Rwanda. Yakunzwe mu ndirimbo zirimo Vitamin, Kankutwale, Kawa, Yegweweka, Memories n’izindi.

Mbabazi yavuze ko yifuza kongera gukorana n’abahanzi bakomeye mu Rwanda by’umwihariko abakuze nka Masamba na Samputu Jean Paul.

Ati “Mani Martin na Kitoko nakoranye na bo ariko nifuza kongera gukorana na bo. Nifuza no gukorana n’abahanzi bakuze nka Masamba na Samputu.”

Lilian Mbabazi yitezwe mu Mujyi wa Kigali kuri uyu wa 30 Nzeri 2016 aho azakorera igitaramo cya live muri Kigali Serena Hotel.

Lilian Mbabazi yifuza gukorana indirimbo na Masamba ndetse na Samputu

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved