Mariya Yohana yanenze abahanzi nyarwanda bigana iby’ahandi bakibagirwa gukeza intwari z’u Rwanda

Yanditswe na Uwiduhaye Theos
Kuya 7 Gashyantare 2021 saa 11:45
Yasuwe :
0 0

Umuhanzikazi Mukankuranga Marie Jeanne wamamaye nka Mariya Yohana yanenze abahanzi batandukanye bakomeye mu Rwanda bakomeje kwigana iby’ahandi, bigatuma no mu gihe cyo gusingiza intwari z’u Rwanda bahitamo kuririmba ibitajyanye birimo urukundo n’ibindi.

Kuwa 1 Gashyantare 2021, ku munsi ngarukamwaka u Rwanda rwizihirizaho Umunsi w’Intwari habaye igitaramo cyatumiwemo abahanzi nyarwanda batandukanye ndetse kuri iyi nshuro wizihizwaga ku nshuro ya 27, hazirikanwa ibikorwa byaziranze ngo u Rwanda n’Abanyarwanda babeho mu mahoro n’ubwisanzure.

Mariya Yohana yabigarutseho mu butumwa yatanze mu Ruhererekane rw’Ibiganiro by’Umuco n’Amateka byiswe "Amateka Series" bitegurwa n’Urubyiruko ruba mu bihugu bya Australie na Nouvelle-Zélande. Iyi gahunda igamije gufasha urubyiruko ruba mu mahanga kumenya Umuco n’Amateka by’u Rwanda.

Uyu mubyeyi wamamaye mu ndirimbo zitandukanye zivuga ku butwari bw’Ingabo z’u Rwanda n’izindi zo kwibuka abazize Jenoside yakorewe Abatutsi, muri iki kiganiro yatanze kuri uyu wa Gatandatu tariki 6 Gashyantare 2021, yabanje kuvuga ku butwari abagore bagiye bagaragaza mu kubaka igihugu kuva kera kandi na n’uyu munsi bakaba bakiri ku isonga babifashijwemo na Leta y’Ubumwe.

Hari nk’aho yagize ati “Abagore bari ku isonga mu Rwanda nabo ntabwo bicaye. Niyo mpamvu rubyiruko rwacu ko ikintu cyitwa kwigana bigomba kubabera akabando. Iyo ugize Imana ukabona uwo wigana icyiza, nta wigana ikibi, ibyo ntimuzabikore nta n’ubwo biguhesha agaciro.”

Nibwo yahise avuga ko areba urubyiruko ibyo rukora akagira amakenga kuko abaririmba igihugu aribo bake abandi birundumuriye mu ndirimbo z’urukundo kurusha ibindi byose.

Ati “Hari igihe tureba ibyo abato mudukorera, hari ibyerekeye ubuhanzi natwe twigeze kubigerageza n’ubwo tubyina tuvamo. Dufite abana bitabiriye ubuhanzi ariko ndanabashima. Abaririmba igihugu cyacu ni bake kandi icyiza cyane ntabwo wavuga iwanyu ngo ni babi, uvuga ko ari heza icyo kibi ukagisimbuza ibyiza.”

“Mwaduhase urukundo no kwigana iby’ahandi, gusa nabyo ni byiza ariko impungenge ni uko dufite bake cyane baririmba igihugu cyacu ngo bagiheshe agaciro mbiheruka kera. Nzishima njyewe n’abandi twumva mwihase kuvuga u Rwanda n’imbaraga zanyu. Twakoze umunsi w’intwari ariko twasanze ikiganiro cyabayeho cyane cy’urubyiruko twabonye baturirimbiye urukundo aho kuririmba za ntwari zacu zari zagize umunsi mukuru.”

Yavuze ko yaba abahanzi ba kera baririmbye , abo hagati ndetse n’abandi bahanzi bagezweho ubu bose nta n’umwe wigeze ategura indirimbo zijyanye n’umunsi w’agaciro u Rwanda rwibukaho intwari zitangiye igihugu.

Ati “Ari aba kera, hagati cyangwa ab’ubu, turabinginga rubyiruko namwe turashaka kuzabavuga nk’uko tuvuga abagore nababwiye kare. Urukundo rwanyu rumaze kubibagiza u Rwanda kandi ariwo muco ari nako gaciro tuzabashimira. Hari ubwo mwumva tubivuga mukagira ngo turi abantu babi ariko utaganiriye na se ntamenya icyo sekuru yasize. Muzaze tuganire, icyizabananira kuririmbira u Rwanda muzaze tubafashe. Si abagore gusa mvuga n’abagabo barahari.”

Yavuze ko umuhanzi Jules Sentore bari bari kumwe muri iki kiganiro we agerageza ariko nawe atarageza ku rwego yakabaye abikoramo, kuko avanga amusaba ko yazabireka. Amusaba kwerekera abandi bahanzi bo mu rungano rwe uko abigenza.
Ati “ Ibyadutangaje ni urukundo rwaririmbwe ku Munsi w’Intwari. Nibura umuhanzi ntaririmbe, Rwigema, Rwagasana habuze n’uririmba Rudahigwa cyangwa se ba bana beza b’i Nyange ni ukuri muratujijisha tukayoberwa ibyo aribyo. Niba aritwe tuvuga mukumva atari byo. Tuzajya tuvuga!”

Igitaramo cyo kwizihiza Umunsi w’Intwari cyabaye ku wa 1 Gashyantare, cyari kiyobowe na Basile Uwimana wa Televiziyo y’u Rwanda ari naho cyacishijwe no kuri Youtube.

Cyagaragayemo abahanzi batandukanye babimburiwe n’Itorero ry’Igihugu, Urukerereza ryashimishije benshi mu mbyino zinogeye amaso.

Iri torero ryakurikiwe n’abandi barimo King James, Alyn Sano na Peace Jolis bose biririmbiye indirimbo ziganjemo cyane iz’urukundo mu gihe ababashije kuririmba ibijyanye n’uyu munsi ari Army Jazz Band gusa.

Reba ikiganiro Mariya Yohana n’abandi batanze muri ‘Amateka Series’

Inkuru wasoma bijyanye: https://igihe.com/imyidagaduro/article/king-james-urukerereza-na-alyn-sano-mu-bahanzi-basusurukije-abanyarwanda-ku

Mariya Yohana yanenze abahanzi b'ubu ko batakiririmba igihugu ahubwo bigiriye mu rukundo

Reba uko abahanzi bitwaye mu gitaramo cyo kwizihiza Umunsi w’Intwari, ibintu bitanyuze Mariya Yohana bitewe n’indirimbo baririmbyemo


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .