00:00:00 IGIHE NETWORK KN KINYARWANDA EN ENGLISH FR FRANCAIS

Marina yasusurukije abakunzi b’umuziki mu bitaramo bya ’My Talent Live Concert’ (Amafoto)

Yanditswe na Mukahirwa Diane
Kuya 15 Ugushyingo 2020 saa 08:31
Yasuwe :
0 0

Umuhanzikazi Ingabire Deborah uzwi nka Marina, umenyerewe mu njyana ya RNB, kuri uyu wa Gatandatu yongeye kwerekana ko afite ijwi rihebuje ubwo yasusurutsaga abakunzi b’umuziki Nyarwanda, mu gitaramo cya ’My Talent Live Concert’.

Ni ibitaramo byateguwe na East African Promoters, bihuriramo abahanzi Nyarwanda bafite amazina akomeye, bica kuri Televiziyo Rwanda buri wa Gatandatu guhera saa Yine na mirongo ine n’itanu z’umugoroba. Ni mu ntego yo gususurutsa abantu muri ibi bihe ibitaramo rusange bitemewe, kubera icyorezo cya Coronavirus.

Mbere y’uko Marina atangira igitaramo, yabanje kuganira ku buzima bwe bwite ndetse no ku muziki we, aho yashishuye ko iyo ataza kuba afite The Mane Label ngo imureberere inyungu, atari kuba ari Marina abantu babona ubu.

Uyu muhanzikazi uvuka mu Karere ka Rwamagana, muri iki gitaramo yatuye abantu bose bavuye mu byaro bitandukanye indirimbo ye yise "Madede", avuga ko ariyo akunda kurusha izindi kuko imwibutsa ubuzima bwo mu cyaro.

Ati “Iyi ndirimbo Madede ni imwe mu ndirimbo zanjye nkunda cyane kubera ko inyibutsa ibihe bya kera tukiba mu cyaro, dukubura ku irembo, mbese urukundo rwo mu cyaro. Iyi ndirimbo nyituye abantu bose bavuye mu cyaro kandi bahakumbuye.”

Yaririmbye indirimbo ze zitandukanye zakuzwe n’abatari bake zirimo "Kora", "Logout", "Madede", "Marina" na "Like that", agenda azivanga n’izo yagiye akorana n’abandi bahanzi nka "Ikanisa" yakoranye n’abahanzi bo muri The Mane, "Do Me" yakoranye na Queen Cha na "Mbwira" yakoranye na Kidum.

Yafashijwe na Symphony band, itsinda rimaze kumenyekana mu gucurangira ndetse no kuririmbira abahanzi mu bitaramo.

Biteganyijwe ko ku wa Gatandatu utaha, ku wa 21 Ugushyingo 2020, umuhanzi Peace Jolis ari we uzasusurutsa abakunzi b’umuziki mu bitaramo bya “My Talent Live Concert”.

Umunyamakuru Nzeyimana Luckman ni we wayoboye iki gitaramo
Marina yanyuze benshi bakurikiye iki gitaramo
Ni igitaramo giterwa inkunga n'ibigo birimo Bralirwa, binyuze ku kinyobwa cya Cheetah
Marina yakoze ku ndirimbo ze zose zakunzwe na benshi
Yaririmbaga, akanyuzamo agakata umuziki
Igitaramo cyasojwe benshi bakinyotewe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .