MAR, ibihembo bishya bigiye kujya bihabwa abanyamuziki bitwaye neza mu Rwanda

Yanditswe na Dusabimana Aimable
Kuya 10 Kanama 2018 saa 08:30
Yasuwe :
0 0

Nyuma y’igihe kirekire mu Rwanda nta bihembo bitangwa mu byiciro ku bahanzi bitwara neza, hatangijwe Music Awards Rwanda byitezweho kuzana impinduka mu banyamuziki no kugaragaza abakora neza bakabishimirwa.

Umuhango wo gutangiza iki gikorwa wabaye kuri uyu wa Gatanu, tariki 10 Kanama 2018, abagiteguye bagirana ikiganiro n’itangazamakuru mu gusobanura byimbitse uko giteguwe n’umwihariko kizanye mu muziki nyarwanda.

Abateguye iki gikorwa bemeje ibyiciro by’ibanze 16 bahereyeho, berekana ishusho igihembo kizajya gitangwa gifite ndetse banasobanura byimbitse icyatumye hategurwa ibihembo bya Music Awards Rwanda bifite imvo mu ishavu n’ipfunwe ry’abaruhiye iterambere ry’umuziki nyarwanda kuva kera ariko ntibigerweho uko byifuzwa.

Ibihembo bya mbere bya Music Awards Rwanda byemejwe ko bizatangwa ku itariki ya 1 Ukuboza 2018, hagahembwa abakoze cyane muri uyu mwaka. Urutonde rw’uko abanyamuziki bazahatanira ibihembo ruzashyirwa ahagaragara bitarenze ibyumweru bitatu biri imbere.

Muri iki kiganiro n’itangazamakuru, Perezida w’Inama y’Ubutegetsi mu bateguye iki gikorwa, Judo Kanobana, yatangaje ko guteza imbere umuziki wo mu Rwanda ari intekerezo bagize kuva kera, atebya ati “Twanabitekerezaga tugifite umusatsi.”

Yagize ati “Igikenewe cyane ubu ni uko umuhanzi nyarwanda agira ikintu kimuranga, iyo ugiye mu mbuga z’ishakiro ukandikamo umuhanzi runaka ukomeye mu bihugu byo hanze ugera muri Wikipedia ukahasanga amateka ye, uko yavutse, uko yabayeho, ibikorwa bye ariko ku musozo ukabona n’ibihembo yahawe bishimangira akazi yakoze.”

Yongeyeho ati “Ni ibintu bya ngombwa cyane kandi abahanzi bacu barabikwiye. Ikindi ku rwego mpuzamahanga abantu bamenya uko ibintu bihagaze, bakamenya ngo abahanzi beza mu Rwanda twakorana ni aba, abakizamuka bitwara neza ni aba, abageze yo ni aba.”

Yashimangiye ko iki gikorwa cyatekerejweho cyane n’abantu benshi kikanozwa ndetse kikaba giteguwe mu buryo bunoze ariko bakaba baha n’ikaze Abanyarwanda n’ibyifuzo byabo kugira ngo kizarusheho kujya imbere mu bizamura iterambere ry’umuziki nyarwanda.

Ku ruhande rwa Muyoboke Alex, Umuyobozi Mukuru wa MAR, yabajijwe niba ibihembo bizatangwa mu mucyo byuzuye cyane ko yagiye agirana umubano n’abahanzi batandukanye akiri umujyanama wabo, waba mubi cyangwa mwiza, atanga icyizere ko icyo bari guharanira ari uguteza imbere umuziki nyarwanda batagendeye ku marangamutima y’umuntu umwe.

Yagize ati “Abahanzi twabanye cyangwa twakoranye, bamwe bavuga ko twatandukanye, ariko nibaza ko ibyo twabanyemo ari byo byari byiza cyane, ndetse n’abo bahanzi ubwabo no mu mitima yabo n’iyo mubabajije, bashima icyo naba narabamariye. Bazi umuhate ngira n’urukundo nkunda umuziki w’abana b’Abanyarwanda, icyo mbizeza ni uko barenga aho bari bakagera n’ahandi.”

Yongeyeho ati “Ntabwo ari Muyoboke Alex wenyine uri gutegura izi Awards, izi ngabo ziri aha nazica he ngo njye kuvuga nti ‘Oya sinshakamo kanaka?’ Ni abantu b’abagabo bamaze igihe kirekire muri ibi kandi babizi. Ayo marangamutima yo kuba nabuza amahirwe umuhanzi ntabwo ari umugisha wanjye n’Imana yabimpanira. Icyo nifuza ni uko umuziki wacu uzamuka ukarengaho.”

Nsanzamahoro Denis, umuhuzabikorwa muri MAR yashimangiye ko ubu bari mu bikorwa byo gushaka abafatanyabikorwa batandukanye ndetse hakaba hari abo babashije kwegera ariko hakaba hari n’ingengo y’imari yateganyijwe igomba gutegura ibi bikorwa.

Yongeyeho ati “Ibi bihembo ntabwo ari iby’umuntu umwe ku giti cye, ni ibyacu, ni ibyanyu, niba hari umuhanzi wakoze bizajya bica mu mucyo, nta muntu uzajya ku ruhande yego abantu bagira utuntu twabo ariko ntago ari ibintu umuntu azajya agenda ngo yifungirane mu cyumba atoranye abo ashaka. Ni ibikorwa bifunguye.”

Yijeje ko hazashyirwaho akanama kemeza abajya mu byiciro bimwe bigakoranwa ubushishozi hanyuma aho biri ngombwa abaturage bagahabwa umwanya wo gutora mu buryo na bwo buzakoranwa ubushishozi ntihabeho kwiba amajwi.

Ibi bihembo bije nyuma y’ibindi byamenyekanye mu Rwanda bizwi nka Salax Awards byahirimye mu mpera za 2016 ubwo huburwaga umugambi wo kubitegura mu buryo buvuguruye ariko abahanzi benshi bagakuramo akabo karenge ku mpamvu zitandukanye, byatumye bigenda bitakaza agaciro kugeza bihagaritswe.

Abatangije itangwa ry’ibihembo bishya bya Music Awards Rwanda bahigiye kubikora mu buryo bunoze bifashishije ubunararibonye basanzwe bafite mu muziki wo mu Rwanda.

Ni abantu basanzwe bakora ibikorwa bikomeye mu guteza imbere umuziki mu Rwanda, mu itsinda ryagitangaje mbere Judo Kanobana azwi nk’ukuriye Positive Production, Muyoboke Alex yabaye umujyanama w’abahanzi igihe kirekire naho Nsanzamahoro Denis azwi nk’icyamamare muri filime yakinnye yitwa “Rwasa” ariko yanabaye DJ mu myaka ya 1990 (muri Cosmos Club i Nyamirambo).

Ibyiciro by’ibanze bizagenderwaho mu gutanga ibihembo bya MAR ku bahanzi

1. Artist of the Year
2. Best Male Artist
3. Best Female Artist
4. Best Group of the Year
5. Best Hip Hop Artist
6. Best RnB/Pop Artist
7. Best Afrobeat Artist
8. Best Gospel Artist
9. Best Song of the Year
10. Best Producer
11. Best Video of the Year
12. Song Writer of the Year
13. Upcoming Artist of the Year
14. Best DJ of the Year
15. Lifetime Achievement of the Year
16. Best Traditional Song of the Year

Ibihembo bya mbere byatangajwe ko bizatangwa ku wa 1 Ukuboza 2018
Muyoboke Alex, umwe mu bayoboye itsinda riri gutegura itangwa ry'ibi bihembo
Muyoboke Alex yemeje ko ibi bihembo bizajya bitangwa mu mucyo
Nsanzamahoro Denis ni umwe mu bashaka kuzana impinduka mu muziki nyarwanda
Perezida w'Inama y'Ubutegetsi mu bateguye ibihembo bya Music Awards Rwanda, Judo Kanobana
Baad Rama ukuriye The Mane yatanze inama ku bategura iki gikorwa asaba ko cyazakorwa mu mucyo
Abateguye ibihembo bya Music Awards Rwanda bagiranye ikiganiro n'itangazamakuru
Ibihembo bya Music Awards Rwanda bizaba bifite iyi shusho

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza