Makonikoshwa yakoze igitaramo cya mbere nyuma y’uburwayi atanga icyifuzo ku banyarwanda (Video)

Yanditswe na Nsengiyumva Emmy
Kuya 2 Ukuboza 2019 saa 01:04
Yasuwe :
0 0

Makonikoshwa, umwe mu bahanzi bagize amazina akomeye mu muziki w’u Rwanda icyakora akaba yari amaze igihe atagaragara yongeye kubura umutwe ahamya ko atangiye urugendo rushya.

Ibi Makonikoshwa yabitangarije mu gitaramo cya mbere yakoze kuva yakira uburwayi yahuye nabwo mu minsi ishize bwari butumye amara hafi imyaka ine atagaragara mu muziki.

Muri 2014 nibwo Makonikoshwa yatangiye kurwaragurika bya hato na hato rimwe na rimwe bikanamuviramo kumara igihe mu bitaro.

Nyuma yo kuva mu bitaro, Makonikoshwa yafashe igihe cyo kubanza kugarura agatege amaze kumera neza yiyemeza kuba yasubukura ibirebana n’akazi ke k’umuziki.

Mu rwego rwo kongera kwereka abakunzi be ko ahari ntaho yagiye, Makonikoshwa yateguriwe igitaramo cyiswe Makonikoshwa Comeback Live Concert.

Iki gitaramo cyabereye muri White Club Kimironko kuri iki Cyumweru tariki 1 Ukuboza 2019 gusa ntabwo cyitabiriwe n’abantu benshi nubwo bake bari muri aka kabyiniro wabonaga bafite inyota yo kongera kumva umuziki w’uyu muhanzi.

Makonikoshwa waririmbye nyinshi mu ndirimbo ze zakunzwe mu buryo bwa Live yanyuzagamo akaganira n’abakunzi b’umuziki bari bitabiriye igitaramo cye.

Abakunzi b’umuziki bitabiriye iki gitaramo Makonikoshwa yari yabahaye akazina k’Inkoramutima, yakomezaga kubabwira ati” Muri bake beza, nimwe banjye mwe muri inkoramutima. Amateka kuri njye ubu yararangiye ngarutse mu muziki bundi bushya. Ndasaba buri umwe yaba abakunzi b’umuziki ndetse n’abanyamakuru kunshyigikira kuko mfite urugendo rurerure.”

Mu gihe kigera ku isaha ari kuririmba, Makonikoshwa yavuye ku rubyiniro saa saba z’ijoro icyakora ubona abantu bakimunyotewe.

Makonikoshwa aganira na IGIHE yavuze ko afite ibihangano bishya kandi yiteguye gushyira hanze mu minsi ya vuba, aha yasabye abakunzi b’umuziki ndetse n’abanyamakuru kuzamuba inyuma mu rugendo rwe rw’umuziki.

Reba uko Makonikoshwa yitwaye muri iki gitaramo

Makonikoshwa yaririmbaga mu buryo bwa Live
Makonikoshwa yabwiye abari aho ko ameze nk'umuhanzi ugitangira kandi afite ubushake, yabasabye kumushyigikira muri uru rugendo rurerure
Makonikoshwa yagaragazaga imbaraga ku rubyiniro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza