M1 yahishuye uko Rayvanny na Diamond bagambaniye indirimbo ye

Yanditswe na Muvunyi Arsène
Kuya 23 Nyakanga 2019 saa 08:19
Yasuwe :
0 0

Baca umugani mu Kinyarwanda ngo aho inzovu zirwaniye ibyatsi birahababarira. Uyu mugani bawuca bashaka kwerekana ko amakimbirane y’ibikomerezwa bibiri ashobora kugira ingaruka ku munyantege nke ubari hafi.

Ibi bihuye neza ku byabaye ku muhanzi w’umunyarwanda M1 umenyerewe mu njyana ya Afrobeat na Dance Hall.

Uyu musore aherutse gushyira hanze indirimbo yise Do It Again yakoranye n’umuhanzi wo muri Tanzaniya witwa Killy, akaba umwe mu bafashwa n’izu ya King’s Music Record ya Ali Kiba.

Uyu Killy n’umwe mu baririmbyi bafashije Ali Kiba ubwo yari mu gitaramo cya East African Party ya 2018, ari nabwo M1 yahuraga n’uyu muhanzi bagakorana indirimbo.

Mu kiganiro M1 yagiranye na IGIHE yahishuye ko iyi ndirimbo yari igiye kumara imyaka ibiri yarakozwe, yakomanyirijwe n’abahanzi bo muri Wasafi Records iyoboye na Diamond Platnumz ufitanye inzigo na Ali Kiba.

Uyu musore yavuze ko ubwo bafatiraga amashusho y’iyi ndirimbo i Mwanza muri Tanzania, Diamond na Rayvanny nabo bagiye kuhafatira amashusho y’indirimbo yabo yitwa “Mwanza” bamenye ko hari umuhanzi wo kwa Ali Kiba nawe wahakoreye bashakisha uko aya mashusho yazasohoka nyuma y’ayabo kuko harimo ayashoboraga gusa.

Ati “Diamond yagiye kuhafatira amashusho y’iriya “Mwanza” neza ahantu hameze nk’aho twakoreye, bamubwira ko hari umuhanzi wo muri King’s Music waje kuhafatira amashusho, sinzi uburyo yakoresheje kugira ngo agere ku wafashe ayacu indirimbo barayifunga bifuzaga ko iyabo isohoka mbere.”

Nyuma y’aho abo muri Wasafi bavuganiye n’uwitwa Mickeydad wo muri Uganda wafashe amashusho y’indirimbo ya M 1, ngo yatangiye kwanga kumwitaba kuri telefone ndetse yajya no kumureba akamubura.

M 1 yaje kumenya ko yagambaniwe n’abo muri Wasafi Records abibwiwe n’undi musore utunganya amashusho y’indirimbo wo muri Tanzania wari uzi uko byose byagenze.

Ati “ Hari undi ufata amashusho twavuye Mwanza tumenyanye, niwe waduhaye amakuru atubwira ko tuhavuye ari bwo ba Diamond baje kuhafatira amashusho, bababwiye ko hari abantu bo kwa Ali Kiba bahakoreye, we akora izindi gahunda zose kugira ngo ihagarare, sinzi ukuntu bahuye.”

Amashusho y’indirimbo zombi yafatiwe ku nkengero z’ikiyaga cya Victoria ku gice cya Mwanza.

Nyuma y’umwaka urenge nibwo Mickeydad yoherereje M 1 amashusho y’indirimbo ye hatarimo amwe mu mashusho bari barafashe kandi yari azi neza ko agomba kuzamo.

Ati “Mickeydad yansabye imbabazi, arambwira ati ‘nyihanganira ku byabaye, amashusho ngayo ndayakoherereje urebe uko ameze.’ Ndamubaza nti ‘amashusho yandi ko mbona ntayarimo’ arambwira ngo yarapfuye.”

Amashusho yakuwe mu ndirimbo ya M1 ni agaragaza ibibuye binini biri mu mazi, mu gihe bigaragara mu mashusho y’indirimbo ya Rayvanny na Diamond Platnumz.

M1 ntabwo arenganya Diamond n’abo bakorana muri Wasafi bakomanyirije indirimbo ye, ahubwo ashinja ubuhemu uwafashe amashusho ye wari usanzwe ari n’inshuti ye dore ko bari basanzwe bakorana.

M1 avuga ko umunsi Diamond azaba yaje gutaramira i Kigali mu kwezi gutaha yifuza kuzamwereka ko amashusho yakomanyirije yashyize akajya hanze.

“Do It Again” ngo yatwaye amafaranga ari hejuru ya miliyoni ebyiri z’amafaranga y’u Rwanda habariwemo amafaranga yose yakoreshejwe kugira ngo irangire.

Reba "Mwanza" ya Diamond na Rayvanny

Reba "Do It Again" ya M1 na Killy

M1 avuga ko indirimbo ye yakomanyirijwe bitewe n'uko yayikoranye n'umuhanzi ufashwa na Ali Kiba
Amashusho M1 yafatiye kuri aya mabuye yakuwe mu ndirimbo ye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza