Lous and the Yakuza yahuriye mu ndirimbo na Joey Bada$$

Yanditswe na Uwiduhaye Theos
Kuya 18 Mutarama 2021 saa 10:05
Yasuwe :
0 0

Umuhanzikazi Lous and The Yakuza ufite inkomoko mu Rwanda, yasubiyemo indirimbo ye yitwa ‘Amigo’ afatanyije n’umuraperi Joey Bada$$ wo muri Leta Zunze Ubumwe za Amerika.

Uku guhurira mu ndirimbo bisa nk’ibyatunguranye ariko bishimisha benshi bakunda umuziki wa Lous and the Yakuze kuko ari intambwe nziza ndetse bikaba ari ikiraro kigiye kumufasha gukomeza kwigarurira imitima ya benshi.

Gusubiramo ‘Amigo’ ni itangiriro ry’indirimbo zitandukanye Lous and the Yakuza ari gukorana n’abahanzi bo muri Amerika n’abandi batandukanye bakomeye ku rwego mpuzamahanga.

Lous and the Yakuza agezweho mu bihugu bikoresha ururimi rw’Igifaransa, ndetse ari guhatana mu cyiciro cy’umuhanzi wazamukanye ingoga mu bihembo bya Les Victoires de la Musique bitangirwa mu Bufaransa.

Ibi bihembo bizatangwa ku wa 12 Gashyantare 2021, bicishwe kuri televiziyo ya France 2. Uyu muhanzikazi ari mu bazaririmbira abazakurikira iki gikorwa cyatangijwe mu 1985.

Lous and The Yakuza aherutse gutorwa nk’umuhanzi w’umwaka mu Bubiligi mu bihembo ngarukamwaka bya Red Bull Elektropedia Awards. Byari ku ku nshuro ya 11 ubwo habaga ibi birori byo gutanga ibi bihembo byabaye tariki 25 Ugushyingo 2020.

Mu byiciro 10 byatanzwemo ibihembo Lous and the Yakuza yahatanaga muri bitatu harimo umuhanzi w’umwaka, album y’umwaka aho iye yitwa Gore yari irimo ndetse n’icy’indirimbo y’umwaka aho iyitwa Tu es Gore ariyo yari ihanganye n’izindi.

Lous and The Yakuza ubu ni umuhanzikazi uhanzwe amaso ku mugabane w’u Burayi. Aherutse gutoranywa mu bahanzi bane mu Bufaransa bemerewe gufashwa n’ikigo gicuruza umuziki cya Spotify.

Uyu mukobwa ubusanzwe witwa Marie-Pierra Kakoma aba i Bruxelles mu Bubiligi.

Umva indirimbo Lous and the Yakuza yasubiranyemo na Joey Bada$$

Joey Bada$$ yafashije Lous and the Yakuza mu ndirimbo ye nshya
Uyu mukobwa ahanzwe amaso ku muziki w'i Burayi cyane cyane mu bavuga Igifaransa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .