Kwamamaza

Lilian Mbabazi yishimiwe bidasanzwe mu gitaramo yakoreye i Kigali (Amafoto)

Yanditswe kuya 1-10-2016 saa 10:46' na Munyengabe Murungi Sabin


Umuhanzi ukomeye muri Uganda, Lilian Mbabazi yaje mu Mujyi wa Kigali aho yakoreye igitaramo cyitabiriwe mu buryo bukomeye mu ijoro ryo kuri uyu wa Gatanu tariki ya 30 Nzeri 2016 .

Lilian Mbabazi yaje mu Rwanda aririmba mu gitaramo cya Jazz Junction cyabereye muri Kigali Serena Hotel. Abafana ntibazitiwe n’imvura y’umuzajoro yaguye mu Mujyi wa Kigali, bari bakubise buzuye ndetse ubona ko bizihiwe n’igitaramo cy’uyu muhanzi.

Lilian Mbabazi amaze imyaka igera kuri 15 aririmba, akomoka mu Rwanda ndetse yahabaye igihe kinini mbere y’uko ajya gukomeza amashuri ye muri Kaminuza ya Makerere muri Uganda. Icyo gihe yaririmbaga mu tubari n’amahoteli nko kuri Mango pub na Hotel des Mille Collines aho yakundaga gukorera ibitaramo afatanyije na Kidum.

Muri Makerere University yize mu ishami rya Social Sciences, ari nabwo yatangiye ibyo kuririmbana n’abahanzi bo muri Uganda.

Muri 2003 yihuje na bagenzi be Jackie Chandiru na Cindy Sanyu bashing Blue 3 nyuma yo kumenyanira mu irushanwa rya Coca Cola Pop star. Iri tsinda ryaje gusenyuka hanyuma muri 2010 atangira kuririmba ku giti cye.

Mu gitaramo yaraye akoreye muri Serena Hotel, Lilian Mbabazi yagaragaje ubuhanga bukomeye mu kuririmba umuziki w’umwimerere. Yageze imbere y’abafana ahagana saa yine n’iminota 30 z’ijoro, yakirijwe ibyishimo bikomeye arasuhuza ubundi ahita atangira kuririmba.

Yaririmbye indirimbo zamenyekanye cyane zirimo iyitwa “Vitamin”, “Kankutwale”, " Yegweweka ", “Where You Are”, “Memories” n’izindi. Yaririmbanye n’abacuranzi bagize itsinda rya Neptunez band ryamufashije gushimisha abari baje kureba igitaramo.

Umuryango wizihiwe…

Mbabazi Lilian yari afite abafana bafite imbaraga zikomeye, abagaragazaga ibyishimo kurusha abandi ni abo mu muryango we barimo nyina wacishagamo akajya imbere akabyina, barumuna be na bene wabo batuye i Kigali.

Mu gitaramo hagati yashimiye nyina agira ati “Ndagushimira mama nkunda, ndakubona waje, uyu ni mama wicaye hariya, hari abavandimwe banjye, mwakoze kuza[bamwe yabavuze amazina]…”

Yanaririmbye indirimbo yitwa ‘Smile’ yahimbiye abana be babiri [Izuba na Asante] yabyaranye na Radio. Mbere yo kuyiririmba yagize ati “Mfite abana beza babiri, ndabakunda cyane, bampa ibyishimo, iyo ntashye baransekera nkishima, tuba twishimye cyane…”

Yagaruye urwibutso rwa Blue3

Mu byateye abafana kwishima by’ikirenga ni indirimbo za Blue3 [yahoze aririmbanamo na Jackie Chandiru ndetse na Cindy], yaziririmbye mu buryo bwa live mu ijwi ryumvikanamo imbaraga n’ubuhanga benshi bamukurira ingofero.

Lilian Mbabazi mu gitaramo aheruka gukorera i Kigali

Indirimbo nka ‘Hitaji’, ‘Sanyu lyange’ n’izindi zongeye gukumbuza abafana ibihe byahise itsinda rya Blue 3 ryagize rikiririmba.

Igitaramo cyasojwe ahagana saa sita z’ijoro, abafana ntibashakaga gutaha, yavuze ko asoje benshi bazamura amajwi bamwinginga ngo akomeze na we ati “Mwa bantu mwe ntabwo ndi imashini bashyiramo CD, ngiye kuririmba iya nyuma!”

igitaramo kikirangira imvura yakajije umurego ku buryo yazibiranyije abatagira ibinyabiziga babura uko bataha, byageze saa saba z’ijoro hari abakiyugamye ku rubaraza rwa Serena Hotel.

Itsinda ryitwa Makumbi Sound ryacuranze Jazz y'umwimerere
Tamfum, umusaza w'imyaka 66 wigaragaje nk'umuhanga mu gucuranga gitari
Yagaragaje ubuhanga mu gucuranga Jazz ivanzemo Blues
Abacuranzi bagize Makumbi Sound banyuze abakunda Jazz y'umwimerere
Abo mu muryango wa Lilian Mbabazi bari baje kumushyigikira
Lilian Mbabazi yahereye ku ndirimbo ze zakunzwe hambere
Dr.Agnes Binagwaho yari yaje kureba igitaramo
Abitabiriye igitaramo bari bishimye cyane
Mbabazi yakoresheje imbaraga nyinshi
Nyina wa Lilian Mbabazi yari yizihiwe
Yajyaga imbere y'umukobwa we akabyina
Mani Martin na Jody mu bafana
Mbabazi yaririmbye indirimbo yitwa Smile yahimbiye abana yabyaranye na Radio
Muyoboke Alex na Dj Pius bari baje kureba igitaramo
Bari baje kureba Lilian Mbabazi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved