Lilian Mbabazi yaje i Kigali kwitabira igitaramo cya Jazz Junction

Yanditswe na Munyengabe Murungi Sabin
Kuya 29 Nzeri 2016 saa 08:03
Yasuwe :
0 0

Umuririmbyi ukomeye muri Uganda, Lilian Mbabazi yaraye ageze mu Mujyi wa Kigali, aje nk’umuhanzi mukuru mu bazitabira igitaramo cya Jazz Junction azakora kuri uyu wa Gatanu tariki ya 30 Nzeri 2016.

Mbabazi Lilian yabwiye IGIHE ko yahisemo kuza mbere y’iminsi ibiri kugira ngo abanze akorane imyitozo n’itsinda ry’abacuranzi bagize Neptunez Band izamucurangira no kugira ngo abanze abonane na bamwe mu muryango we batuye i Kigali.

Yagize ati “Ntabwo nazanye na Band yanjye, ubusanzwe ahantu hose ncurangira muri Uganda niyo imfasha kuko ndirimba live, igitaramo cyo muri Serena rero nzafatanya na band yitwa Neptunez, isanzwe icurangira inaha, ndashaka kwitegura neza ngo nzakore igitaramo cyiza.”

Muri iki gitaramo cya Jazz Junction kizabera muri Kigali Serena Hotel, Lilian Mbabazi azafatanya n’abahanzi bakomeye mu kuririmba by’umwimerere barimo Hope Irakoze wegukanye Tusker Project Fame n’abaririmbyi bagize Neptunez Band.

Mbabazi uvuga Ikinyarwanda gitomoye, yavuze ko iki gitaramo na we agifite amashyushyu kuko iyo aririmbiye mu Rwanda yishima kurusha mu bindi bihugu byose yatumiwemo.

Ati “Mu Rwanda ndahakunda cyane, erega hano ni iwacu, ni mu rugo, ndumva kuzaririmbira abafana banjye bizaba bishimishije, iyo ncurangiye mu Rwanda numva nishimye cyane, abafana bazaze tugire ibihe byiza.”

Yongeyeho ko mu mwaka utaha wa 2017 azaza kuba mu Rwanda by’igihe gito akahatunganyiriza album y’Ikinyarwanda azakorana n’aba Producers yatoranyije ariko atahita atangaza ubu.

Yagize ati “Nabikubwiye mu Rwanda mbafite abantu benshi, mpafite abavandimwe banjye, umuryango wanjye uba hano, ababyeyi banjye n’abo tuvukana, ndashaka kuhagaruka mu mwaka utaha. Nzakora ibitaramo, ndashaka no gukora album yanjye ya mbere y’Ikinyarwanda.”

Mbabazi Lilian agarutse mu Rwanda nyuma y’aho muri Nzeri 2015 yahakorera igitaramo gikomeye cyamuhuje n’itsinda rya Mafikizolo ni nabwo yahaheruka.

Afite indirimbo yaririmbye zakunzwe cyane zirimo Memories yahuriyemo na A Pass, Danger, Vitamin, Yegwe weka yakoranye na Kitoko n’izindi.

Lilian Mbabazi akunda kugarukwaho cyane mu itangazamakuru ryo muri Uganda kubera iby’urukundo rwe na Radio uririmba muri Good Life ariko yabwiye IGIHE ko ‘iby’urukundo byarangiye basigaye bahuzwa n’abana babiri babyaranye gusa’.

Mbabazi aje gucurangira mu gitaramo cya Jazz Junction nyuma y’abandi bahanzi bo muri Uganda na bo bahacurangiye Maurice Kirya [wahacurangiye muri Gashyantare 2016] na Myko Ouma[waje muri Gicurasi 2016.

Kwinjira muri iki gitaramo kizatangira saa moya z’umugoroba ni ukwishyura amafaranga ibihumbi icumi, ndetse amatike yatangiye gucuruzwa mbere kuri Serena Hotel no kuri rubuga rwa internet rwa Jumia.rw hano.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244