Kwamamaza

Leta y’u Burundi yaciye filime z’Ikinyarwanda mu Cibitoke

Yanditswe kuya 30-08-2016 saa 15:59' na Munyengabe Murungi Sabin


Filime zisobanuye mu Kinyarwanda n’izakinwe n’Abanyarwanda zaciwe mu Ntara ya Cibitoke muri Komine ya Rugombo ahabarizwaga umubare munini w’Abarundi batunzwe n’akazi ko kuzicuruza.

Leta y’u Burundi ibinyujije mu nzego z’umutekano muri Komine Rugombo iri guhiga filime zasobanuwe mu Kinyarwanda ndetse abafite inzu zerekana filime zifitanye isano n’u Rwanda bafungiwe imiryango abandi bahabwa ibihano biremereye nk’uburyo bwo kubihagarika burundu.

Radio y’Abadage Deutsche Welle yatangaje ko muri aka gace ka Rugombo hari umubare munini w’abari batunzwe no gucuruza filime zisobanuye mu Kinyarwanda gusa abakoraga ubu bucuruzi bose basubijwe ku isuka.

Abarundi bo muri Rugombo ngo ntibabasha kumva Icyongereza ndetse n’Igifaransa ari nayo mpamvu filime zakinwe muri izi ndimi zakururaga abazireba ari uko zahinduwe mu Kinyarwanda, ururimi rwumvwa n’umubare munini w’abatuye muri aka gace.

Uwitwa Saddam afite umugore wari umaze imyaka ine akora akazi ko kwerekana filime zisobanuye mu Kinyarwanda ari naho umuryango wakuraga ubushobozi bwo kubaho. Yabwiye Deutsche Welle nyuma y’uko Leta y’u Burundi yahagaritse izi filime ubuzima bwatangiye kuba umuravumba kuri benshi bari batunzwe n’aka kazi harimo n’umuryango we.

Yagize ati “Abarundi cyane cyane bakunda filime zisobanuye mu Kinyarwanda, ntabwo bumva Icyongereza ndetse n’Igifaransa, ariko iyo Umunyarwanda asobanuye filime mu by’ukuri birabaryohera, barazikunda cyane…”

Yasobanuye ko nta muntu wemerewe gucuranga indirimbo z’Abanyarwanda muri Cibitoke ndetse ngo ‘iyo basanze uzumva muri mudasobwa yawe bwite barayifata bakayijyana kuri komine’. Ati “N’iyo ugerageje kumva indirimbo z’Abanyarwanda baraza bagafata imashini yawe.”

Yasobanuye ko ubuzima busa n’ubwahagaze ku bari batunzwe no gucuruza izi filime. Mu buhamya bahaye iyi Radio n’abandi bagurishaga imiziki y’Abanyarwanda muri aka gace bavuga ko imyanzuro leta yafasha ibabangamiye bagasaba ko bakomorerwa.

Muri Nyakanga 2015, Radio na Televiziyo by’Igihugu mu Burundi byahagaritse kongera gucuranga indirimbo izo ari zo zose z’abahanzi b’Abanyarwanda n’izindi zose zifitanye isano n’u Rwanda.

Mu mpera za Nyakanga 2016 Visi Perezida wa Kabiri w’u Burundi, Joseph Butore yumvikanye mu itangazamakuru aburira Abarundi cyane abaturiye imipaka y’u Rwanda ko bashobora guhura n’ibibazo bikomeye mu gihe bakomeza guhahirana n’abaturayi babo bo mu Rwanda.

Ukwezi kurashize Leta y’u Burundi ihagaritse urujya n’uruza rw’ibicuruzwa hagati y’u Rwanda n’iki gihugu. Ubusanzwe i Burundi havaga imbuto nk’imyembe, amaronji, indagara n’amamesa.

U Rwanda kandi rwajyanagayo ibicuruzwa byakorewe mu nganda nk’ifu y’ibigori, iy’ingano, ifu y’imyumbati, ibijumba n’amata. Ibi byakurikiwe n’ihagarikwa ry’imodoka zitwara abantu zambukiranya imipaka yombi.

Umubano w’u Rwanda n’u Buurndi watangiye kuzamo agatotsi kuva muri Mata 2015 ubwo Perezida Nkurunziza yatangazaga ko aziyamamaza kongera kuyobora u Burundi. Kuva icyo gihe kugeza ubu habaye akaduruvayo katumye abaturage ibihumbi bahunga.

Impunzi z’Abarundi ziri mu Rwanda zisaga ibihumbi 74, inkambi ya Mahama yonyine icumbikiye abasaga ibihumbi 48.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved