Kwamamaza

Kwizera Peace yanditse igitabo gitangira umushinga yerekanye muri Miss Rwanda

Yanditswe kuya 31-08-2016 saa 12:09' na Munyengabe Murungi Sabin


Nyampinga Kwizera Peace Ndaruhutse agiye gusohora igitabo cya mbere yanditse nk’intangiriro y’umushinga wo kwigisha abana kumenya guhitamo inzira inoze mu kuzagera ku nzozi zabo.

Ndaruhutse Kwizera Peace w’imyaka 20 yabaye igisonga cya Mbere cya Nyampinga w’u Rwanda 2016. Umushinga yerekanye akiri muri iri rushanwa ry’ubwiza ni uwo kwigisha abana kumenya guhitamo icyerekezo cyiza mu rugendo rw’ubuzima n’inzira banyuramo bakora ibihwanye n’inzozi zabo [career guidance].

Yanditse igitabo yise “Oh Rwandan Child” ku mapaji 32 akubiyemo ubutumwa bugenewe urubyiruko ruri hagati y’imyaka itatu na cumi n’ibiri.

Ati “Iki gitabo kigenewe abana bato kuva ku w’imyaka itatu, kirimo ubutumwa bumfasha gukora umushinga wanjye wa career guidance no gutoza abana gukura bakunda gusoma kuko mu gihugu cyacu uyu muco uri hasi cyane.”

Yongeyeho ko yanditse iki gitabo yagishyizemo ubutumwa buherekejwe n’amafoto y’abantu babashije kwiteza imbere bigaragara mu gihugu kugira ngo yereke abakiri bato ko badakwiye kurota iby’imahanga gusa ahubwo ko no mu Rwanda hari abantu b’icyitegererezo umwana yakubakiraho ubuzima.

Ati “Nashyizemo amafoto y’abantu biteje imbere hano iwacu, ntabwo mvuga amazina y’abo nashyize kuko icyo gihe ntabwo mwaba mukiguze igitabo. Ni ukwereka abana ko mu gihugu cyacu harimo abantu bafataho icyitegererezo bityo bagakura bifuza kuzakora nk’ibyabo.”

Mu bo Miss Kwizera Peace yahisemo gukoresha mu gitabo cye harimo abayobozi bakomeye mu gihugu, ba rwiyemezamirimo biteje imbere, urubyiruko rwihangiye imirimo mu buryo bunyuranye bikaruhira n’abandi.

Iki gitabo kizajya hanze mu muhango uzaba ku itariki ya 30 Nzeri 2016 ku Isomero rusange rya Kigali (Kigali Public Library, KPL) guhera saa kumi n’ebyiri z’umugoroba kugeza saa mbili.

Kwizera Peace yanditse igitabo cya mbere

Ati “Uwo munsi nzaba natumiye abo bantu biteje imbere nakoreshejwe mu gitabo kugira ngo baganirize abana. Ni igikorwa kimeze nko guhuza abana n’abantu biteje imbere kugira ngo bakure bafite aho bahera mu kugira inzozi, bizoroha cyane kuba umwana yamenya inzira ahitamo ahanini bishingiye ku byo bazaganira n’abo bantu.”

Iki gitabo nikimara kujya hanze, Kwizera Peace ateganya kuzandika ibindi mu rukurikirane rutanga ubutumwa bwigisha urubyiruko kumenya guhitamo icyerekezo cy’ubuzima.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved