Ku myaka 16, Mr Gloire agiye gusohora album ya kabiri

Yanditswe na Munyengabe Murungi Sabin
Kuya 4 Ukwakira 2016 saa 12:43
Yasuwe : XX
0

Mucyo Gloire [Mr.Gloire] ukorera umuziki mu Mujyi wa Musanze ageze kure anoza umushinga wo kumurika album ya kabiri, ayitezemo umusaruro ukomeye kuko azayishyira hanze mu buryo bwihariye.

Uyu muhanzi ukora umuziki wiganjemo injyana ya Hip Hop, azwi cyane mu Ntara y’Amajyaruguru mu ndirimbo zakunzwe zirimo Mfite inzozi, Baravuga, Urungano feat. Lil Ngabo, Gloire à Dieu feat. Bertrand & Sahihi, Uko dukora feat Kamichi & The Bless, Umubyeyi gito feat.Jay Polly & Franc Kay n’izindi.

Yashyize hanze album ya mbere yise ‘Mfite inzozi’ mu mwaka wa 2012, icyo gihe yari afite imyaka 12 y’amavuko.

Mr Gloire uri kurangiza amashuri yisumbuye muri IPRC Kigali, yabwiye IGIHE ko ageze kure umushinga wo kumurika album ya kabiri ifite umwihariko kurusha iyo yahereyeho ndetse ngo ayitezemo kuzamufasha kumenyakana mu gihugu hose.

Ati “Abantu b’iwacu i Musanze na bo bajya babimbwira ko maze gukura, barashaka ko nazamura ibendera ryabo nkamenyekana mu Rwanda hose. Album ya mbere navuga ko nayikoze ndeba isoko ry’umuziki igice kimwe cy’igihugu ariko iyi nshya ngiye gukora izaba ikomeye cyane.”

Yavuze ko album ye nshya izaba ifite indirimbo nyinshi zikoze mu buryo bw’umwimerere kurusha izo yasohoye ku ya mbere. Ati “Iyi iriho indirimbo nyinshi nkeka ko zizaba nziza, nk’indirimbo nshya nakoze navuga ko iri ku rwego mpuzamahanga, n’izindi ndashaka ko zizasnshyira ku rundi rwego.”

Mr Gloire yongeraho ati “Album ya mbere nayisohoye mu mwaka wa 2012, yitwaga ‘Mfite Inzozi’, yari igizwe n’indirimbo 14 zirimo nyinshi nakoranye n’abandi bahanzi. Kuri album nshya ndi gukora nagerageje gushyiramo umwihariko ku buryo nkora cyane indirimbo zanjye, ndifuza ko yaba album ingaragaza nk’umuhanzi uririmba ku giti cye, ikindi kandi nifuza ko yazaba album izwi mu gihugu cyose.”

Uwineza Patrick uyobora TOP5 Sai ari nayo ifasha Mr Gloire mu muziki, yavuze ko indirimbo nshya uyu muhanzi yise ‘NMUN (Nti Mumfate Uko Ntari) iri ku rwego mpuzamahanga kuko yanatunganyijwe n’aba Producers bo mu bihugu birenze kimwe.

Ati “Ni imwe mu ndirimbo twakwita mpuzamahanga kuko yahuje impano z’abantu banyuranye bakorana na TOP5SAI bari hirya no hino, uwakoze beat ni Simbi Music ubarizwa mu Bwongereza, mu buryo bw’amajwi no kuyatunganya byakozwe na Malous Prod wo mu Rwanda. Amashusho yayo yayobowe na Paul N. wo mu Bubiligi ndetse na X SUM wo mu Rwanda.”

Yavuze ko kuri album ye nshya amaze kurangize indirimbo enye zitunganyije neza akaba yiteguye gushyira hanze izindi mu minsi iri imbere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza