Korali Ukuboko kw’Iburyo yasendereje akanyamuneza mu bitabiriye igitaramo yakoreye i Kigali (Amafoto

Yanditswe na IGIHE
Kuya 2 Ukuboza 2019 saa 07:41
Yasuwe :
0 0

Korali Ukuboko kw’Iburyo iri mu zifite igikundiro mu muziki wo kuramya no guhimbaza Imana mu Itorero ADEPR yakoze igitaramo gikomeye cyanejeje benshi mu bacyitabiriye bagatahana akanyamuneza.

Iki gitaramo cyiswe "Ikidendezi Live Concert", Korali Ukuboko kw’Iburyo ikorera umurimo w’ivugabutumwa ry’indirimbo muri Paruwasi ya ADEPR Gatenga yakimurikiyemo album y’amashusho yise “Ikidendezi”. Cyabereye muri Dove Hotel mu Mujyi wa Kigali ku mugoroba wo ku wa 1 Ukuboza 2019.

Iyi korali yafatanyije na Jehovah Jireh yamamaye mu ndirimbo zirimo "Gumamo" no ’"Kugira Ifeza", umuhanzi Simon Kabera n’abandi baramyi bagezweho muri ADEPR barimo Jado Sinza, Bosco Nshuti, Gisele Precious na Danny Mutabazi.

Abitabiriye iki gitaramo bagaburiwe ijambo ry’Imana na Rev. Jean Jaques Karayenga.

Icyumba cyabereyemo igitaramo cyarimo uguhembuka kuva ku munota wa mbere wacyo kugeza gisojwe kuko abahanzi na korali zaririmbye zishimiwe ndetse abagaragaje kunyurwa bagafatanya na zo kuririmba.

Usibye abakirisitu bo muri ADEPR n’abakunzi b’ibihangano bihimbaza Imana baturutse mu bice bitandukanye by’u Rwanda no hanze yarwo, iki gitaramo cyitabiriwe n’abapasiteri, abashumba bo hejuru mu itorero bayobowe n’Umuvugizi wa ADEPR, Rev Karuranga Ephrem.

Ibihumbi by’abari muri Dove byanyuzwe n’indirimbo zitandukanye kuva ku za Jehovah Jireh zirimo "Turakwemera" kugeza ku zaririmbwe na Korali Ukuboko kw’Iburyo yari yahuruje abatari bake.

Iyi korali iri mu zizamutse neza yaririmbye benshi baranyurwa! Yaserutse yajyanishije mu myambarire ibereye ijisho.

Mubogora Désiré wize umuziki mu Ishuri ryo ku Nyundo akaba aririmba muri True Promises yayiyoboye mu miririmbire y’ubuhanga, bahanika amajwi mu buryo bwishimiwe na benshi.

Abari mu gitaramo banyuzwe na Korali Ukuboko kw’Iburyo cyane ku ndirimbo yabo nshya yitwa ‘Hashimwe Yesu’ ifite imiterere nk’iy’izo muri Kiliziya Gatolika.

Indirimbo iri mu zikunzwe cyane zanazamuye izina rya Korali Ukuboko kw’Iburyo yagezweho benshi barahimbarwa, bafatanya kuririmba ku nkuru ivuga ku murwayi wakijijwe na Yesu nyuma y’imyaka 38 yari amaze ku kidendezi cyitwa Betesida.

Igitaramo cyasojwe hari abagifite inyota yo gutarama nubwo byagoranye kuri bamwe babuze aho kwicara, bagakurikirana igitaramo bahagaze.

Umuyobozi wa Korali Ukuboko kw’Iburyo, Kwizera Seth, yavuze ko bishimiye gutaramana n’abakunzi b’ibihangano bivuga ku gakiza katanzwe ku buntu.

Yagize ati “Icy’ingenzi cyadukoze ku mutima ni uburyo habonetse umubare munini w’abakira agakiza nyuma y’uko umwigisha Rev Jean Jacques Karayenga yari amaze kubwiriza. Kubona abasengewe bakakira agakiza ni yo yari intego nyamukuru yo gutegura igitaramo.”

Iyi korali mu 2020 ihishiye abakunzi bayo byinshi birimo indirimbo igiye gukora muri studio zirimo n’izo basogongeje abitabiriye igitaramo cyagutse yakoreye muri Kigali.

Korali Ukuboko kw’Iburyo ni imwe mu zikomeye mu muziki waririmbiwe Imana mu Rwanda no mu Karere ka Afurika y’Iburasirazuba. Yamamaye cyane mu ndirimbo zirimo nka “Ikidendezi” yanitiriye album yayo ya gatatu, “Ibyiringiro by’ubuzima”, “Kuro”, “Imitima”, “Nafurahiya”, “Imirimo”, ‘‘Si ku Kidendezi gusa” n’izindi.

Yatangiye umurimo w’Imana mu 1989 ari iy’Abana b’Ishuri ryo ku Cyumweru. Mu 1998 yatangiye kwihimbira indirimbo, inahabwa izina n’ubuyobozi bw’Itorero rya ADEPR Gatenga yitwa Ukuboko kw’Iburyo (rifite igisobanuro muri Zaburi 118:15-17).

Korali Ukuboko kw’Iburyo igizwe n’abaririmbyi basaga 120 n’itsinda ry’inshuti zayo rihuriwemo n’abantu barenga 5000 bari mu bihugu bitandukanye.

Reba Korali Ukuboko kw’Iburyo imurika album ya gatatu

Korali Ukuboko kw’Iburyo yataramiye abakunzi b'ibihangano byayo bataha banyuzwe
Yaririmbye "Ikidendezi" benshi bagaragaza ko bishimiye ubutumwa buyikubiyemo n'uburyo iririmbitse
Korali Ukuboko kw’Iburyo ikorera umurimo w’ivugabutumwa ry’indirimbo muri Paruwasi ya ADEPR Gatenga
Korali Ukuboko kw’Iburyo iri mu zikunzwe cyane mu ivugabutumwa ry'indirimbo rikorwa mu minsi ya none
Umuvugizi wa ADEPR, Rev Karuranga Ephrem ari mu bitabiriye iki gitaramo
Pasiteri Bwate David (hagati) ni we wayoboye iki gitaramo
Iki gitaramo cyarimo uguhembuka ndetse n'abaririmbyi bagaragazaga akanyamuneza
Abapasiteri n'abashumba bo muri ADEPR bashyigikiye Korali Ukuboko kw'Iburyo
Korali Ukuboko kw’Iburyo yashimangiye ko imaze imyaka 30 mu ivugabutumwa ry'indirimbo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza