Kodak Black akomeje kurinda isezerano nyuma y’imbabazi za Trump zatumye ava mu gihome

Yanditswe na Uwiduhaye Theos
Kuya 9 Gashyantare 2021 saa 10:01
Yasuwe :
0 0

Nyuma yo kuva muri gereza ku mbabazi za Donald Trump, umuraperi Bill Kahan Kapri, wamamaye nka Kodak Black akomeje gukora ibikorwa bitandukanye nk’uko yari yarabyiyemeje afunze.

Mu minsi ishize, uyu muhanzi yatanze 150 000$ mu bikorwa bitandukanye by’urukundo.

Ubu TMZ yatangaje ko akomeje kwagura ibikorwa bye by’urukundo ndetse ashaka noneho gufasha imiryango y’abakozi ba FBI biciwe muri Florida ubwo bari mu kazi.

Umunyamategeko w’uyu muraperi ubusanzwe ukomoka muri Florida, Bradford Cohen, yandikiye FBI yo muri Miami ko bifuza kurihira ishuri abana b’aba bakozi babiri ba FBI bishwe mu minsi ishize.

Muri iyi baruwa Bradford Cohen, avuga ko Kodak azi umubabaro wo kubura uwo wakundaga ndetse no gukura urerwa n’umubyeyi umwe kandi bakabaye babiri, bityo ashaka kugira ngo imiryango iri mu kababaro itazagira ikibazo kijyanye no kurihira abana babo.

Ntabwo biramenyekana niba iyi miryango yemeye ibyo Kodak Black ashaka kuyikorera. Mu gihe haburaga amasaha make ngo Joe Biden na Kamala Harris barahirire kuyobora Leta Zunze Ubumwe za Amerika, Perezida Trump wasimbuwe yababariye abantu bari bafungiwe ibyaha bitandukanye.

Itangazo ryaturutse muri White House ku wa Gatatu tariki 20 Mutarama 2021, ryavugaga ko Perezida Donald Trump yahaye imbabazi abantu 73 mu gihe abandi 70 bo bagabanyirijwe ibihano bari barakatiwe n’inkiko.

Mu bahawe imbabazi barimo Umuraperi Dwayne Michael Carter Jr. wamamaye nka Lil Wayne. Umwaka ushize yafungiwe muri Miami muri Leta ya Florida, ashinjwa gutunga imbunda mu buryo butemewe, aho byari biteganyijwe ko agezwa imbere y’urukiko muri uku kwezi.

Kodak Black, na we yahawe imbabazi nyuma y’umwaka yari amaze muri gereza aho yari afungiwe ashinjwa kugura imbunda mu buryo butemewe. Uyu musore yagombaga gufungwa imyaka itatu, yari kuzarangiza igihano cye mu 2022.

Yari yasabye kugabanyirizwa igihano ariko urukiko rubitesha agaciro kuko nta mpamvu zifatika yagaragaje.

Mbere y’uko afungurwa, Kodak Black yavuze ko mu gihe yaba ahawe imbabazi umwaka we wa mbere azamara hanze azatanga miliyoni y’amadorali mu bikorwa by’urukundo.

Kodak Black akomeje gukora ibikorwa by'ubugiraneza nyuma yo gufungurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .