Knowless yavuye ku izima yerekana umwana amaze amezi atanu abyaye

Yanditswe na Munyengabe Murungi Sabin
Kuya 21 Mata 2017 saa 02:15
Yasuwe :
0 0

Umuhanzi Ingabire Jeanne d’Arc [Butera Knowless] yemeye gushyira hanze ifoto y’umwana yabyaranye na Producer Clement nyuma y’uko hari hashize amezi atanu yarihaye intego ndakuka ko ‘ishusho ye itagomba kujya ku mbuga nkoranyambaga n’ibinyamakuru’.

Umwana wa Knowless na Clement bamwise ‘Ishimwe Or Butera’, kuva yavuka abari baramuciye iryera babarirwa ku ntoki ku mpamvu bwite z’ababyeyi be bahamyaga ko batekerejeho neza basanga ‘byaba ari ukuvogera uburenganzira bwe’.

Knowless yibarutse mu gitondo cyo kuwa 22 Ugushyingo 2016, icyo gihe hari hashize amezi atatu akoranye ubukwe na Ishimwe Clement wari usanzwe amutunganyiriza indirimbo akanamubera umujyanama mukuru mu muziki.

Mu mezi atanu Or Butera amaze avutse nta foto ye n’imwe yigeze ishyirwa ku mbuga nkoranyambaga uretse ikiganza cye ababyeyi bafotoye umuntu batangaje ko Knowless yibarutse.

Kuri uyu wa Gatanu tariki ya 21 Mata 2017, Knowless yashyize kuri Instagram ifoto y’umwana we amuteruye yayifatanyije n’indi ya Producer Clement na we amuteruye gusa birinze kumwerekana mu maso.

Knowless yaherekeje iyi foto ubutumwa burebure bwiganjemo amagambo ashimangira ko uyu mwana afite umuvuduko mu mikurire ye kuko ngo ‘atiyumvisha uburyo amaze amezi atanu abaye umubyeyi’.

Yagize ati “Biragoye kwemera ko wujuje amezi atanu uyu munsi. Mu by’ukuri ndiyumva nk’uwari mu bitaro ejo hashize niteguye kukwakira. Uri gukura vuba cyane.”

Yongeyeho ati “Buri munsi nibaza uburyo nagiriwe ubuntu bwo kwitwa umubyeyi wawe. Njyewe na so twarakwishimiye mbere y’uko uvuka none uyu munsi turi kumwe na we. Ibyishimo byacu ntabwo bigaragaza neza uko twiyumva. Turagukunda cyane mukobwa mwiza Ishimwe Or Butera kandi turi ababyeyi banyuzwe.”

Uyu mugore yari aherutse gutangaza ko we na Clement bari barafashe umwanzuro wo kudashyira ifoto y’umwana wabo hanze ku bwo kubaha ubuzima bwite bw’umwana gusa ngo naba mukuru bazamuha uburenzira bwo kwigaragaza uko ashaka mu buryo bwiza.

Knowless yari yaranze kwerekana ifoto y'umwana we

Icyo gihe Knowless yagize ati “Ntabwo nzi icyo umukobwa wanjye azaba. Ashobora kuba yifuza kuzabaho mu buzima bwe bwite ku buryo gushyira amafoto ye hanze byaba bisobanuye ko nsuzuguye umwanzuro we. Nakenera kumenyekana nk’ababyeyi be nizeye neza ko azabona abamukurikira benshi uko azaba abyifuza.”

Knowless wari waranze kwerekana ifoto y’umwana we mu gihe cy’ubukwe bwe nabwo byari bigoye kuko ababwinjiyemo ni abahawe impapuro z’ubutumire gusa, nta muvumbyi wari wemerewe kuhakandagiza ikirenge ndetse ibirori byabaye umutekano wakajijwe mu buryo budasanzwe.

Butera Knowless nyuma yo kurushinga....


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244