Khloé Kardashian yatamajwe n’umukobwa wavuze ko yaryamanye n’umukunzi we

Yanditswe na Uwiduhaye Theos
Kuya 4 Gicurasi 2021 saa 02:11
Yasuwe :
0 0

Khloé Kardashian yatamajwe n’umukobwa witwa Sydney Chase, uherutse kuvuga ko yaryamanye n’umukunzi we Tristan Thompson uzwi mu mukino wa Basketball muri Leta Zunze Ubumwe za Amerika mu ikipe ya Boston Celtics; washyize hanze ibiganiro bye amwandikira asa nk’ushaka kumenya byinshi ku byo aherutse gutangaza.

Sydney Chase yashyize hanze ibiganiro bye na Khloé Kardashian wamwandikiye nyuma y’inkuru zari zimaze iminsi zikwirakwira, zivuga ko yaryamanye na Tristan Thompson.

Mu butumwa bwa mbere Khloé Kardashian atangira yibwira uyu mukobwa, ati “Mukomere, ni Khloé.”

Yarangiza akamusaba ko ibyo baganira atabishyira hanze, ati “Nzishimira ko ikiganiro cyacu, cyaguma kuba ibanga.” Yarangiza agashyiraho akamenyetso k’ibiganza biri gusenga.

Mu mpera za Mata nibwo hagiye hanze amakuru avuga ko Sydney Chase yaryamanye na Tristan Thompson. Inkuru zo guca inyuma kwa Tristan Thompson zatangajwe n’uyu mukobwa ubwe aho yatangarije No Jumper podcast, ko yaryamanye n’uyu mugabo, yemeza ko babikoze muri Mutarama uyu mwaka.

Icyo gihe yagize ati “Yambwiye ko nta mukunzi afite. Ndavuga nti ni byiza. Turavugana, turasangira kenshi, dukora buri kimwe. Naramubajije nti koko nta mukunzi ufite arambwira ati yego. Byarabaye, nyuma nza kumenya ko yambeshye ndamureka.”

Ntabwo ari ubwa mbere uyu mugabo avuzwe mu nkuru zo guca inyuma umukunzi we kuko mu 2018 nabwo yaryamanye n’umunyamideli Lani Blair mu minsi mike yabanzirizaga iyo umukunzi we yendaga kwibarukamo umukobwa bafitanye witwa True Thompson.

Mu 2019 nabwo hacicikanye amakuru avuga ko yagiranye ibihe byiza n’umunyamideli Jordyn Woods, usanzwe ari inshuti y’akadasohoka ya murumuna w’umukunzi we uzwi nka Kylie Jenner mu ruganda rw’imideli muri Amerika.

Urukundo rwabo rwajemo agatotsi ariko nyuma y’ibi byose Tristan Thompson na Khloé Kardashian bongera kunga ubumwe, umwaka ushize ubwo babanaga mu bihe bya Guma mu Rugo ndetse bari mu mushinga wo kwifashisha undi mugore wabatwitira umwana wabo wa kabiri.

Izi nkuru zije nyuma yaho umuvandimwe wa Khloé Kardashian, Kim Kardashian yujuje impapuro yaka gatanya hagati ye na Kanye West.

Sydney Chase uri hagati yashyize hanze ubutumwa yandikiwe na Khloé Kardashian ubanza ibumoso
Sydney Chase w'imyaka 23 mu minsi ishize yivugiye ko yaryamanye na Tristan Thompson usanzwe ari umukunzi wa Khloé Kardashian
Tristan Thompson yatangiye gukundana na Khloé Kardashian mu 2016. Kardashian afite imyaka 36 mu gihe umukunzi we afite 30

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .