‘Keeping Up With the Kardashians’ ishobora gusiga Kim Kardashian yatse gatanya

Yanditswe na Uwiduhaye Theos
Kuya 7 Gashyantare 2021 saa 10:59
Yasuwe :
0 0

Umunsi ku wundi haboneka amakuru mashya ajyanye n’irindimuka ry’urugo rwa Kim Kardashian na Kanye West ndetse aho bigeze, bivugwa ko batakibana mu nzu imwe; ibintu bikomeza kugaragaza ko uru rugo ruri mu marembera.

Umunyarwanda yarabivuze ati “Nta nduru ivugira ubusa ku musozi!” ubu aho bigeze abataremeraga ko urugo rw’aba bombi ruri mu marembera batangiye kugira amakenga ko ibimaze iminsi bivugwa byaba ari ukuri, n’ubwo nta n’umwe muri ba nyir’ubwite uratobora ngo avuge uko bimeze.

Ibinyamakuru bitandukanye bikomeye byatyajije amakaramu, nta munsi w’ubusa ushira bitanditse inkuru bivugwa ko ‘byakuye mu nshuti za hafi z’uyu muryango, ziba zivuga ko umubano wawo utameze neza na gato’.

Ikinyamakuru People cyatangaje ko gifite amakuru yemeza ko Kim Kardashian yiteguye kuba yakuzuza impapuro zo kwaka gatanya mu gihe igice cya nyuma cy’ikiganiro ‘Keeping Up With the Kardashians’ cyerekanaga ubuzima bwite bw’abo mu muryango we; kizatambuka bwa nyuma cyazaba cyamaze guhita.

Ngo ibi azabikora gutya kuko igice cya 20 ari nacyo cya nyuma, kizagaragaza imiterere y’ibibazo bye na Kanye West ndetse ibi bikaba ari byo bigize igice kinini cyacyo. Iki kiganiro kizatambutswa ku wa 18 Werurwe 2021.

Umwe mu baganirije iki kinyamakuru ati “Abo mu muryango wa Kardashian bashaka kugenda bameze nk’abaturikije igisasu. Bafashe amashusho Kim Kardashian ari kuvuga ku bibazo by’urushako rwe. Ariko buri muntu wese wari uhari yahawe amabwiriza yo kuryumaho kubera ako iki kiganiro kitazatambutswa vuba.”

Uyu muryango wari ufite umutungo ubumbiye hamwe urenga miliyari $4, ngo Kim Kardashian ari kuganira n’abajyanama be mu bijyanye n’imitungo ngo amenye uko azatandukana n’umugabo ntabihomberemo.

E! yatangaje ko na Kanye West yarambiwe urushako rwe na Kim Kardashian nawe akaba ashaka ko batandukana, ndetse we akaba ashobora kuzuza impapuro za gatanya mbere y’umugore we.

Kim na Kanye West bamaze igihe batavugana ndetse Kanye yimukanye n’imiguru 500 y’inkweto azikura mu nzu yabo muri Los Angeles. Ubu Kanye bivuga ko yasize umuryango we akajya kuba muri Wyoming. Aba bombi bafitanye abana bane, barushinze mu 2014.

Umubano wa Kim Kardashian na Kanye West uri mu bibazo bishobora gutuma batandukana
Kanye West na Kim Kardashian bafitanye abana bane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .