Jidenna yavuze ibigwi Perezida Kagame, anahishura ko yifuza ko baganira

Yanditswe na Uwiduhaye Theos
Kuya 29 Ugushyingo 2019 saa 03:38
Yasuwe :
0 0

Umuraperi Jidenna Theodore Mobisson uri mu bakunzwe mu muziki ugezweho ari mu Rwanda aho yitabiriye igitaramo cya Kigali Jazz Junction, yavuze ko yashimye ibyo Perezida Kagame amaze kugeza ku Rwanda ndetse ko yifuza kuzaganira nawe.

Uyu muhanzi yabivugiye mu kiganiro yagiranye n’itangazamakuru kuri uyu wa 29 Ugushyingo 2019 muri Kigali Marriott Hotel, yaraye inabereyemo ibirori byo guhura no gusangira nawe ku bafana babyifuzaga.

Jidenna yavuze kuza kuririmbira mu Rwanda ari inzozi yahoranye kuva kera none akaba yanazikabije zikaba impamo.

Ati “Ni ibyishimo kandi ni ishema kuba ndi hano. Kuba ndi hano ni inzozi nari maranye igihe kinini, maze igihe kinini ndeba u Rwanda ndetse n’iterambere rumaze kugeraho ni ikintu njye nigiraho byinshi, Afurika nayo bikaba uko ndetse no ku banyafurika baba hanze yayo.”

Yakomeje avuga ko yishimira uko u Rwanda ari igihugu cyahaye intebe abagore ubu mu Nteko Ishinga Amategeko Umutwe w’abadepite no muri Guverinoma umubare wabo ukaba uri hejuru y’uw’abagabo ibintu yavuze ko na Leta Zunze Ubumwe za Amerika zitarageraho.

Ati “Ndashaka guha ubutumwa Perezida wa Repubulika y’u Rwanda Paul Kagame, nshaka kuvuga ko bizaba ari iby’iby’agaciro kuri njye guhura nawe tukaganira twenyine kuko numva twaganira ku ngamba yagiye akoresha mu kugeza u Rwanda ku iterambere rwagezeho uyu munsi, ni ikintu ku giti cyanjye nshaka kumenya uko nkatwe tuba hanze y’ibihugu twatanga umusanzu ngo bikomeze bitere imbere kandi amahoro akomeze gusagamba.”

Mu Ukwakira uyu mwaka Jidenna yifashishije Twitter yashimye byimazeyo uruhare rw’u Rwanda mu kuzamura ikoranabuhanga muri Afurika avuga ko ari ishema kuba aricyo gihugu cya mbere kuri uyu mugabane cyatangiye gukorerwamo telefoni zigezweho.

Yabivuze nyuma yaho ku wa 7 Ukwakira 2019, Perezida Paul Kagame yari yafunguye ku mugaragaro uruganda rwa Mara Phones, rwa mbere muri Afurika rukora telefoni zigezweho za smartphones, rwitezweho kuzamura uburyo Abanyarwanda babyaza umusaruro ikoranabuhanga rya telefoni ngendanwa.

Igitaramo Jidenna yatumiwemo biteganyijwe ko kibera muri Kigali Conference and Exhibition Village hazwi nka Camp Kigali kuri uyu wa Gatanu.

Uyu muhanzi aragihuriramo na Bruce Melodie uri mu bakunzwe mu Rwanda no mu Karere, Neptunez Band mu gihe imiziki izavangwa na Neptunez Djs na Dj Marnaud.

Kwinjira muri iki gitaramo ku bagurira amatike ku muryango ni 15 000 Frw, 25 000 Frw, 30 000 Frw na 240 000 Frw ku meza y’abantu umunani naho abayagura mbere ni 10 000 Frw na 20 000 Frw gusa kuko ayo muri VIP na VVIP yamaze gushira.

Jidenna w’imyaka 34 azwi mu ndirimbo zitandukanye zakunzwe na benshi zirimo ‘Particula’ ya Major Lazer & DJ Maphorisa bafatanyije na Nasty C, Ice Prince na Patoranking, ‘Classic Man’ yahuriyemo na Roman GianArthur, ‘Yoga’ ye na Janelle Monáe n’izindi.

Uyu musore w’Umunyamerika afite inkomoko muri Nigeria. Yavukiye muri Leta ya Wisconsin muri Amerika, nyuma arererwa igihe gito muri Nigeria aho se w’umuzungu yakoreraga akazi ko kwigisha ibijyanye na mudasobwa muri Enugu State University.

Ubwo yari afite imyaka itandatu umuryango we wasubiye muri Amerika mu 1995 bajya kuba mu Mujyi wa Norwood muri Leta ya Massachusetts, mu 2000 bajya mu Mujyi wa Milton. Kugeza n’uyu munsi aba muri Amerika.

Aherutse gushyira hanze indirimbo nshya yise ‘Sufi Woman’ iri kuri album yise ‘85 to Africa’ yanaje kumenyekanisha mu Rwanda. Iyi ndirimbo ye igaragaramo umunyamideli ukomoka mu Rwanda witwa Uwanyuze Lilian.

Mu muziki we yibanda ku njyana za Hip hop na Afrobeat akaba ari umuririmbyi, umwanditsi w’indirimbo ndetse n’uzitunganya. Yagiye akorana n’abahanzi batandukanye barimo Janelle Monáe babanye muri label ya Wondaland, Kendrick Lamar, Issa Rae, Imohimi, Unuigbe n’abandi bakomeye.

Reba Bambi, imwe mu ndirimbo za Jidenna zakunzwe

Jidenna ni uku yari yambaye ubwo yajyaga mu kiganiro n'abanyamakuru
Jidenna ni ubwa mbere agiye gutaramira mu Rwanda
Bruce Melodie wari uri muri iki kiganiro cya Jidenna n'abanyamakuru yavuze ko yiteguye gushimisha abafana be
Umuyobozi Mukuru w'ishami ry'uruganda rukora imodoka rwa Volkswagen mu Rwanda, Michaella Rugwizangoga, yavuze ko mu gitaramo cya Jidenna haraba hari uburyo bwo gutwara abantu bworoshye
Samputu Patrick uri mu bayobozi ba Bralirwa iri mu baterankunga b'igitaramo
Jidenna yahawe igishushanyo cye yambaye bya Kinyarwanda

Amafoto: Uwihanganye Hardi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza