Jay-Z yagurishije muri LVMH imigabane ya sosiyete ye ikora Champagne

Yanditswe na Uwiduhaye Theos
Kuya 23 Gashyantare 2021 saa 03:15
Yasuwe :
0 0

Umuraperi Shawn Corey Carter wamamaye nka Jay-Z yagurishije imigabane ingana na 50% ya champagne ye izwi nka Armand de Brignac.

Uyu mugabo yagurishije iyi migabane muri LVMH Moët Hennessy Louis Vuitton sosiyete izwiho gukora ibintu bitandukanye birimo ibijyanye n’ibinyobwa byihagazeho nka Champagne, imideli n’ibindi.

Jay-Z yari asanzwe afite imigabane ingana na 100% muri Armand de Brignac. Ni champagne izwi na none nka Ace of Spades iza mu icupa risa na zahabu. Icupa rimwe kugira ngo rikorwe, bitwara amadolari 13 ariko iyo ryageze ku isoko rihagarara agera kuri 300. Iyo sosiyete yari isanzwe ifite agaciro kabarirwa muri miliyoni 310 z’amadolari.

Jay-Z yabwiye CNBC ko yatangiye uburyo bwo kuganira uko yazakorana na LVMH mu 2019, bikaba bibaye ngombwa ko bashyira hanze ko bamaze kugira imikoranire muri uyu mwaka wa 2021. Ntabwo ibijyanye n’amasezerano birambuye byigeze bitangazwa.

Umuyobozi mukuru wa LVMH Moët Hennessy, Philippe Schaus, we yabwiye iki gitangazamakuru ko champagne ya Armand de Brignac igiye kubazanira abakiliya bashya mu bijyanye n’ibinyobwa bimeze nkayo.

Ati “Icyo tuzashyiramo imbaraga kuri Armand de Brignac, n’ubundi isanzwe ikunzwe kandi yarageze kure, ni ugushyira imbaraga mu ikwirakwizwa ryayo ku miyoboro mpuzamahanga yacu.”

Armand de Brignac isanzwe izwi nka “Ace of Spades” mu 2019 yagurishijwe amacupa arenga 500 000 gusa icyorezo cya Coronavirus cyahungabanyije igurishwa ry’iyi champagne kubera ko ibirori bihuza abantu benshi byagabanyutse cyane cyane muri Amerika. Mu 2020 igurishwa rya Armand de Brignac ryagabanyutseho 18% ugereranyije na 2019.

LVMH muri Mutarama uyu mwaka nayo yavuze ko igurishwa rya champagne zayo ryagabanyutseho 19 % mu 2020 ugereranyije na 2019. LVMH isanzwe ifite izindi champagne zirimo Dom Pérignon, Moët & Chandon n’izindi nzoga zihenze zirimo na Hennessy.

Jay-Z ari mu baraperi bakomeye bafite ubushabitsi butandukanye.
Uyu muraperi mu 2008 yatangije Roc Nation, ni imwe muri Sosiyete zikomeye ku Isi mu bijyanye n’imikino n’imyidagaduro. Mu 2013 yafunguye Roc Nation Sports iyishamikiyeho, yo ireberera inyungu abakinnyi b’imikino itandukanye bakomeye ku Isi.

Jay-Z ari mu baraperi bake ku Isi bafite umutungo ubarirwa muri miliyari imwe y’amadorali ya Amerika, agahigo ahuriyeho na Kanye West. Amaze gutsindira ibihembo birenga 20 bya Grammy Awards.

Mu minsi ishize Roc Nation ya Jay-Z ku bufatanye na Long Island University (LIU) iherereye i Brooklyn mu Mujyi wa New York, batangaje ko bagiye gutangiza ishuri ryigisha umuziki.

Ku bufatanye na Sosiyete yitwa Caliva, uyu muraperi yatangiye ubucuruzi bw’ako ku mugongo w’ingona’. Yafunguye umuyoboro wiswe Monogram, ku rubuga rwa Caliva azajya acururizaho ubwoko butandukanye bw’urumogi rutunganyijwe neza ruri mu bwoko bune.

Uru rumogi rwa Jay-Z ruzajya rugurishwa hagati y’amadorali 40 na 70 kuri buri gapfunyika bitewe n’urwo umuguzi ashaka cyangwa se n’ubushobozi afite. Yifashishije Roc Nation, Jay-Z muri ubu bucuruzi azajya afatanya na sosiyete ya The Parent Co. nk’umufatanyabikorwa.

Jay-Z yamaze kugurisha imigabane ingana na 50% muri Armand de Brignac
Jay-Z ni umwe mu bahanzi bakomeye ku Isi binjiye mu bucuruzi bw'ibintu bitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .