00:00:00 IGIHE NETWORK KN KINYARWANDA EN ENGLISH FR FRANCAIS

Jay Polly utaragezwa i Mageragere yajuriye

Yanditswe na Nsengiyumva Emmy
Kuya 24 Gicurasi 2021 saa 10:53
Yasuwe :
0 0

Nyuma y’uko Urukiko rw’Ibanze rwa Nyarugenge rukatiye Jay Polly n’abo bafunganywe gufungwa iminsi 30 y’agateganyo, uyu muhanzi na bagenzi be batatu bakurikiranyweho icyaha cyo gukoresha ibiyobyabwenge, bajuriye.

Jay Polly areganwa na murumuna we Iyamuremye Jean Clément, Shemusa Mutabonwa na Hatunga Fidèle Benedicto uvuga ko ari Umunyamerika ukomoka muri Tanzania.

Ku wa 20 Gicurasi 2021, ni bwo Urukiko rw’Ibanze rwa Nyarugenge rwakatiye abaregwa gufungwa iminsi 30 y’agateganyo.

Nyuma yo gukatirwa, abaregwa bagombaga guhita bajyanwa muri Gereza ya Nyarugenge. Bitewe n’icyorezo cya Covid-19, ntabwo abari bakatiwe bahise bamanurwa i Mageragere kugeza ubwo bajuririye Urukiko.

Ubusanzwe mbere yo kujyanwa muri gereza, imfungwa zibanza gupimwa Coronavirus harebwa ko ari bazima mu kwirinda ko bakwanduza abandi muri gereza.

Nyuma yo kujuririra Urukiko rwisumbuye rwa Gasabo, byitezwe ko abaregwa bazasubira imbere y’ubutabera ku wa Kane tariki 27 Gicurasi 2021.

Ubushinjacyaha bwari bwasabiye abaregwa gufungwa by’agateganyo kugira ngo igihe ubutabera buzajya bubashakira bujye bubabona, ariko kandi kubafunga bikaba n’uburyo bwo kubafasha kuba baretse ibiyobyabwenge.

Jay Polly n’itsinda ry’abantu 11 batawe muri yombi tariki 23 Mata 2021 bakurikiranyweho kwica amabwiriza yo kwirinda Covid-19.

Tariki 25 Mata dosiye y’abaregwa yashyikirijwe Ubugenzacyaha bwahise bubapimisha ibiyobyabwenge kugira ngo harebwe niba ibyafatiwe mu rugo kwa Jay Polly aribo babinyweye.

Nyuma ya raporo ya muganga yagaragaje ko bane bafite ibiyobyabwenge mu maraso, bahise batangira gukurikiranwa mu Bushinjacyaha ndetse dosiye yabo inaregerwa urukiko.

Jay Polly n'abo bareganwa bajuririye icyemezo cy'Urukiko rw'Ibanze rwa Nyarugenge
Nyuma yo gukatirwa iminsi 30 y'agateganyo, Jay Polly n'abo bareganwa bahise bajurira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .