Kwamamaza

Jay Polly na Ama G bamuritse album muri Petit Stade yambaye ubusa (Amafoto)

Yanditswe kuya 27-08-2016 saa 09:15' na Munyengabe Murungi Sabin


Umuraperi Ama G The Black na mugenzi we Jay Polly bashyize hanze album y’indirimbo cumi n’imwe bahuriyemo mu gitaramo cyabereye kuri Petit Stade mu ijoro ryo kuri uyu wa 26 Kanama 2016.

Igitaramo cyo kumurika album ‘Ubuzima bwanjye’ ya Jay Polly na Ama-G The Black cyabereye i Remera kuri Stade Ntoya. Ni igitaramo cyitabiriwe n’abafana batarenga ijana biganjemo urubyiruko ruri hagati y’imyaka itanu na makumyabiri.

Ntibyari bimenyerewe ko Jay Polly na Ama G The Black bakorana imishinga y’indirimbo kugeza ubwo banoza umugambi wo gukora album yuzuye bafatanyije bakayishyira hanze nk’igihangano cya bombi.

Mu myaka yatambutse, Jay Polly na Ama G ntibari abanzi, ariko na none ntibari inshuti zashoboraga kwicara hamwe zikajya umugambi mu buryo bwo kwiteza imbere. Ku mpande zombi wasangaga buri wese yiyita umwami wa Hip Hop ubundi bakabana mu buryo busa no gucungana buri wese aharanira gukora indirimbo izakundwa kurusha iya mukeba.

Aba bahanzi bari batumiye bagenzi babo bagombaga kubafasha kuririmba barimo Urban Boyz, Riderman, Bruce Melody, King James, Charly&Nina, Dj Pius, Christopher, Mani Marytin, Active, Buravan, Theo Bosebabireba, Uncle Austin, Oda Paccy, Tuff Gang n’abandi batandukanye.

Muri aba bose batumiwe nta n’umwe waririmbye ndetse n’ababarirwa ku ntoki bahageze bahise bitahira ‘ahanini bacibwaga intege n’ubwitabire bwari ku kigero cyo hasi’. Uncle Austin na Active bahagaze mu masaha ya saa moya bategereza ko abafana baza baraheba kugeza ubwo bitahiye; Riderman na we yari ahari ndetse ategereza abafana bakomeza kuba iyanga na we ataha atyo.

Bruce Melody yahageze ahagana saa yine z’ijoro yitegereza uko byari byifashe muri Petit Stade ataha nta we abajije.

Haje abafana bagera ku ijana

Igitaramo cyari giteganyijwe gutangira saa kumi n’ebyiri z’umugoroba kikarangira saa yine. Cyatangiye bitinze cyane, Jay Polly na Ama-G bageze imbere y’abafana saa tatu n’iminota 40 z’ijoro baririmba kugeza saa yine n’igice kirangira gutyo.

Nta wundi muhanzi wakandagiye ku rubyiniro muri bake bahageze. Jay Polly na Ama G baririmbye mu gihe kigeza ku minota 50, bari kumwe n’abahanzi bakizamuka barimo uwitwa U Sam n’abandi Jay Polly ari gutoza muri Tuff Gang nshya.

Imbere ya Jay Polly na Ama-G abafana bari bake

Igitaramo cy’aba baraperi cyitabiriwe n’umubare muto cyane ugereranyije n’abantu Petit Stade yakira[ubusanzwe iyo yuzuye yakira abantu 3,000]. Abaje kureba Jay Polly na Ama-G ntibarengaga ijana ndetse bose binjiriye ubuntu.

Jay Polly yemeye ko byagenze nabi

Nyuma y’igitaramo, mu mvugo yumvikanamo ibyishimo bike Jay Polly yabwiye IGIHE ko igitaramo cye cyagenze nabi ndetse ko ‘bimusigiye isomo’ gusa avuga yishimiye bake baje.

Yagize ati “Ndavuga ko bitagenze neza ijana ku ijana ariko hari ibyabaye, ni byiza, ibi byerekana isomo.”

Ama-G yabajijwe impamvu abahanzi bose batumiwe batitabiriye asubiza ati “Ndamenya impamvu bataje nimbabaza bose mu gitondo, ubu ndatashye, ejo nzabahamagara mbababaze nti ‘abasaza kuki mutaje byagenze gute?’, baraza kunyokesha[kumbwira] uko byagenze tu…”

Bitandukanye na Jay Polly, Ama-G yavuze ko yanyuzwe cyane n’uko igitaramo cyagenze. Ati “Igitaramo njye nacyishimiye cyane, iyo tutaririmba cyangwa igitaramo ntikibe, ubwo murakeka ko twari gukira itangazamakuru? Namwe nimunsubize.”

Mbere yo gukora iki gitaramo Jay Polly na Ama-G ntibigeze bacyamamaza haba ku byapa no mu itangazamakuru nk’uko bisanzwe bigenda mu Rwanda. Iki gitaramo kandi cyabanjirijwe n’amakimbirane no gushwana gukomeye aba bombi bagiranye n’uwari manager wabo.

Petit Stade yari irimo abafana wabasha kubara
Ubusanzwe uru ruhande iyo rwuzuye rwakira abantu 1000
Uruhande rwo hakurya ni gutya byari bimeze
Igitaramo cyatangiye abafana bamaze kwiyongera
Jay Polly na Ama-G bamuritse album bise 'Ubuzima bwanjye'
Ama G The Black yaririmbaga iyitwa 'Imyoto'
Jay Polly na Ama-G hano baririmbaga mu buryo bwa playback iyitwa 'Ziada'
Umugore wa Jay Polly, Uwimbabazi Shalifah yari yicaye imbere
Ntiyashakaga ko hagira umufotora mu maso
Yifashishaga byeri kugira ngo agire imbaraga zo kwizihirwa n'igitaramo
Jay Polly n'abahanzi bashya yashyize muri Tuff Gang ye
Abafana bari biganjemo abakibyiruka
Hano Jay Polly yari amaze guhamagara abafana ngo baze imbere abahe CD
Mu myanya y'icyubahiro aba ni bo bari bayicayemo
Igitaramo kirangiye Jay Polly yafashe umugore we barataha
Jay Polly na Uwimbabazi Shalifah bavuye kuri Petit Stade n'amaguru berekeza kure aho bari basize imodoka
Abanyamakuru basigaranye Ama-G bamuhata ibibazo
Album bashyize hanze igizwe n'indirimbo bahuriyemo bombi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved