00:00:00 IGIHE NETWORK KN KINYARWANDA EN ENGLISH FR FRANCAIS

Itsinda rya Mackenzies ryamuritse imideli mishya (Amafoto)

Yanditswe na Nsengiyumva Emmy
Kuya 1 Gicurasi 2021 saa 09:00
Yasuwe :
0 0

Itsinda ry’abakobwa batanu aribo Nishimwe Naomie, Uwineza Kelly, Uwase Kathia, Iradukunda Brenda na Uwase Pamela Loana rizwi nka "Mackenzies" ryamuritse imideli mishya.

Aba bakobwa kuri uyu wa Gatandatu, tariki 1 Gicurasi 2021, bamuritse icyiciro cya kabiri cy’imyenda bashyize ku isoko. Mu Ukwakira 2020, ni bwo batangiye ubucuruzi bw’imyenda.

Iyi myambaro ubusanzwe icururizwa mu Iduka rya Zöi Design Kigali, yamurikiwe mu Ubumwe Grande Hotel.

Uwase Kathia uri mu bagize itsinda rya Mackenzies yavuze ko iki gikorwa bakigize nyuma yo gutekereza agashya bazana mu mikorere yabo bakegereza imyenda yabo abakiliya.

Ati “Twatekereje ibi birori mu rwego rwo guhanga udushya tunyuranye twegera abakiliya bacu no kumurika imyambaro yacu mishya.”

Uyu mukobwa yavuze ko ubwo batangiraga ubucuruzi bwabo batakekaga ko abantu bazabikunda nkuko biri uyu munsi.

Yakomeje ati “No kuba turi hano ni urukundo batweretse bagura ibintu byacu ku bwinshi.”

Mu gihe ibirori byaba bifunguye, itsinda rya Mackenzies ryiteguye no kuzajya rikora ibirori byo kumurika imyambaro yabo.

Uwineza Kelly yabwiye IGIHE ko mu gihe bamaze bakora, babonye ko nta kintu cyoroha mu bucuruzi kandi bisaba kwihangana cyane.

Uyu mukobwa yavuze ko ubucuruzi bwabo bumaze kwaguka ku buryo bamaze kugira icyizere ko imbere h’ubucuruzi bwabo ari heza.

Aba bakobwa bagiriye inama urubyiruko yo kwitinyuka bakihangira imirimo, ariko bakirinda kubijyamo bafite uwo bigana.

Mackenzies ni itsinda ry’abakobwa batanu barimo Nishimwe Naomie wabaye Nyampinga w’u Rwanda mu 2020, Uwineza Kelly, Uwase Kathia, Iradukunda Brenda na Uwase Pamela Loana.

Batatu muri bo (Nishimwe Naomie, Uwase Kethia na Iradukunda Brenda) baravukana mu nda imwe mu gihe Uwineza Kelly ari nyirasenge w’aba bakobwa kuko avukana na se ubabyara mu gihe Uwase Pamela Loana ari mubyara wabo.

Aba bakobwa bamenyekanye cyane mu 2018 ubwo bifataga amashusho bari kuririmba indirimbo ya Mr Eazy wo muri Nigeria, barayamwoherereza na we ayashyira ku mbuga nkoranyambaga abantu barayakunda cyane.

Nyuma benshi mu bakora ubucuruzi mu Rwanda batangiye kubiyambaza mu buryo bwo kwamamaza ibikorwa byabo. Byavuye ku rwego rwo kwishimisha bisanga bakorana na sosiyete zikomeye mu Rwanda nka MTN n’ibindi bigo by’ubucuruzi.

Nyuma y’igihe bamamaza ibikorwa by’abandi, abagize itsinda rya Mackenzies biyemeje gutangira ubucuruzi bw’imyenda.

Uwase Kethia wo mu Itsinda rya Mackenzies ubwo ryamurikaga icyiciro cya kabiri cy'imideli yabo
Muri Zöi Design Kigali usibye imyenda batangiye gucuruza n'inkweto
Muri Mackenzies ntibacuruza gusa imyenda y'abagore, mu yo bamuritse harimo n'iy'abagabo
Imideli yo Mackenzies ishobora no kudodwa hagendewe ku byifuzo by'umuguzi
Zöi Design Kigali ya Mackenzies yamuritse imideli mishya ibereye ijisho
Usibye imyenda, Mackenzies yanamuritse n'imirimbo itandukanye

Amafoto: Igiribuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .