Itorero Inyamibwa ryaserukiye Afurika mu iserukiramuco rikomeye ku Isi (Amafoto)

Yanditswe na Munyengabe Murungi Sabin
Kuya 13 Kamena 2018 saa 09:20
Yasuwe :
1 0

Abahanzi n’ababyinnyi bagize Itorero Inyamibwa ryo mu Rwanda berekeje mu Burayi kwitabira iserukiramuco mpuzamahanga rya Festivals du Sud rizamara hafi amezi atatu.

Itorero Inyamibwa ryahagurutse i Kigali ku mugoroba wo kuri uyu wa Kabiri tariki ya 12 Kamena 2018, ryerekeje i Burayi aho rigomba guhagararira Umugabane wa Afurika mu iserukiramuco Festivals du Sud, niryo ryonyine ryatoranyijwe kuri uyu mugabane.

Iserukiramuco Festivals du Sud riba uko umwaka utashye, ubu rihurije hamwe amatorero n’amatsinda y’abahanzi baturuka mu bihugu cumi na bibiri birimo Serbie, u Burusiya, Mongolie, Mexique, Kazakhstan, Irlande, Indonesie, El Salvador, Chypre du Nord, Chili, Argentine n’u Rwanda.

Mu kiganiro IGIHE yagiranye na Rusagara Rodrigue, umwe mu bayobozi b’Itorero Inyamibwa yavuze ko bajyanye umugambi wo guhagararira igihugu neza no kugihesha ishema mu ruhererekane rw’ibitaramo bazakorera mu Burayi.

Yagize ati “Iri serukiramuco rihuza ibihugu bikomeye ku Isi, buri mwaka rigira umwihariko bitewe n’uburyo baba batumiye abantu. Kuri iyi nshuro batumiyemo n’u Rwanda, ni rwo ruhagarariye Afurika, turi mu bihugu 12 ku Isi.”

Festivals du Sud, ni rimwe mu maserukiramuco mpuzamahanga afite umwihariko; ryo rihuriza hamwe andi maserukiramuco 54 yo mu bihugu bitandukanye. Ubu, rizabera mu bihugu birimo Espagne, u Bubiligi n’u Bufaransa mu duce dutandukanye.

Rusagara Rodrigue yakomeje avuga ko aho Itorero Inyamibwa rizataramira hose rizerekana umwihariko udasanzwe w’umuco nyarwanda ndetse bakaba bajyanye umugambi wo kuzatahana igihembo mu bizatangwamo.

Ati “Icya mbere ni uko dutwaye ibendera ry’igihugu cyacu, ibyo biraduha imbaraga zo kwitoza no gukora neza. Ikindi ntavuze ni uko bahemba itorero ryabaye irya mbere, intego yacu tujyanye ni ukuba aba mbere, tugiye twizeye neza nk’ibisanzwe kwerekana imbyino nyarwanda twizeye ko zizahiga izindi muri iyi festival yose.”

Inyamibwa zijyanye icyizere cyo kuzatahana igihembo mu bizatangwa muri Festivals du Sud

Iri serukiramuco rizatangira ku itariki ya 14 Kamena 2018 rizasozwe ku wa 27 Kanama 2018.

Itorero Inyamibwa ryahagurukanye abahanzi n’ababyinnyi 25 mu gihe itorero ryose hamwe rigizwe n’abarenga 60. Ubuyobozi bwatangaje ko bahisemo kohereza bake kugira ngo bigabanye imirimo kuko abasigaye bazakora ibitaramo bafite mu Rwanda.

Inyamibwa zigizwe n’abanyamuryango basaga 60, ijanisha rinini [hafi 99%] ni abarangije amasomo ya Kaminuza. Iri torero ryashingiwe mu yahoze ari Kaminuza Nkuru y’u Rwanda i Butare mu 1998.

Aba ni bamwe mu bagize Itorero Inyamibwa ryagiye mu Burayi
Inyamibwa ni ryo ryatoranyijwe muri Afurika yose
Umwe mu babyinnyi bagize itorero Inyamibwa
Aba ni bamwe mu bagize Inyamibwa baherekeje bagenzi babo bagiye i Burayi
Mu bihugu 12 byatumiwe uyu mwaka harimo n'u Rwanda

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza