Itariki y’ubukwe bwa Umutare Gaby wamaze gusezerana mu ibanga imbere y’amategeko

Yanditswe na Munyengabe Murungi Sabin
Kuya 20 Mata 2017 saa 09:29
Yasuwe :
0 0

Umutare Gaby, umwe mu bahanzi bamaze igihe bakunzwe mu Rwanda agiye kurongora umukobwa uba muri Australia ari naho bazahita bajya gutura nibamara gukora ubukwe.

Umutare Gaby yamenyekanye mu ndirimbo ’Mesa Kamwe’ yigaruriye imitima ya benshi, akomereza ku yitwa ’Ayo Bavuga’, ’Ntunkangure’ yakunzwe cyane, ’Urangora’, ’Ntawundi’ n’izindi. Yaherukaga gusohora iyitwa ’True Love’ itarakorerwa amashusho.

Uyu muhanzi agiye kurushingana n’Umunyarwandakazi witwa Joyce Nzere uba muri Australia ari naho bazajya gutura nyuma y’ubukwe bwabo buzaba kuwa 16 Nyakanga 2017.

Urupapuro rw’ubutumire rw’ubukwe bwa Umutare Gaby na Joyce Nzere rugaragaza ko bazasezerana imbere y’Imana kuwa 16 Nyakanga saa saba z’amanywa ndetse bagaragaza ko imihango yo guhamya isezerano ryabo no kwiyakira izabera muri Black&White Kiberinka Hotel iri i Kibagabaga.

Ubukwe bwa Umutare Gaby na Joyce Nzere bwateguwe mu ibanga rikomeye kuva hagati mu mwaka ushize ndetse IGIHE ifite amakuru ahamya ko mu mpera za 2016 aba bombi bagiye mu Karere Karongi basezerana imbere y’amategeko mu buryo bw’ibanga.

Kuva ubukwe bwatangira gutegurwa ngo Umutare Gaby yahise ahagarika gahunda z’umuziki ndetse ashobora kuzabivamo mu buryo bwa burundu akita ku muryango mushya yitegura gushinga.

Umutare Gaby [ubusanzwe witwa Nikuze Gabriel] yavutse kuwa wa 5 Gicurasi 1990, ni umwe mu baririmbyi bamenyekanye mu myaka itatu ishize [kuko yatangiye kuririmba ku giti cye muri 2014] bakagaragaza imbaraga mu buryo bwihariye.

Mbere y’uko ubutumire busohoka, Umutare Gaby ntiyigeze yemera na rimwe ko ari yitegura kurushinga ndetse mu kiganiro aheruka kugirana na IGIHE yagaramye aya makuru avuga ko kuba atakigaragara mu muziki ari uko afite indi mishinga ahugiyemo.

Yagize ati "Mfite ibindi bintu ndimo byanjye bwite, ndimo nkora [...] Umuziki nabaye nywushyize ku ruhande kugira ngo mbanze nkemure ibyo ngibyo bindi."

Umutare Gaby yize ibyerekeye mudasobwa muri kaminuza mu gihe umukunzi we Joyce Nzere we yiga muri Australia muri Kaminuza ya Canberra.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244