Isimbi Noeline yeruye avuga ku mwuga wo gukina “Pornographie” yayobotse (Video)

Yanditswe na Nsengiyumva Emmy
Kuya 30 Mutarama 2021 saa 05:25
Yasuwe :
0 0

Ntacyo ifaranga ritakoresha umuntu burya koko! Niryo ryatumye Yuda yikora akiyemeza kugambanira umwana w’Imana, gusa biza kurangira rimuhagamye ariyahura. Ubu Isi tugezemo, ifaranga ni “musemakweli”, uwo ritishe riramukiza. Abantu biyemeje kurishaka amanywa n’ijoro, hasi kubura hejuru, kugeza n’aho bashyira icyubahiro cyabo ku karubanda.

Isimbi Yvonne usigaye wiyita Noeline, yiyemeje guhiga ifaranga ku ngufu, maze ayoboka ibijyanye na filimi z’imibonano mpuzabitsina zizwi nka “Pornographie”.

Uyu mukobwa yaciye igikuba mu Rwanda, cyane ko niba atari we wa mbere ari mu ba mbere beruye bagashyira amashusho y’imyanya y’ibanga yabo ku karubanda bagamije gushaka amaramuko.

Isimbi wigeze kwitabira ijonjora ry’ibanze rya Miss Rwanda mu 2019, yemereye IGIHE ko amaze umwaka urenga akina ‘Pornographie’.

Uyu mukobwa muri iki gihe ari kubarizwa muri Nigeria mu Mujyi wa Lagos, aho akorera akazi ko kubyina mu tubyiniro tw’abakire ibyo benshi bita Ikimansuro.

Ati “Naje inaha umwaka ushize nje kubyina mu kabyiniro kaho, akazi mfatanya no gukora amashusho ncuruza ku bantu bakuze, nabyo bikanyinjiriza.”

Ukena ufite itungo...

Isimbi yabwiye IGIHE ko ubwo Covid-19 yadukaga, yatangiye gupfunda imitwe hirya no hino ashaka icyamubeshaho, biza kurangira yigiriye inama yo gucuruza amashusho n’amafoto ye yambaye ubusa.

Uyu mukobwa avuga ko amashusho abantu babona ku mbuga nkoranyambaga ari uduce duto twamamaza ayo acuruza.
Usibye gucuruza ku mbuga nkoranyambaga amashusho n’amafoto, Isimbi yavuze ko nta murimo n’umwe atakora mu gihe waba umwinjiriza amafaranga.

Ati “Navuga ko wenda nkora ‘Pornographie’ zoroheje, mbikora njye nyine nta muntu tuba turi kumwe, mfata amashusho yanjye nkayashyira ku mbuga zitandukanye abantu bakaza kuzireba bishyuye nkabona amafaranga yanjye.”

Uyu mukobwa avuga ko gucuruza aya mashusho atari ibintu ateganya gukora by’ubuziraherezo, ahubwo ko nyuma y’umwaka umwe azabivamo amafaranga akuyemo akayashora mu bundi bucuruzi.

Ati “Nateganyije uyu mwaka, nurangira nzareba inyungu nkuyemo hanyuma ndebe niba nayashora mu bindi byazanyungukira kurushaho.”

Abareba amashusho ye baba basabwa kwishyura ibihumbi biri hagati ya 12 Frw na 15 Frw ku kwezi.

Nta muntu wo mu muryango we uragira icyo amubwira ku byo akora

Uyu mukobwa wemeje ko afite ababyeyi bose n’abavandimwe babiri bavukana, yahishuye ko nta muntu n’umwe wo mu muryango atinya ku buryo yagira icyo amubaza ku mashusho akunze gushyira hanze yambaye ubusa.

Ati “Inshuti zo ntazo ngira, abo mu muryango bo ntekereza ko babibona ariko nta cyo bambwira, musaza wanjye niwe wenyine tuganira cyane ariko barabizi nta n’umwe wambwira ubusa.”

Isimbi ahamya ko nubwo hari benshi bamucira urubanza, nta cyo biba bimubwiye mu gihe aba yakoreye amafaranga kandi akaba azi neza ko ariyo ayoboye Isi.
Uyu mukobwa yakomeje avuga ko yagiye gukora ubu bushabitsi azi neza ko ibyo ari gukora atitaye ku bijyanye n’amategeko abuza gukwirakwiza amashusho y’urukozasoni.

Ati “Iryo tegeko niba rihari rikaba rihana abakina Pornographie, nkagaruka mu Rwanda bakamfata hazakurikizwa amategeko.”

Isimbi Noeline ari hafi kuzuza 22, yavukiye mu Karere ka Rwamagana mu Ntara y’Iburasirazuba.

Yigeze kuvuga ko afite imyaka itanu yari mayibobo ku mihanda yo mu Mujyi wa Kigali, aza kuhava ajyanywe mu kigo cy’inzererezi i Musanze. Iki kigo yakivuyemo afite imyaka 14 asubira i Rwamagana kubana na Se.

Ngo nyuma y’umwaka umwe yaje kwerekeza muri Uganda, ahava ajya muri Kenya.

Bitewe n’uko atari afite ibyangombwa kandi ari umwana muto, mu buhamya bwe yigeze gutanga mu 2019 yavuze ko yatawe muri yombi amezi icyenda mbere y’uko yoherezwa mu Rwanda.

Agarutse mu Rwanda ngo yashuguritse ibyangombwa ari naho yahinduriye amazina nyuma aza gusubira muri Kenya.

Aha yahabaye imyaka itatu mbere y’uko mu 2017 ajya muri Afurika y’Epfo, ahava asubira muri Kenya.

Muri Kenya uyu mukobwa yongeye kuhava mu 2018 asubira muri Afurika y’Epfo, mbere y’uko muri 2019 agaruka mu Rwanda ari nabwo yiyamamarizaga kwegukana ikamba rya Miss Rwanda.

Ikiganiro na Isimbi Noeline

Isimbi ahamya ko amashusho ye atavugwaho rumwe ari 'Pornographie' ariko zoroheje
Isimbi yitabiriye irushanwa rya Miss Rwanda mu 2019 gusa ntiyahirwa
Uyu mukobwa avuga ko iyo yegukana ikamba bitari kumubuza gukora ibyo ashaka
Amashusho ya Isimbi ntakunze kuvugwaho rumwe ku mbuga nkoranyambaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .