00:00:00 IGIHE NETWORK KN KINYARWANDA EN ENGLISH FR FRANCAIS

Ish Kevin, Dj Brianne n’abandi bane batawe muri yombi

Yanditswe na Nsengiyumva Emmy
Kuya 26 Kamena 2021 saa 05:45
Yasuwe :
0 0

Umuraperi Semana Kevin benshi bazi nka Ish Kevin yatawe muri yombi ari kumwe n’itsinda ry’abantu batanu barimo na DJ Brianne bose bakekwaho gukoresha ibiyobyabwenge byo mu bwoko bw’urumogi.

Umuvugizi w’Urwego rw’Igihugu rw’Ubugenzacyaha (RIB), Dr. Murangira B. Thierry, yabwiye IGIHE ko aya makuru ari impamo.

Ati “Tariki ya 25 Kamena 2021, RIB yafunze abantu batandatu barimo Mugisha Patrick, Semana Kevin ari we Ish Kevin, Munyanshoza Celine, Umulisa Benitha, Nziza Olga na Byukusenge Esther Brianna.”

Aba bose bakurikiranyweho icyaha cyo gukoresha ikiyobyabwenge cyo mu bwoko bw’urumogi. Bafatiwe mu rugo banarenze ku mabwiriza yo kwirinda ikwirakwira rya COVID-19.

Dr Murangira yavuze ko iperereza rikomeje kugira ngo dosiye yabo ishyikirizwe Ubushinjacyaha.

Ati “Iperereza rirakomeje kandi bazapimishwa muri Laboratwari y’u Rwanda y’ibimenyetso bya gihanga byifashishwa mu butabera (Rwanda Forensic Laboratory) kugira ngo hagaragare ingano y’ibyo baba banyoye. Ibisubizo ni byo bizerekana uwabinyoye n’utarabinyoye.’’

Abafashwe bafungiye kuri RIB Station ya Gisozi mu gihe iperereza rikomeje kugira ngo hakorwe dosiye ishyikirizwe Ubushinjacyaha.

-  “Abantu ntibakwiye kudohoka ku mabwiriza yo kwirinda COVID-19”

Muri iyi minsi ubwandu bwa Coronavirus bwafashe indi ntera ndetse Inama y’Abaminisitiri yo ku wa 21 Kamena 2021 yakumiriye n’ibirimo ibirori byo mu ngo.

Kuva uwo munsi mu Rwanda hamaze kuboneka abarwayi 4.205 mu minsi itanu, imibare yerekana ubukana bw’iki cyorezo n’ingamba zikwiye gufatwa mu guhangana nacyo.

Ish Kevin na bagenzi be bafashwe barenze ku mabwiriza yo kwirinda Covid-19 bari no kunywa inzoga. Ibirori bari barimo byabereye mu Karere ka Gasabo, Umurenge wa Gisozi, Akagari ka Musezero, Umudugudu wa Gasave.

Dr Murangira yavuze ko kurenga ku mabwiriza ya COVID-19 bidakwiye muri iki gihe, igihugu gihanganye nayo.

Ati “Niba tugize imibare myinshi, abantu bakwiye kumva ko ari ingenzi kubahiriza amabwiriza. Iyo bikozwe n’abantu b’ibyamamare, bafatwa nk’ibyitegererezo n’urubyiruko ni bibi cyane, biba bigayitse kuko bayobya benshi. Ibyamamare bigomba kwirinda gukoresha ibiyobyabwenge kuko bibabaje kuba abantu nk’abo aribo basangwa mu byaha nk’ibyo.’’

Abakoresha urumogi bamaze igihe baburirwa ndetse ahanini binyuze muri Rwanda Forensic Laboratory, byaroroshye kumenya niba umuntu yarakoresheje ibiyobyabwenge.

Nibura RFL ifite ubushobozi bwo kumenya ko umuntu yanyweye urumogi nyuma y’iminsi 90 aheruka kurukoresha, icyo gihe ruba rukiboneka mu maraso ye.

Kunywa ibiyobyabwenge ni icyaha gihanwa n’ingingo ya 11 y’itegeko Nº69/2019 ryo ku wa 08/11/2019 rihindura itegeko Nº 68/2018 ryo ku wa 30/08/2018 riteganya ibyaha n’ibihano muri rusange.

Umuvugizi wa RIB yibukije abantu bose ko itazihanganira uwo ari we wese uzafatwa yakoze icyaha nk’iki cyo kunywa ibiyobyabwenge inibutsa abantu ko ari icyaha gihanwa n’amategeko.

DJ Brianne mu batawe muri yombi bishe amabwiriza yo kurwanya Covid-19 banakurikiranyweho gukoresha ibiyobyabwenge
Ish Kevin yahamijwe icyaha cyo gukoresha ibiyobyabwenge, akatirwa umwaka umwe usubitse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .