Irengero rya Producer Jimmy uri mu bakanyujijeho

Yanditswe na Muvunyi Arsène
Kuya 26 Kamena 2019 saa 08:08
Yasuwe :
0 0

Producer Jimmy ni umwe mu batangiye gutunganya indirimbo z’abahanzi batandukanye mu bihe abakomeye kuri ubu bari bakishakisha.

Yakoreye abarimo Riderman indirimbo yitwa “Maritiri”, “Biteye Ubwoba” ya Oda Paccy, “Nkwegukane” ya Umutare Gaby “Ibwiza” ya Eric Mucyo na Jay Polly, indirimbo nyinshi za Just Family, iza Munyenshoza Dieudonné n’izindi.

By’umwihariko yaririmbye igihe gito mu itsinda rya Just Family, ubwo ryari rikirimo Kim Kizito, icyo gihe yari asimbuye Croidja utari uhari.

Izindi ndirimbo zose Jimmy yazikoreye muri studio yitwaga Celebrities Music yari iherereye mu Gatsata mu Mujyi wa Kigali.

Nyuma y’aho yaje gutangiza studio yise Level Nine Records ariko ntiyakomeza kumvikana cyane asohora indirimbo nk’uko byahoze.

Mu kiganiro na IGIHE, Jimmy yasobanuye ko impamvu asa n’uwabuze ari amasomo y’umuziki amaze iminsi yaramutwaye umwanya munini ku buryo bitamworohera gukora indirimbo nyinshi.

Ati “Nari mpugiye mu bintu by’ishuri n’akazi ka buri munsi. Nari ndi kwihugura kuko natangiye nkora mu buryo bwo kwirwanaho, igihe cyaje kugera nsa nk’ugabanya umuvuduko kugira ngo nige neza nkore ibintu byiza.”

Jimmy yiga amasomo y’iyakure atangwa mu gihe cy’imyaka ibiri, we akaba azayarangiza mu ntangiriro z’umwaka wa 2020.

Jimmy wimuriye studio ye muri label ya Culture Empire y’umuhanzi Marchal Ujeku, avuga ko ikindi cyatumye adakomeza kumvikana cyane, ari uko yagiye atumvikana n’abahanzi bamusabaga kwigana izindi ndirimbo ariko ntabikozwe.

Ati “Nanga ya nkubiri yo kuvuga ngo Jimmy yashishuye. Ntabwo navuga amazina ariko nzi ko hari abantu benshi twagiye dushwana nanagiye nsubiza amafaranga, turi gupfa ko hari ikintu yanzaniye ngo numve nigane.”

Amateka y’ikirango cy’igisa n’igitonyanga cyumvikana mu ndirimbo akora

Mu gihe abandi bakora indirimbo bagashyiramo amazina yabo ku buryo uyumva ahita abamenya, ikizakubwira indirimbo za Jimmy ni ijwi rimeze nk’igitonyaga cy’amazi.

Yavuze ko iki gitonyaga gifite amateka akomeye kuri we kuko agitangira abahanzi bamwe bamusuzuguraga bagafata studio ye nk’igitonyanga mu nyanja.

Ati “ Natangiye ntabyo nzi, nterateranya utuntu abahanzi baza babona uko mbikora bakavuga bati ‘iyi studio ni igitonyanga mu nyanja’ kuko icyo gihe muri Kigali zari zimaze kuba nka 12. Kwa kundi umuntu agenda ashakashaka kuri mudasobwa ngwa ku gitonyanga ndavuga nti ‘reka ngishyiremo n’ubundi bavuze ko ndi igitonyanga’.”

Iki gitonyanga Jimmy yagihaye agaciro kuko yizera ko n’iyo cyagwa mu nyanja byibuze amazi anyenganyega, bityo yiha icyizere cy’uko umunsi umwe hari aho azagera.

Nubwo nta mafaranga ahambaye yakuye mu muziki kuko yitaye ku gufasha abanyempano kurusha gucuruza, akaba yishimira ko hari aho yabashije kugeza bamwe.

Umutungo ufatika yakuyemo ni studio ye ifite agaciro abarira muri miliyoni eshanu z’amafaranga y’u Rwanda.

Reba ibwiza ya Eric Mucyo na Jay Polly yakozwe na Jimmy

Nkwegukane ya Umutare Gabby

Maritiri ya Riderman

Producer Jimmy yavuze ko yari amaze iminsi ahugiye mu masomo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza