Kwamamaza

Inzozi z’urusobe: Patrick Uwineza washinze Top5 Sai agiye gutangiza Radio

Yanditswe kuya 5-10-2016 saa 13:26' na Munyengabe Murungi Sabin


Uwineza Patrick umushabitsi akaba n’umushoramari mu muziki arangamiye gukomeza gukora icyatuma u Rwanda rumenyekana mu maso y’Isi binyuze mu muziki umwuga amazemo imyaka irenga cumi n’itanu.

- Uwineza Parick, izina ryubashywe muri muzika y’u Rwanda
- Ni we uhetse umuziki w’abahanzi bo mu Ntara y’Amajyaruguru
- Amaze imyaka irenga 15 ashinze studio Top5 Sai
- Ni studio yakorewemo indirimbo zakundwakajwe mu Rwanda
- Top5 Sai yabyaye Radio, bidatinze azashinga Televiziyo
- Ni umuforomo wabiteye umugongo akurikira inzozi ze

Izina rye rizwi cyane muri showbiz y’u Rwanda nk’iryafashije benshi mu bahanzi kuzamuka no kubyaza impano amafaranga, ibyo yakoze birenze kure intekerezo z’abatamuzi neza.

Mu myaka irenga 15 ishize atangije inzu itunganya umuziki ya Top5 Sai yakoze byinshi bishyira itafari ku muziki. Mu byo yakoze hari ibyamenyekanye n’ibitaramenyekana ndetse hari n’ibikiri mu mishinga y’ikirenga ateganya gutangiza birimo Energy Radio ateganya kuzabyaza Televiziyo mu gihe cya vuba.

Mu 1999, yashinze To5 Sai mu bitekerezo

Ati “Natangiye Top5 Sai muri 2003 ariko igitekerezo cyaje mu 1999, nabihereye ko kuva nkiri muto nakundaga gufotora, gufata amashusho. Nagiraga n’abavandimwe bakundaga umuziki, bansigaga mu rugo ngafata cassettes zabo nkazumva, nakuze nkunda ibi bintu cyane.”

Uwineza arongera ati “Mu 1999 ngeze mu mwaka wa Gatatu mu mashuri yisumbuye nibwo natekereje ko ngomba guhita nkora ibyo nakuranye mu nzozi zanjye. Numvaga nshaka gushinga studio ariko nkumva ni ibintu bitapfa gukunda.”

Yatangiye kwiyumvamo inzozi zo gufotora no gukunda gukora amashusho afite imyaka itandatu, icyo gihe ababyeyi be barabimukundishaga. Avuga ko ibyo amaze kugeraho bifite imizi mu byo yakoze akiri muto.

Ati “Nkiri muto narafotoraga, numvaga nzakora amashusho ariko nkabikora ngamije gushimisha abantu. Mu 1996 Jenoside imaze kurangira, natekereje ko ngomba kuzafasha abantu kwishima, ntibabeho bababaye, ntibyahise binkundira kuko nari muto kandi ndi mu ishuri. Ngeze mu cyiciro rusange mu mashuri yisumbuye navuzaga ingoma kuko n’aho iwacu bavuka ahitwa i Janja, habaga abakannyi, ingoma zarahabaga bityo nanjye nkazikunda cyane.”

Mu buto bwe yeherekezaga ababyeyi kureba ibitaramo bikomeye byabaga byahuruje abantu ari nabwo yatangiye kwiyumvamo cyane umuziki no gushakisha inzira yazanyuzamo gufasha abaririmba gusohora ibihangano no kubikwirakwiza.

Ati “Mu rugo bantwara ku rutugu ngiye kureba ibitaramo, narebye Impala zirimba nkiri akana gato, gukunda umuziki ndabikurana.”

Ubwo yigaga iby’ubuganga muri ESSA Ruhengeri yaje kuba umwe mu bayoboraga ibikorwa bya Club Anti Sida ndetse akaba mu ba mbere bashakishaga ibyuma no kuyobora amatsinda abyina no gukina ikinamico bityo ayasoje akomeza kubikora by’umwuga.

Ati “Mu ishuri twashinze Club Anti-Sida, twatangaga ubutumwa binyuze mu ikinamico, ibitaramo by’umuziki, kwishima mu buryo butandukanye ariko muri byose njyewe nakundaga kuba mfata amashusho no gufotora. Umuzungu watwigishaga witwa Christophe yarankundaga, yarandekaga ngakoresha camera ye, kugeza igihe noneho nabimenye neza.”

“Ibyo nakoraga byose byari ugutegura ibikorwa, tugakenera ibijyanye n’abahanzi n’ibikoresho bitandukanye by’umuziki. Ibi byose byakomezaga kunganisha mu murongo wo gushinga studio nkajya ntanga izi service.”

Yabonye igishobora muri filime

Arangije amashuri yisumbuye, Uwineza Patrick ntiyagiye gukora akazi ko kuvura ahubwo yakomeje gushakisha inzira acishamo impano ye yo gutegura ibirori, gutunganya amashusho no gushaka uburyo bwo gukora indirimbo zitunganyirijwe muri studio.

Yahawe isoko ryo gutunganya filime mbarankuru ku ngagi ndetse bimuhesha amafaranga 300,000 yifashishije mu gutangiza byinshi mu bikorwa yagezeho.

Ati “Nagiye gusaba isoko mbereka ibyo nakoze isoko bararimpa, nababwiye ko iyo filime nzayibakorera ikazasohoka ikoze mu Gifaransa, icyo gihe nari nzi Igiswahili n’Igifaransa neza. nayikoze ngerageza ariko yagenze neza banampemba amafaranga menshi, ibihumbi magana atatu yari menshi icyo gihe.”

Yongeraho ko amaze kubona amafaranga menshi mu kiraka cya mbere yahawe ngo yagize ingufu n’icyizere ko imigambi ye izagerwaho bityo yanga kujya kwiga kaminuza mu by’ubuganga.

Ati “Nahise mvuga nti ‘ubanza naribeshya inzira’, narangije ishuri mbona na buruse yo kujya kwiga muri KHI ariko ndayireka nkora ibyo nakundaga. Ayo mafaranga nahise nyakoresha mu kongera ingufu mu byo nakoraga.”

Top5 Sai yaje ite?

“Igihe kimwe nahawe isoko ryo gufotora abantu mu birori, nafotoje camera nari naguze ibihumbi birindwi icyo gihe yarantengushye ngiye guhanaguza nsanga amafoto menshi yahiye harokokamo atanu. Aho nahise mvanamo izina, ayo mafoto nahise nyita Top5, […] Numvaga Top5 Studio bitanoze, nyuma mpitamo Top5 SAI [Sound, Arts and Image].”

Uwineza w’imyaka 36 yakajije umurego akimara gushinga Top5 Sai, ni nabwo yatangiye kwitabira ibirori byinshi byaberaga kuri Perefegitura ya Ruhengeri. Yajyaga muri byose, ibyo yahawemo akazi ko gufata amashusho ndetse n’aho batamutumiraga yajyagayo agamije kwimenyekanisha.

Gukunda gufata amashusho no kuyobora itsinda yakoranaga naryo byatumye benshi mu Ntara y’Amajyaruguru bamwita umunyamakuru wa Perefegitura.

Indirimbo ya mbere muri Top5 Sai bayimazeho icyumweru

Yagize ati “Mu byo twakoraga na mugenzi wanjye, we yakoraga indirimbo akazishyira kuri cassette tugacuruza, nyuma nibwo natekereje ko ‘bikwiye ko dukora indirimbo zacu’ kuko twakoraga ibitaramo byo kubyina abantu bagasubiramo indirimbo za ba Mr Nice mu matsinda yabyinaga.”

Yayoboye itsinda ry’ababyinnyi mu Ntara y’Amajyaruguru ndetse arihesha ibikombe byinshi mu gihugu ari nacyo cyabaye imvano yo kumenyakana kwe mu Rwanda. Ibi byatumye amenyana na Jack B wabyinaga icyo gihe ndetse bamugira umuhanzi wa mbere mu bakomeye bakoreye indirimbo muri Top5 Sai.

Ati “Naganirije Jack B musaba ko yazaza kwigisha urubyiruko rw’i Musanze kubyina, iwacu naho twahise dushinga itsinda ribyina. Ni njye wari uriyoboye, irushanwa rya mbere twahise turitsinda Abanyakigali batangira kudutinya.”

Ati “Jack B ni we twahereyeho mu ndirimbo yitwa Urihe, twamukoreye na video ariko twashatse kuyishyiramo ubuhanga biratunanira. Hari ukuntu video ikorerwa ku gitambaro cy’icyatsi hanyuma gukuraho icyo gitambaro biratunanira video yose tuyihindura icyatsi kugira ngo abantu batazabivumbura.”

Yongeraho ati “Nagize igitekerezo nganira n’uwitwa Janvier, twemeranyije ko tumukorera indirimbo. Twabikoze dusa n’abakina, nari mfite mudasobwa nari narakodesheje, twari dufitemo porogaramu yitwa Nero, narayicokoje nsanga hari ahantu twafatira amajwi, tuzana na ka micro gato turakamanika araza araririmba natwe dusigarana akazi ko kuyitunganya. Iyo ndirimbo twayicayeho icyumweru cyose, indirimbo irasohoka duhita twinjira mu byo gutunganya indirimbo zacu.”

Uwineza Patrick washinze Top5 Sai

Yaje gushaka abandi basore[barimo Producer Gilbert, Hubert n’abandi] abahugura mu bijyanye no gufata amashusho meza anatangira kwitabaza abari basanzwe batunganya indirimbo bityo studio itangira kumenyekana.

Abahanzi bakomeye mu Rwanda bamuyobotse bigoranye

Ati “Urugendo rwarakomeje dukora ibindi biba byiza kurusha ibyo twahereyeho tugenda tuzamuka gutyo […] Icyo gihe nari natangiye gukorana na Rafiki, hari imishinga twari dufitanye, namusabye ko twamukorera indirimbo aremera, twahise dukora iyitwa Top Shatta tunayikorera video nziza.”

Top5 Sai imaze gukorera Miss Jojo indirimbo yitwa ‘Mbwira’ na benshi mu bahanzi barimo The Bothers, Rafiki, Tuff Gang, The Ben, Kaminuza bakomeje kuyobozi iyi nzu ndetse irushaho gushinga imizi.

Iyi nzu niyo yakorewemo indirimbo zakunzwe nka “Wowe” ya The Ben, “Wigenda Remix”, “Burundu” The Ben yaririmbanye na Danny Vumbi, “Tugumane”, Album “Humura” ya Tonzi, “Mesiya” ya Nyamitali, “Ashimwe”ya Dominic Nic, “Icyo Dupfana Kiruta Icyo Dupfa” ya Mani Martin, “Igikara” ya Dr Claude, “Bya bihe” ya The Brothers n’izindi nyinshi.

Ubu Top5 Sai yafunguye ishami i Kigali, ikorana n’abahanzi ndetse n’abategura ibitaramo bikomeye mu bice by’icyaro no mu murwa mukuru mu kurushaho kwagura ibikorwa byayo.

Yatewe imbaraga na Yannick Noah

Ati “Nagize amahirwe yo kujya hanze y’u Rwanda njya muri studio yitwa Plan B Multimedia, ni iy’Umunyarwanda yabaga mu Bubiligi, iyi yaradufashije cyane mu kwiyungura ubumenyi kuko abahanga bari bafite barabatwohererezaga bakaza kutwigisha i Musanze cyangwa natwe tukabasangayo.”

Mu bahanzi yahuye na bo agitangira gukora ingendo i Burayi barimo Yannick Noah ‘wamukomeje amubwira ko azagera kuri byinshi’. N’abandi bahanzi yaganiriye na bo icyo gihe barimo Kayirebwa, Byumvuhore, Mboneye Eulade, Jacky Rapon[waririmbye Fallait Pas], bose bamuteraga imbaraga.

Yajyaga guhaha ubumenyi mu mahanga akagaruka mu Rwanda

Uwineza Patrick kandi yazamuye impano z’abahanzi bato mu myaka mike ishize, ni na we wafashije Young Grace kumenyekana. Yamuzamuriye mu cyiciro kimwe na Mr Gloire, Frank Kay n’abandi bakorera umuziki i Musanze.

Ati “Mu bahanzi twahisemo icyo gihe abenshi barazamutse ku rwego rwiza, nka Young Grace yahise aba umuhanzi ukomeye mu gihugu anitabira amarushanwa akomeye akandi akaza imbere.”

Radio yashinze igiye kumvikana

Uwineza yavuze ko mu rugendo rw’iterambere Top5 Sai ifite kuva yashingwa harimo kwamamaza umuziki w’u Rwanda no gufasha abawurimo bakabyaza impano yabo amafaranga.

Yashinze Radio yise Energy ifite icyerekezo cyo gukemura ibibazo by’abahanzi biganjemo abakizamuka bagaragaza ko bazitirwa no kutagira ibinyamakuru bibavuganira.

Ati “Ibyo twagezeho ni byinshi, ubu tugeze ku mushinga wo gutangiza Radio izanabyara Televiziyo, izaba yitwa Energy. Icyerekezo no ugufasha abahanzi n’abandi bari muri uyu muziki kuzamuka no gutera imbere.”

Radio izatangira mu minsi mike ndetse izajya yumvikana hafi mu gihugu cyose. Uwineza ateganya ko izabyara Televiziyo nayo izakorera mu Mujyi wa Musanze.

Ati “Radio yacu itandukanye n’izindi kuko tuyishinze tuzi izo mvune z’abahanzi nk’uko babivuga, iziba yibanda cyane ku muziki no kuwuteza imbere. Nibidahinduka muri uku kwezi Radio izatangira kuvuga, izaba yumvikana kuri 88.8, abantu hafi ya bose mu Rwanda bazaba bayumva kuko bibiri bya gatatu by’abatuye igihugu bizaba biyumva.”

Uwineza Patrick yakunze gufata amashusho akiri muto
Uwineza Patrick yatoje benshi ibyo gutunganya amashusho

Bya bihe, imwe mu ndirimbo zakorewe muri Top5 Sai


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved