Intashyo zo ku musozi wa Nzove, ku ishami ryashibutseho amaraso ya Stromae (Amafoto & Video)

Yanditswe na Uwiduhaye Theos
Kuya 9 Gashyantare 2021 saa 11:17
Yasuwe :
0 0

Ni umwe mu bahanzi b’ibihangange ku Isi bafite inkomoko mu Rwanda akaba umwe mu baririmba Igifaransa neza yabijyanisha n’uko yitwara ku rubyiniro no mu ndirimbo byo bikaba ibindi bindi. Nta wundi uwo ni Paul Van Haver, wamamaye nka Stromae.

Uyu muhanzi ni umunyagikundiro gihambaye ndetse hari n’abajya bavuga ko umuziki we urenze kuririmba ahubwo akaba ari umuhanzi w’umuhanga ubasha kunezeza no kwigisha imbaga icya rimwe.

Avuka kuri Rutare Pierre n’umukunzi we Miranda Marie Van Haver. Rutare bahuriye i Bruxelles bahuza urugwiro rwaje kuvamo umwana.

Izina rye ryatangiye kumvikana mu 2007, mu Bubiligi atangira guca ibintu ariko mu Rwanda batazi ko hari umwana w’u Rwanda uri kurikoroza muri iki gihugu asanzwe atuyemo.

Ntibyatinze! Mu 2010 yatangiye kuba igihangange ku Isi yose mu Rwanda batangira kwicinya icyara kubera inkuru nziza y’uko umuhungu wabo atangiye kuba icyamamare ku rwego ruhambaye.

Ariko akenshi inkomoko ya Stomae ikajya igibwaho impaka ku bw’impamvu zitandukanye, ndetse hari n’abashidikanya ku nkomoko ye, bakamwita umubiligi; nyamara bakarenza amaso u Rwanda igihugu cyamwibarutse.

Nyamara Stromae w’imyaka 35, afite inkomoko mu Karere ka Nyarungege, Umurenge wa Kanyinya, Akagari ka Nzove mu mudugudu wa Ruyenzi mu Mujyi wa Kigali.

IGIHE yasuye itongo ry’aho se w’uyu muhanzi avuka kwa Gasamagera Gabriel.

Ni ahantu hacungwa n’umwe mu bo mu muryango w’uyu muhanzi nk’uko mubyara wa Stromae (mama w’uyu mugabo avukana na se wa Stromae Rutare Pierre) witwa Ange Richard Magorane twahajyanye yabitangaje.

Ati “Hano sogokuru yari ahatuye mbere ya Jenoside yakorewe Abatutsi mu 1994, bari bahatuye baza kuhasenya mu 1990 kubera ibibazo by’amoko byari mu Rwanda. Iyi nzu twashatse kuyirekera uko yari imeze, ubu haba umuntu wo mu muryango. Ntabwo twashatse kuyivugurura twashatse ko isigara ari nk’urwibutso.”

Mubyara wa Stromae avuga ko uyu muhanzi yakuze akunda kuririmba

Stromae, yakuze yiyumvamo kuzaririmba…

Stromae yatangiye umuziki akora injyana ya Hip Hop, yakoreshaga izina rya Opsmaestro, nyuma atangira kwibanda ku muziki wa Electronic music. Imwe mu ndirimbo zatumye aba icyamamare ni iyo yise ‘Alors on danse’, yanabaye igihe kirekire iya mbere mu gukundwa mu bihugu by’i Burayi cyane cyane ibivuga ururimi rw’Igifaransa.

Iyi yakurikiwe n’izindi zirimo ‘Formidable’, ‘Papaoutai’ n’izindi zatumye izina ry’uyu muhanzi ritumbagira.

Ange Magorane mubyara w’uyu muhanzi uvuga ko azi uyu muhanzi kuva mu bwana cyane ko yanakundaga kuza mu Rwanda, nk’ahagana mu 1990, Miranda na Stromae ngo baje mu Rwanda ndetse bakiranwa urugwiro mu muryango wa Rutare i Shyorongi.

Ntibamaze igihe kinini kubera indwara ya malariya yabibasiye. Aka gace kabagamo imibu myinshi cyane nk’uko uyu muvandimwe wabo abyemeza.

Ati “Mu 1999 nagiye mu Bubiligi ngira amahirwe yo kongera kubonana nawe. Twarahoranaga nk’ababyara. Ikintu nibuka tukiri abana, yaravugaga ati mube abanyamakuru njye mumbaze ibibazo nk’umuhanzi. Urumva mu mutwe we yari yariteguye. Nanjye ubu ibyo nkora bijyanye n’itangazamakuru, urumva ko twateguye ahazaza hacu tutabizi.”

Arakomeza ati “Mu muryango turi abantu b’abahanzi, dufite abantu benshi b’abahanzi bakunda gusetsa ntabwo navuga ko yari umwana ucecetse cyangwa iki yari umwana uganira. Twakoraga ibiganiro mpaka. Sinzi niba Umwali Fanny mumuzi nawe araririmba, murumuna we Cyusa nawe araririmba.”

Avuga ko muri uyu muryango umuntu wese ugaragaje impano ashyigikirwa mu buryo bukomeye, ibintu bitandukanye n’ibiba mu miryango myinshi mu Rwanda.

Ati “Kwa kundi mu muryango haza umwana uririmba bakamubwira ngo bireke twe si ko biri ahubwo ni ibintu dufata nk’amahirwe.”

Indirimbo ze nyinshi yatangiye kuziririmba mu muryango bazizi

Magorane wabanye bya hafi na Stromae avuga ko uyu muhanzi n’ubundi mu birori byabaga iwabo, yabasabaga kuririmba indirimbo ze zitandukanye ku buryo batatunguwe n’uko yabaye icyamamare.

Ati “Stromae turi mu Bubiligi igihe cy’ubwana bwe cyararangiye ariko we akomeza kujya aririmba. Yazaga mu rugo turi gusabana akavuga ngo mureke mbaririmbire, indirimbo ze yazigeragezaga turi hamwe.”

Arakomeza ati “Ariko iya mbere tuyumva byaradutunguye biranadutangaza. Ntabwo twumvaga yagera ku rwego yagezeho cyane ko ibintu aba avuga aba ari ukuri ariko akabivuga aseka asa nk’uganira ariko byageze aho bivamo ibintu byiza.”

Akomeza avuga ko we atatunguwe no kubona mubyara we yarabaye icyamamare, ati “Njyewe ntabwo byantunguye atari ukuvuga ngo nari nizeye ko azi kuririmba ariko nari mbizi ko aricyo kintu akunda aribyo ashaka ariko narabibonaga ko hari ikintu azageraho cyane cyane mu bintu bijyanye n’umuziki.”

Stromae na mubyara we Ange Magorane

Kwa sekuru wa Stromae hahoraga ibirori…

Gasamagera [sekuru wa Stromae] yavutse mu 1924, i Bumbogo mu Karere ka Rulindo mu Ntara y’Amajyaruguru.

Ni umwe mu bagize uruhare rukomeye mu kubaka myinshi mu mihanda y’igihugu mu 1960 ubwo yakoraga muri MINITRAP [ubu ni Minisiteri y’Ibikorwa Remezo].

Gasamagera yari umugabo w’umunyabwira akagira umurava mu kazi ndetse benshi bamufatiragaho urugero nk’inyangamugayo. Abaturage bo mu yahoze ari Segiteri Nzove i Shyorongi, baramukundaga bakanakunda kumuvuga ibigwi.

Magorane avuga ko ari umwana yabonaga kwa sekuru hahora ibirori, ati “Icyo nibuka turi abana, hahoraga ibirori bahoraga batarama, hahoraga hari abantu benshi cyane. Ikindi nibuka ni uko sogokuru yari afite inka nyinshi, ndetse na biogas.”

Agahinda ku muryango wa Stromae utarabona se ngo ashyingurwe mu cyubahiro…

Rutare Pierre yavutse mu 1958, avuka mu muryango w’abana barindwi, yavukiye mu Mujyi wa Kigali i Nyamirambo mu Karere ka Nyarugenge.

Kubera ibibazo bya Politiki byari mu Rwanda, Gabriel Gasamagera yafashe umwanzuro wo kwimurira umuryango we i Shyorongi ari naho Rutare yabaye imyaka myinshi.

Ubwo Rutare yasozaga amashuri yisumbuye, murumuna we witwa Paul yapfuye amarabira bibabaza uyu mugabo wahise afata umwanzuro wo guhita ava mu Rwanda.

Se wa Stromae yize amashuri yisumbuye muri Collège de Rulindo ayasoreza mu Mujyi wa Kigali muri Collège St. André i Nyamirambo.

Bigoranye cyane, mu 1978 Rutare Pierre ageze mu mwaka wa nyuma asoza ayisumbuye yahawe Pasiporo. Umuntu wese ntiyapfaga guhabwa urupapuro rw’inzira gusa kuri Rutare byabaye nk’igitangaza araruhabwa ndetse abona na Visa yo kujya mu Bubiligi.

Yeretse umubyeyi we ibyangombwa yari yabonye yiyushye akuya, anamusaba ko yamutera inkunga mu rugendo yari agiyemo, undi ntiyazuyaza.

Ageze mu Bubiligi, Rutare yasoje amashuri yisumbuye ahita akomeza muri Kaminuza yigenga aho yize mu ishami rya Civil Engineering and Architecture (Génie Civil et Architecture).

Yize kaminuza nta buruse ya Leta afite ndetse ni we wimenyeraga ikimutunga. Yize mu ngorane zikomeye abifashijwemo na se Gasamagera wari umuhinzi-mworozi wihagazeho i Shyorongi gusa benshi bamuhekenyeraga amenyo bamuziza ko ari umututsi. Mu 1986 yahawe impamyabumenyi ya Kaminuza.

Stromae amaze kuvuka, Rutare Pierre yagarutse mu Rwanda kuko Gasamagera wari ugeze mu zabukuru yari amukeneye hafi ye. Ni we mwana we rukumbi wa Gasamagera wari warize amashuri menshi ari na we mujyanama we wa mbere.

Byumvikane ko Jenoside yakorewe Abatutsi yabaye ari mu Rwanda ndetse akanahigwa cyane kugeza ubwo yishwe.

Magorane avuga ko Jenoside yabaye Rutare afite uwe muryango, ndetse bakaza kumwicira aho yari atuye n’inzu bakayisenya ku buryo ubu bigoranye kuba wabona itongo ry’aho yari atuye.

Ati “Jenoside yabaye yaravuye iwabo. Yari umugabo ufite umuryango, bamwiciye mu Kiyovu hafi y’aho bita Sopetrade. Ntabwo tuzi aho se wa Stromae ashyinguye bamukuye iwe baramujyana.”

Avuga ko yagiye yirinda kuganira byinshi ku buzima bwa se wa Stromae gusa ngo yamubwiraga ibintu bitandukanye bimwe yibukaga kuri we.

Ati “ Sinavuga ko naganiriye na Stromae ibyerekeye se nk’uko nanjye papa wanjye yapfuye muri Jenoside yakorewe Abatutsi ntabwo yigeze ambaza ibye. Wenda twajyaga tubiganira nkamubwira ukuntu papa we yazaga yabona wirukanka cyane kimwe n’abandi ntaguhe bombo akayiguha nyuma. Yari umuntu ukunda gukina cyangwa gucokoza mu buryo bwiza.”

Rutare yapfuye Stromae afite imyaka icyenda. Na mbere y’uko se apfa, Stromae yahoranaga agahinda ko kutabona se bityo agahoza nyina ku nkeke abimubaza, undi akicecekera.

Ku myaka 11 yiyumvisemo agahinda kari kagiye kumuturitsa umutima, abaza nyina ‘niba se yarapfuye, undi ntiyazuyaza aramusubiza ati ‘Yego!’. Stromae ngo yabonye se inshuro zitarenga 20.

Stromae mu nzira zigaruka ku ivuko?

Stromae aheruka mu Rwanda mu Ukwakira 2015 mu gitaramo cy’amateka yahakoreye cyikitabirwa mu buryo bukomeye.

Magorane avuga ko n’ubwo uyu muhanzi yaje mu Rwanda, avuga ko azahagaruka kuko akeneye kumenya byinshi ku ivuko rye n’umuryango.

Ati “Ndabizi neza ko igihe kizagera ashake kumenya byinshi ku muryango we cyane ko nawe yatangiye kubyara. Tuzamusobanurira kurusha uko twamusobanuriye mbere. Yifuza kuza mu Rwanda kugira ngo ahamenye. N’igihe yahaje kera yari umwana.”

Akomeza avuga ko kubera ukuntu akunze kudashyira ubuzima bwe bwose mu itangazamakuru hari igihe azaza abantu bakabimenya yaramaze kuhava.

Ati “Ariko n’anahaza ntabwo ari umuntu uzaza ngo abantu bamubone kuri za televiziyo, ushobora kuzumva ngo yaraje byarangiye. N’ubwo ari umuntu uri mu rumuri ntabwo akunda kwigaragaza cyane. Ni umuntu udakunda itangazamakuru muri rusange. We ni ko akora. Ibitangazamakuru abigendera kure agasohora ibintu mu gihe abishakiye.”

Arakomeza ati “Abantu bo mu muryango twarishimye ubwo yazaga mu Rwanda, kubona umuntu wo mu muryango aje noneho anaririmba byaradushimishije cyane ariko sinavuga ngo yari aje gusura umuryango yari aje mu kazi n’ubwo twagize umwanya wo kubonana nawe tugasangira. Na mbere y’uko aza iyo twabonaga ibyo akora byaradushimishaga.”

Stromae yashakanye na Coralie Barbier banafitanye umwana w’umuhungu bibarutse mu 2018.

Stromae aheruka gushyira hanze album mu 2013 yitwaga ‘Racine carrée’ yaje ikurikira iyo yashyize hanze mu 2010 yitwaga ‘Cheese’. Uretse kuririmba yashinze inzu ihanga imideli ya ’Mosaert’ ahurizamo ibijyanye n’ubuhanzi bwose akora burimo no guhanga imideli afatanyije n’umugore we.

Twasuye itongo rya Sekuru wa Stromae

Bimwe mu bihangano bya Stromae byakunzwe

Stromae ubwo yari mu Rwanda ateruwe na nyirakuru
Aha niho kwa Sekuru wa Stromae
Kwa Sekuru wa Stromae hari hihagazeho ndetse bari boroye inka nyinshi
Rutare afite uduhigo twinshi muri Basketball mu Rwanda
Rutare Pierre ni we wubatse Rond-Point nini ya Kigali nyuma iza kuvugururwa
Rutare se wa Stromae
Sekuru wa Stromae yari umuntu ukunda gutarama
Stromae aheruka mu Rwanda mu 2015
Stromae mu bwana bwe
Stromae na Cyusa Ibrahim, bavukana kuri Rutare Pierre
Stromae ni umwe mu bahanzi bafite inkomoko mu Rwanda bubatse ibigwi ku Isi
Stromae n'umuryango we ubwo yazaga mu Rwanda mu 2015
Stromae n'umugore we basanzwe bakora ibikorwa bijyanye n'imideli

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .