Inshuti ya Kevin Hart yatawe muri yombi iryozwa amashusho amugaragaza aca inyuma umugore we

Yanditswe na Dusabimana Aimable
Kuya 4 Gicurasi 2018 saa 08:12
Yasuwe :
0 0

Umugabo wahoze ari inshuti ya Kevin Hart yatawe muri yombi azira kumushyiraho iterabwoba ko azasohora amashusho agaragaza uyu munyarwenya ari guca inyuma umugore we.

Ubushinjacyaha bw’Umujyi wa Los Angeles bwasohoye itangazo ko uyu mugabo witwa Jonathan Todd Jackson ariko unazwi nka Action Jackson yatawe muri yombi azira kugerageza gutera ubwoba no guhatira Kevin Hart kumuha amafaranga akoresheje ibaruwa.

Rigira riti “Jackson arashinjwa kugerageza kwaka ku gahato Hart amafaranga atatangajwe hagati y’itariki 25 na 30 Kanama 2017.”

Jackson bivugwa ko afite amashusho y’uyu mukinnyi wa filime ari kumwe n’umugore i Las Vegas akaba ashaka kuyagurisha n’ibinyamakuru byo kuri internet bikomeye mu by’imyidagaduro nk’uko byatangajwe n’ubushinjacyaha.

Umunyarwenya Kevin Hart muri Nzeri 2017 yasohoye amashusho yifashe asaba imbabazi umugore we witwa Eniko Parrish n’abana be ko yamuciye inyuma mu gihe yari atwite. Yemeye ko ari amakosa akomeye yakoreye umuryango abatakambira asaba kubabarirwa.

Umugore witwa Montia Sabbag waryamanye na Kevin Hart ndetse agashyirwa mu majwi ko ari we washakaga kumutamaza, icyo gihe yakoresheje inama y’igitaraganya n’abanyamakuru ari kumwe n’umunyamategeko we, abyikuraho avuga ko atari we uri inyuma y’ifatwa ry’amashusho yabo ndetse byakozwe atabizi.

Umunyamategeko we witwa Lisa Bloom akimenya inkuru y’uko uwari wihishe inyuma y’ubwo bugizi bwa nabi yafashwe yahise ashyira ubutumwa kuri Twitter agira ati “Montia nanjye twishimiye ko ukekwaho buriya bugizi bwa nabi agiye kugezwa imbere y’ubutabera. Nk’umwe mu bagizweho ingaruka n’icyaha cyakozwe, Montia yakoranye neza na polisi mu iperereza.”

Kevin Hart we yavuze ko nta magambo menshi yabona yo kubivugaho kuko yaguye mu kantu. Yagaragaje ko yatunguwe no kuba amashusho amwerekana aca inyuma umugore we yari agiye gusohorwa n’inshuti ye magara, ikirenzeho ikamuhatira gutanga amafaranga ngo bidakorwa.

Jackson wafashwe ashobora gukatirwa imyaka ine aramutse ahamwe n’icyaha ashinjwa nubwo yahise ahakana uruhare urwo ari rwo rwose. Umunyamategeko we witwa Chad Lewin yabwiye CNN ko bakiri gukusanya ibimenyetso byose bizamufasha mu rubanza.

Kevin Darnell Hart wafashwe amashusho aca inyuma umugore we ni umwe mu banyarwenya bakomeye muri Leta Zunze Ubumwe za Amerika no ku Isi, yakinnye no muri filime zitandukanye nka ‘Think Like a Man’, ‘Ride Along’, ‘The Secret Life of Pets’ n’izindi.

Yarushinganye na Eniko Parrish mu birori bikomeye byabereye ahitwa Santa Barbara muri California ku wa 13 Kanama 2016. Bakoze ubukwe nyuma y’uko bari bamaze imyaka itanu bakundana. Ubu bafitanye umwana umwe wiyongera ku bandi babiri uyu munyarwenya yari asanganywe.

Umugabo ushinjwa uruhare mu ifatwa ry'amashusho ya Kevin Hart aca inyuma umugore we bahoze ari inshuti
Uyu mugabo yamwandikiye amabaruwa adafite umukono amubwira ko natamuha amafaranga azamutamaza agasohora amashusho ye asambana
Kevin Hart yaciye inyuma umugore we ubwo yari atwite

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza