Inkera yo mu kabyiniro! Cyusa yiyemeje guhindura amateka

Yanditswe na Muvunyi Arsène
Kuya 31 Nyakanga 2019 saa 08:45
Yasuwe :
0 0

Umuririmbyi w’injyana gakondo, Cyusa Ibrahim, n’itorero rye Cyusa n’Inkera biyemeje gukora ibitamenyerewe batangiza ibitaramo by’inkera bazajya bakorera mu kabyiniro ka Cadillac.

Bisanzwe bimenyerewe ko mu tubyiniro dutandukanye two mu Rwanda, hajya abantu biganjemo urubyiruko rukunda imiziki ibyinitse kandi igezweho.

Kugeza n’ubu biracyanakomereye abahanzi bo mu Rwanda kuko nta umwanya uhagije ngo indirimbo zabo zicurangwe ku bwinshi mu tubyiniro nk’uko bikorerwa abahanzi b’abanyamahanga.

Umwe mu bahanzi bakiri bato bahagaze neza mu njyana ya gakondo, Cyusa Ibrahim, we yiyemeje gukora ibidasanzwe, umuziki we wa gakondo akawujyana mu kabyiniro.

Guhera kuri uyu wa Gatandatu tariki 03 Kanama 2019 azajya akorera igitaramo mu kabyiniro ka Cadillac afatanyije n’itorero rye ryitwa “Cyusa n’Inkera.”

Bijyanye n’imiterere y’umuco nyarwanda n’injyana gakondo ikorwa na Cyusa, biragoye kumva ko uyu umuhanzi yajya gutaramira mu kabyiniro, kaba karimo abashaka imiziki idunda biganjemo abadafite ubumenyi ku muco.

Mu Kiganiro na IGIHE, Cyusa yavuze ko azi neza ko abanyarwanda bakunda injyana gakondo ahubwo ngo ni uko batabona umwanya uhagije wo kuyumva kuko bahabwa izo mu mahanga.
Ati “Abenshi bazi ko abanyarwanda badakunda gakondo, barayikunda ahubwo ni uko twe tubaha ibyo badashaka kumva bakabura uko babigenza bakabyakira. Njye nizeye ko rwose abantu bagomba kuza kandi bakabikunda.”

Intego ya Cyusa ni uko injyana gakondo yogera ahantu hose, igasimbura iz’indi z’abanyamahanga, ibintu afata nk’ubukoloni bugikomeje.

Ati “Ndashaka ko injyana gakondo isimbura inyamahanga aho ari hose kuko gukunda iby’ahandi ukirengagiza iby’iwanyu ni ubukoloni bukitubase.”

Cyusa niwe muhanzi ubashije kujyana injyana gakondo mu kabyiniro, mu gihe abandi bakunze kuririmbira muri za hoteli. Azajya aririmbaira muri Cadillac buri wa Gatandatu guhera i saa moya kugeza saa sita z’ijoro.

Reba indirimbo yitwa Migabo Cyusa aherutse gusohora

Cyusa agiye kujyana injyana gakondo mu kabyiniro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza