Ingabire Habiba yatanze impano y’igishushanyo cy’ubugeni muri Miss Supranational

Yanditswe na Bukuru JC
Kuya 29 Ugushyingo 2017 saa 09:08
Yasuwe :
5 0

Ingabire Habiba na bagenzi be bahataniye ikamba rya Miss Supranational batanze impano ku buyobozi butegura irushanwa nk’urwibutso rwa buri gihugu cyatumiwe mu mwaka wa 2017.

Umuhango wo gutanga izi mpano ziganjemo izerekana akarango ka buri gihugu mu bihagarariwe wabimburiwe n’icyiciro cy’ibazwa ry’abakobwa mu isuzuma bumenyi ribanziriza ibirori byo gutoranya umukobwa uzaba warahize abandi.

Ubuyobozi bw’irushanwa rya Miss Supranational bwatangaje ko ibazwa ry’ibanze ryabereye kuri hoteli Horizont Resort muri Repubulika ya Slovakia kuri uyu wa Kabiri tariki ya 28 Ugushyingo 2017. Nyuma y’ibazwa buri mukobwa yashyikirije ubuyobozi impano yageneye irushanwa nk’uburyo bwo gusiga urwibutso rw’igihugu.

Ingabire Habiba waserukiye u Rwanda uyu mwaka yatanze igishushanyo cy’ubugeni cyerekana igice kimwe cy’igihugu kirangwamo imisozi miremire, ibiyaga ndetse n’ibirunga. Kuri iki gishushanyo kandi hagaragaramo ingagi nka kimwe mu bikurura ba mukerarugendo.

Ingabire Habiba yatanze igishushanyo cy'ubugeni nk'impano muri Miss Supranational 2017

Umugoroba wabanjirijwe ibazwa no gutanga impano wari wagenewe ibirori byo kwerekana impano buri mukobwa mu cyiciro yiyumvamo. Miss Portugal Priscila Alves yahize abandi, yakurikiwe na Nyampinga uhagarariye u Buhinde naho ku mwanya wa gatatu haza Miss Italy.

Miss Supranational izasozwa ku itariki ya 1 Ukuboza 2017 mu birori bizabera ahitwa Krynica-Zdrój muri Pologne [Poland]. Abategura iri rushanwa batangaje ko rizerekanwa kuri Televiziyo mu bihugu 120 byo ku Isi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza