00:00:00 IGIHE NETWORK KN KINYARWANDA EN ENGLISH FR FRANCAIS

Indirimbo nshya zakwinjiza muri Week-end

Yanditswe na Uwiduhaye Theos
Kuya 20 Ugushyingo 2021 saa 09:22
Yasuwe :
0 0

Mu mpera za buri cyumweru IGIHE yiyemeje gukora urutonde rw’indirimbo zitandukanye nshya z’abahanzi zaba iz’abakizamuka ndetse n’abamaze kubaka izina. Ni gahunda igamije guteza umuziki Nyarwanda imbere.

Uru rutonde rukorwa nta kindi gikurikijwe ahubwo ari ukureba gusa indirimbo zasohotse ziri mu njyana zitandukanye.

Good for You

Ni indirimbo y’umuririmbyi Patrick Cyuzuzo wiyita ’SEE’ mu muziki we umaze gukora EP (Extended Play) y’indirimbo enye. Indirimbo aheruka ni iyitwa Good for You. SEE w’imyaka 21 y’amavuko, yavukiye ndetse akurira mu Rwanda muri Afurika. Ni umuhanzi w’umuziki wo kuramya no guhimbaza Imana, ukora injyana ya Afro-Fusion, R&B, Pop na EDM.

Iyi ndirimbo ihumuriza abaremerewe n’abakomeretse, ibabwira ko “Bigiye kuba byiza” nubwo ubu bigoye. Ni indirimbo iri mu rurimi rw’Icyongereza asanzwe aririmbamo, ikaba yasohokanye n’amashusho yayo.

Mucunguzi

Ni indirimbo nshya ya Couple ya Fabrice na Maya. Fabrice Nzeyimana yabwiye IGIHE ko iyi ivuga ku Mwami Yesu. Ati “ Ni indirimbo ivuga kuri Yesu n’igikorwa yakoze ku musaraba. Muri iyi misi hari indirimbo nyinshi zivuga ku bibazo abantu bahura na byo n’uko Imana izobibakiza. Twatekereje ko byaba byiza dukoze indirimbo zivuga Yesu.

Uguhimbaza Imana ni ukuvuga icyo ari kandi turifuza ko abantu bamumenya ku giti cyabo bwite bakamenya ko ntawe uhwanye nawe.”

Nzeyimana Fabrice n’umugore we Maya Nzeyimana bazwi cyane mu ndirimbo nka ‘Muremyi w’Isi’. Ni abakirisitu kuri CLA (Christian Life Assembly) i Nyarutarama ndetse uyu mugabo ni n’umucuranzi ukomeye muri iri torero. Bavuka mu Burundi ariko bakaba bakorera umuziki wabo mu Rwanda.

Ku munara

Ni indirimbo yaririmbiwe Imana yahuriyemo abahanzikazi Karasira Clarisse na Liza Kamikazi. Igaruka ku kugira neza kw’Imana. Mu gitero cya mbere aba bahanzikazi bararirimba bati “Wavuze ko uzatugirira neza. Nta jambo wavuze ngo rihere. Ntabwo ujya ubeshya.”

Bakomeza bavuga ko bagiye imbere y’Imana [aho bagereranya no ku munara] barangamiye Imana ngo ibagirire neza mu buzima bwabo.

Kugira ngo bagire ubuzima

Padiri Alexandre Nkomejegusaba wa Diyosezi ya Kibungo, ubu ukorera ubutumwa mu iseminari nto y’i Zaza yakoreye Cardinal indirimbo yitwa ‘Kugira ngo bagire ubuzima [Ut vitam habeant]’, irimo ubutumwa burimo n’ibyishimo by’uyu mushumba wishimiye kuragira intama ntizirumange, ahubwo zigahora iteka zishishe.

Ni indirimbo ijyanye n’intego za Cardinal Kambanda igira iti “Ut vitam habeant” bivuze ngo ‘Bagire ubuzima’. Mu mashusho y’iyi ndirimbo hagaragaramo amashusho ya Cardinal Kambanda.

Mubyeyi mwiza

Itsinda Eastern Singers ryasohoye indirimbo yabo ya kabiri bise “Mubyeyi mwiza.” Ni indirimbo ya kabiri Eastern Singers yakoze ije ikurikira iyitwa ‘Yezu ndamira’ yakunzwe na benshi. Mubyeyi mwiza iririmbitse mu majwi meza kandi inaryoheye amatwi.

Yahimbiwe umubyeyi Bikiramariya, ihimbwa na Hoziyana Erasme ari na we muyobozi wa Eastern Singers, amajwi yayo yatunganyijwe na Emmy Pro usanzwe ukora indirimbo Gatolika wakoze izirimo nka ‘‘Mana idukunda byahebuje’’, ‘‘Ni wowe rutare rwange’’ n’izindi naho amashusho yayo atunganywa na Aimé Pride.

Izisanzwe

Agapira
Ni indirimbo y’umuhanzi T-Rock ubu usigaye wariyongereyeho akazina ka Joni Boy. Yabwiye IGIHE ko ivuga ku musore w’umurara ukundana n’umukobwa agahinduka.

Uyu muririmbyi w’imyaka 26 ubusanzwe witwa Giraye Jean muri Mata uyu mwaka yasubukuye umuziki nyuma y’imyaka atawukora kubera ishuri. Uyu musore yamenyekanye mu ndirimbo zirimo iyitwa ‘Nimba Padiri’ yanasubiranyemo na Bulldogg na ‘Mu Mutwe’ yakoranye na Bruce Melodie, ‘Itara’ ivuga ku bantu bafite ubumuga bwo kutabona yaherukaga n’izindi.

Bad

Ni indirimbo y’umuhanzikazi Thabita Uwizerwa uzwi nka Tabz, uherutse kugaragara mu itsinda ry’abakobwa bari kubyinana na Niyonzima Olivier ’Seifu’ wahagaritswe mu ikipe y’Igihugu, Amavubi, mu gihe kitazwi.

Umuhanzikazi Tabz ubusanzwe ni mushiki wa David Pro, amaze iminsi ari muri Kenya aho we na musaza we basigaye bakorera ibikorwa bijyanye na muzika.

Iyi ndirimbo ye nshya yayihimbye ari muri studio. Yatangiye ari ‘melodie’ nyuma atangira kwandika.

Tabz yamenyekanye nk’inkingi ya mwamba muri Neptunez Band, itsinda ry’abacuranzi rizwi cyane mu bitaramo bya Kigali Jazz Junction rikaba rinafasha abahanzi batandukanye ku rubyiniro.

Jelasi

Ni indirimbo y’umuhanzi Mani Martin iri kuri Extended Play [EP] ye nshya. Iyi EP nshya y’uyu muhanzi yayise ‘Tunes of People [T.O.P]’. Iyi ndirimbo nshya y’uyu muhanzi ivuga ku muhungu ufuhira umukunzi we.

Mu buryo bw’amajwi yakozwe mu buryo bw’amajwi na Element naho amashusho atunganywa na Sia Prince Studio.

Hello Boss

Umuraperikazi Abayizera Marie Grace benshi bamenye nka Young Grace yasubiyemo indirimbo ye ‘Hello boss’ iri mu zakunzwe cyane, anasohora amashusho yayo yafatiye i Dubai. Ni indirimbo uyu muhanzikazi avuga ko yahisemo gusubiramo nk’imwe mu ze zakunzwe cyane yifuje kongera gusangiza abakunzi be.

Iyi ndirimbo ye nshya, yakozwe mu buryo bw’amajwi na Laserbeat mu gihe amashusho yayo yafashwe na musaza we King Philosophe.

Blurry

Ni indirimo nshya y’umuhanzikazi Calene Ingabire, wahisemo kuza mu muziki Kaya byinshi yafatanyije na Icenova. Iri kuri EP y’uyu muhanzikazi yise ‘Nyabyinshi’. Uyu mukobwa afite umwihariko mu bijyanye no kuririmba no gucuranga guitar.

Extended Play[EP] yise ‘Nyabyinshi’, hariho indirimbo nka ‘Uri Kaya?’, ‘Gamble’, ‘Kami’, ‘Blurry’ yakoranye na Icenova ari na yo bashyize amashusho yayo hanze, ‘Ibyejo’ ye na Bushali, ‘5AM’ ndetse na ‘You know waririz’.

Avuga ko yayise gutya biturutse kuri Nyabyinshi cyangwa se Nyabingi uzwi mu mateka y’u Rwanda. Ati “Ni ukubera “Nyabyinshi” bisobanura ufite byinshi kandi nanjye numva mfitiye byinshi abantu bakunda umuziki muri rusange cyangwa abakunda indirimbo zanjye. Intego mfite ni ugukora umuziki abantu ba bisanisha nawo kandi bisangamo.”

Avuga ko ubu ari kuririmba injyana zose.

Legacy

Ni indirimbo y’umuhanzi Jay Pac yafatanyije na Mabuye. Jay Pac wagize igitekerezo cy’iyi ndirimbo yavukiye mu Rwanda, ubusanzwe yitwa Jabiro Pacifique. Mu 2019 yakoze album yise ‘Ijabiro’ ari na yo yari iya mbere mu gihe mu 2020 yashyize hanze iyo yise ‘Hussle 4 Yourz’ iyo aheruka ni iyo yise ‘Umugisha’ yagiye hanze muri Gicurasi 2021.

Uyu muhanzi na mugenzi we witwa Mabuye bahuriye muri iyi ndirimbo nibo batangije label ya Creative Genius, ifasha abahanzi ikorera muri Amerika.

Mayibobo

Ni indirimbo y’umuhanzi Djuma Albert ukoresha amazina ya Babou Tight King yahuriyemo na Bushali. Igaruka ku buzima bwo guhangana n’ibibazo bwo ku muhanda umuntu ashaka uko yabaho mu isi.

Indi ndirimbo ifite izina nk’iri n’iy’umuhanzi Yampano ubusanzwe witwa Florien Uwobizagwira. Ivuga ku rukundo rw’umusore wizeza umukobwa kuzamuba hafi akamusaba kujya kure y’abasore yita ‘Mayibobo’ ndetse n’amabandi baba bashaka kumujya mu matwi ngo bamutware.

Ndarisoma

Ni indirimbo nshya ya Riderman. Igaruka ku muntu ufite ibitekerezo byo gusoma agahiye ntacyo yikanga. Iyi ndirimbo iri kuri album ya munani ya Riderman yise ‘Kirimantare’.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .