Imyaka ibaye itatu Mowzey Radio yitabye Imana, ijwi rye rihora mu matwi y’abamukunze

Yanditswe na Nsengiyumva Emmy
Kuya 1 Gashyantare 2021 saa 10:00
Yasuwe :
0 0

Imyaka ibaye itatu umuririmbyi Mowzey Radio wakunzwe mu itsinda rya Good Life yitabye Imana tariki 1 Gashyantare 2018.

Mowzey Radio ubusanzwe witwa Moses Ssekibogo yavutse muri Mutarama 1985 yitaba Imana tariki ya 1 Gashyantare 2018. Yasize abana batanu barimo babiri yabyaranye na Mbabazi Lilian wo mu Rwanda.

Radio yakubiswe mu ijoro rya tariki 22 Mutarama 2018 ubwo yari mu kabari kitwa De Bar gaherereye i Entebbe.

Yakubiswe n’umusore ucunga umutekano muri ako kabari aviramo imbere ku buryo byamuhungabanyije ahita ajya muri ’coma’ by’akanya gato nyuma aranabagwa.

Mowzey Radio yitabye Imana yari aherutse kuzuza imyaka 34, bivuze ko iyo aba akiraho ubu aba yujuje imyaka 37 y’amavuko.

Mu 2019 nibwo Godfrey Wamala wishe Radio yakatiwe imyaka 14 y’igifungo. Umwaka ushize abo mu muryango w’uyu muhanzi batangaje ko ahashyinguye uyu muhanzi w’icyamamare bahagize ingoro y’amateka.

Ijwi rya Radio witabye Imana ryumvikanye mu ndirimbo zakunzwe mu buryo bukomeye nka “Zuena”, “Nakutamani”, “Akalimu”, “Hellena”, “Whistle Song”, “She’s a Five-star gal”, “Tononya”, “Hamidah”, “Gutamiza”, “Potential”, “Talk and Talk”, “Nyambura” n’izindi.

Ibyo wamenya ku buzima bwa Mowzey Radio

Moses Nakintije Ssekibogo yavutse tariki 25 Mutarama 1985 aza gukura yitwa Mowzey Radio cyangwa Moses Radio, ni umwe mu bari bagize itsinda rya Goodlyfe yari ahuriyemo na Weasel Manizo.

Uyu muhanzi yavukiye mu karere ka Jinja atangirira amashuri abanza ahitwa Kibuye Primary School, ayisumbuye yayahereye muri Holy Cross Lake View Jinja nyuma aza gukomereza icyiciro cya kabiri cy’amashuri yisumbuye muri Kiira College Butiki mbere yuko atangira kwiga Kaminuza muri Makerere University.

Uyu muhanzi yarangije icyiciro cya kabiri cya Kaminuza mu 2005 aminuje amasomo ajyanye n’imitekerereze ya muntu.

Mu 2004 nibwo Radio yasohoye indirimbo ye ya mbere yise ‘Tujja kuba wamu’ akiri muri Kaminuza. Nyuma y’umwaka umwe uyu muhanzi yinjiye muri Leone Island Music Empire ya Dr Jose Chameleone.

Mu 2005, Radio yahise aba umuhanzi w’icyamamare nyuma yo gusohora indirimbo iri mu njyana ya Reggae yise ‘Jennifer’.

Mu 2006 uyu muhanzi yasohoye indirimbo ‘Sweet Lady’ nayo yakunzwe cyane bimwongerera umubare w’abakunzi.

Mu 2007, Mowzey Radio, Weasel Manizo na Jose Chameleone bakoreye ibitaramo muri Leta Zunze Ubumwe za Amerika. Mbere y’uko bavayo, Weasel na Mowzey Radio bagiranye amakimbirane na mukuru wabo Jose Chameleone.

Nyuma yo gutandukana na Chameleone, aba basore babiri bahise bihuriza hamwe bakora itsinda rya Goodlyfe, basezera batyo muri Leone Island Music Empire.

Itsinda ry’aba bahanzi ryamenyekanye cyane guhera ku ndirimbo zabo za mbere; ‘Nakudata’ ‘Ngamba’, ‘Ability’ bakoranye na Rabadaba n’izindi zinyuranye.

Itsinda rya Goodlyfe ryubatse izina mu gihe cy’imyaka irenze icumi bamaze bakorana mbere y’uko yitaba Imana.

Bakoze ibitaramo bikomeye yaba imbere mu gihugu no hanze yacyo, bitabiriye amarushanwa akomeye y’ibihembo by’abahanzi muri Afurika ndetse begukana ibitari bike.

Mu Rwanda ntabwo tuzibagirwa iri tsinda kuko ryakoranye n’abahanzi banyuranye barimo Tom Close, Asinah Erra, Dj Pius mu gihe Mowzey Radio we yakoranye iyitwa Music na Bruce Melodie.

Weasel yasigaranye agahinda gakomeye nyuma yo kubura umuvandimwe akaba inshuti ye ikomeye
Urukundo Radio yakundaga u Rwanda rwatumye benshi batekereza ko ari naho yaba akomoka
Radio na Weasel biyemeje gukorana nyuma yo kwiyomora kuri Jose Chameleone
Ni umwe mu bahanzi bari bafite ijwi ry'agahebuzo
Radio yakoreye ibitaramo byinshi mu Rwanda ari kumwe na Weasel baririmbanaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .