Imvano y’impano ya Ruti Joël, mubyara wa Jules Sentore ufite ubuhanga buhambaye mu muziki

Yanditswe na Uwiduhaye Theos
Kuya 3 Gashyantare 2021 saa 02:52
Yasuwe :
0 0

Ruti Joël ari mu bahanzi b’abahanga bo kwitegwa ndetse afite umwihariko wo guhuza injyana gakondo n’umuziki ugezweho mu rubyiruko bikaryohera benshi bamwumva.

Uyu musore ni umwe mu bakomoka kuri Sentore Athanase akaba mubyara wa Sentore uri mu bahanzi bafite izina rikomeye bakora injyana gakondo.

Mu kiganiro yagiranye na IGIHE, yavuze ko kuririmba umuziki gakondo yabitangiye ari mu itorero gakondo nyuma akaza kubona ko aririmbye ku giti cye aribyo byaba byiza kurushaho.

Ati “Natangiye umuziki mu 2013 ndirimba muri Gakondo Group, kugeza ubwo natangiraga kuririmba njye nyine. Natangiriye muri iri tsinda ryari ririmo abahanzi batandukanye barimo Massamba, Teta Diana, Jules Sentore n’abandi.”

Arakomeza ati “Nakundaga kubyina yaba imbyino gakondo n’izindi zigezweho ibyo kuririmba byaje nyuma, ntabwo namenya imyaka nakundiyeho kuririmba gusa ni muri icyo gihe muri za 2010. Ntabwo nabitekerezaga nakundaga kubyina gusa uko umuntu agenda akura ibintu birahinduka.”

Avuga ko inganzo ye iza bitewe n’ibihe arimo cyangwa se ibyo abona bigezweho muri icyo gihe, ati “Iyo ngiye guhimba indirimbo ngendera ku marangamutima cyangwa ibiriho cyangwa se imitekerereze mfite muri icyo.”

Arakomeza ati “Nk’indirimbo yitwa Rumuri rw’itabaza nayanditse mu mwaka ushize turi muri Guma mu Rugo bitewe n’ibyo bihe. Na ‘Rusaro’ ni uko mu buzima tugira inshuti rero iyo mutakiri kumwe bituma utekereza kuba hari ikintu wakora kijyanye no kubura inganzo. Ubutumwa ntanga akenshi buba bugendanye n’ibihe ndimo ariko cyane cyane ndirimba urukundo.”

Uyu muhanzi avuga ko mu bahanzi afatiraho icyitegererezo harimo Massamba Intore wamubaye hafi kuva kera, Muyango, Sentore Athanase, Rujindiri, Kayirebwa, Jules Sentore n’abandi. Avuga ko hanze y’u Rwanda akunda Fally Ipupa na Chris Brown.

Uyu muhanzi ubusanzwe witwa Rumata Joel, ari gutegura album ye ya mbere yise ‘Rumata’ iriho indirimbo 10 ndetse iya mbere yitwa ‘Igikobwa’ yamaze kuyishyira hanze.

Ati “Album ‘Rumata’ ikubiyemo ibi ndimo byose niyo mpamvu nayise gutyo. Rumata ubusanzwe ni izina ryanjye. Indirimbo ziriho ubu ntabwo nabavuga gusa abantu bazagenda bazibona. Nishimira ko abantu banyakiriye neza kandi ubutumwa nshaka gutanga babwumva kandi nkabemerera ko bizakomeza.”

Uyu musore mu 2017 nibwo yagiye muri studio akorana indirimbo na King Bayo uherutse kwitaba Imana ndetse na Jules Sentore, bise ‘Diarabi’.

Amaze kugaragara mu ndirimbo zirimo ‘Ndaryohewe’ yahuriwemo n’abandi bahanzi bakizamuka ndetse na ‘Diarabi’. Naho ize ni ‘La Vie est Belle’, ‘Rumuri rw’Itabaza’, ‘Rusaro’ ndetse na ‘Igikobwa’ aheruka gushyira hanze. Ruti Joel yavutse mu 1996, ku Kacyiru ni ikinege iwabo.

Ikiganiro na Ruti Joël

Reba indirimbo z’uyu musore

Ruti Joel yihebeye umuziki
Ruti Joel ni umwe mu bahanzi b'abahanga bafite ahazaza heza
Mu bahanzi afatiraho icyitegererezo harimo Muyango
Ruti Joel ni mubyara wa Jules Sentore

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .