Imvano y’imbyino igezweho ya #BussItChallenge ikomeje guca ibintu ku mbuga nkoranyambaga

Yanditswe na Uwiduhaye Theos
Kuya 15 Mutarama 2021 saa 10:01
Yasuwe :
0 0

Ku mbuga nkoranyambaga zitandukanye hamaze iminsi hacicikana amashusho atandukanye y’abantu bari kubyina indirimbo yitwa ‘Buss It’ ya Era Banks, mu cyiswe ‘#BussItChallenge’.

Bikorwa hifashishijwe imbuga zitandukanye zirimo TikTok ari nayo yatumye iyi mbyino yamamara, Twiter yenyegerejweho umuriro hakaza ndetse na Facebook na Instagram.

Iyo mbyino yitabiriwe cyane n’abakobwa n’abagore, aho usanga bifata amashusho atangira basa n’aho bambaye imyenda isanzwe, nta birungo byongera ubwiza bisize, bamwe baba basa n’abakibyuka.

Nyuma gato bakunama hasi bakagaragara bambaye imyenda ya ngwino urebe, imwe uba ubona ko igenewe ibirori, ibi bikajyana n’uko noneho baba bisize ibirungo byongera ubwiza.

Kuyibyina bisaba kuba ufite ubuzima buzira umuze kuko umuntu ufite amavi afite ikibazo atahirahira ayisukira kuko isaba imbaraga no kuba umuntu agororotse.

Uhereye muri Amerika aho yatangiriye ari naho Erica Banks waririmbye indirimbo yakomoweho akomoka, ubu iyi mbyino ya #BussItChallenge yageze mu bihugu hafi ya byose by’Isi; ibintu byerekana ko isi imaze kuba umudugudu kuko akantu gakundwa mu gihugu kimwe kakagera mu bindi mu kanya nk’ako guhumbya.

Imvano y’iyi mbyino…

Indirimbo ya Eric Banks yakomoweho iyi mbyino yagiye hanze ku wa 8 Kamena 2020. Mu buryo bw’amajwi yatunganyijwe na SGT J ndetse mu ntangiro yayo hifashishwamo amwe mu magambo ari mu ndirimbo ya Nelly yitwa ‘Hot It Herre’.

Yagiye bwa mbere ku rutonde rwa Billboard Charts muri Kanama 2020, ijya ku mwanya wa 38 mu cyiciro cy’indirimbo za R&B/Hip-Hop; nyuma mu kwezi kwakurikiyeho yabaye iya 36.

Iyi ndirimbo yongeye kugira igikundiro muri uku kwezi muri Amerika ndetse yacuranzwe ku mbuga za internet zitandukanye inshuro zirenga miliyoni mu cyumweru kimwe gusa, hagati ya tariki 1 kugeza 7 Mutarama.

Mu ntangiro za 2021 nibwo ‘Buss It’ yamamaye cyane biturutse ku mukobwa w’imyaka 18 ukoresha amazina ya Erika Davila, washyizeho amashusho ari kuyibyina agasaba abamukurikira kuba babikora bakamwereka ubuhanga bwabo ko bwaba bwisumbuye ku bwe.

Kuva ubwo, abantu batandukanye bagiye bamwigana bakifata amashusho bari kuyibyina maze iyi mbyino itangira kogoga isi yose ityo. Kuri ubu amashusho ya Erika Davila ayibyina amaze kugira abayarebye basaga miliyoni 16 kuri Tik Tok.

Iyi mbyino yageze no mu Rwanda ndetse naho imaze iminsi iri guca ibintu ku mbuga zitandukanye ziganjemo Twitter na TikTok, aho abakobwa b’ibizungerezi bifata amashusho bari kuyibyina bikavugisha benshi.

Kuri ubu TikTok ikoreshwa buri kwezi n’abantu bahoraho saga miliyari ku Isi yose. Yatangijwe ku isoko ryo mu Bushinwa muri Nzeri 2016; umwaka wakurikiyeho wa 2017, ByteDance isakaza iyi application hanze y’icyo gihugu.

Mu gukora TikTok bashyizemo utuntu tw’ingenzi dusanzwe dukoreshwa ku mbuga nka Snapchat, aho umuntu ashobora kwifata amashusho y’amasegonda 15 akayashyira kuri uru rubuga.

Undi mwihariko ni uko uba ufite ubushobozi bwo guhitamo indirimbo ushobora kongera mu mashusho yawe, kugira ngo arusheho kunogera abayareba n’abayumva, ndetse ukongeramo ibindi bintu bitarimo uyafata (special effects). TikTok iri mu ndimi 40.

@erikadavila120

PLEASE TAG ME. And if this has been done I’m sorry, i just fux wit the song ##transition ##fyp ##newtrend ##newdance

♬ Buss It - Erica Banks

Erica Banks amaze kwamamara kubera indirimbo ye yise Buss It

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .