Impinduka mu bihembo bya “Kiss Summer Awards” bigiye gutangwa ku nshuro ya kabiri

Yanditswe na Nsengiyumva Emmy
Kuya 4 Nzeri 2019 saa 08:32
Yasuwe :
0 0

Abanyamuziki bahagaze neza mu ruhando rw’imyidagaduro mu Rwanda bagiye gushimirwa binyuze mu bihembo bya “Kiss Summer Awards”bigiye gutangwa ku nshuro ya kabiri.

Kiss Summer Awards ni ibihembo bitegurwa na Radio Kiss FM iri mu zikomeye mu Mujyi wa Kigali no mu Rwanda. Byatangiye gutangwa mu mwaka ushize wa 2018.

Bigiye gutangwa mu gihe muri iyi minsi abahanzi n’abandi bafite aho bahuriye na muzika muri rusange usanga bijujutira kuba mu Rwanda ibihembo bigenewe abahanzi bakoze neza ari bike cyane ndetse n’ibihari bikaba bikemangwa ku kijyanye n’imikorere yabyo.

Kiss Summer Awards ihabwa abahanzi bakoze indirimbo zakunzwe mu gihe cy’impeshyi.

Itangwa ry’ibihembo by’uyu mwaka ririmo impinduka kuko hongewemo icyiciro cy’umuhanzi mushya wakoze indirimbo igakundwa cyane.

Umukozi wa Kiss Fm uri no mu ikipe itegura ibi bihembo, Amed Muhamadi, yabwiye IGIHE ko hari impinduka zinjijwe mu irushanwa.

Yagize ati ‘‘Icyiciro gishya kirimo ni icy’umuhanzi mushya. Uyu tuzajya tureba umuhanzi watangiye umuziki nyuma yo gutanga ibihembo by’umwaka wabanje.’’

Yavuze ko biteguye neza ku buryo bwo kunoza ibitaragenze neza mu irushanwa ryabaye mu 2018.

Ati “Iya mbere birumvikana ko hari utuntu twabonyemo wenda tutanagenze neza, kuri ubu twiteguye gukosora byose kandi twizeye ko bizagenda neza.”

Amed yakomeje avuga ko bakiri gutegura ibi bihembo birwanaho ariko bizeye ko mu minsi iri imbere uko igikorwa kizagenda cyaguka bazagenda bagira ubushobozi ku buryo abahembwa bajya banapfumbatizwa amafaranga.

Biteganyijwe ko abahatana bazatangazwa ku wa Gatanu tariki 6 Nzeri 2019; mu gihe ibirori byo kubitanga bizaba ku wa 6 Ukwakira 2019.

Abahatana bari mu byiciro bine birimo Icy’umuhanzi mwiza w’impeshyi (Best Summer artist), indirimbo nziza y’impeshyi (Best summer song), utunganya indirimbo mwiza w’impeshyi (Best summer producer) n’umuhanzi mwiza ukizamuka (Best new summer artist).

Mu mwaka wa 2018 ubwo ibi bihembo byatangwaga bwa mbere The Ben, Urban Boys na Bob Pro ni bo begukanye ibi bihembo.

Bob Pro yegukanye igihembo cy'umu-producer wakoze indirimbo zakunzwe mu mpeshyi ya 2018
The Ben yegukanye igihembo cy'umuhanzi wari ukunzwe mu mpeshyi ya 2018
Urban Boys yegukanye igihembo cy'abafite indirimbo yakunzwe mu mpeshyi y'umwaka ushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza