00:00:00 IGIHE NETWORK KN KINYARWANDA EN ENGLISH FR FRANCAIS

Imishinga y’abahanzi bari guhatanira Miliyoni 7 Frw muri ‘Rwanda Gospel Stars live’

Yanditswe na Nsengiyumva Emmy
Kuya 2 Nyakanga 2021 saa 06:28
Yasuwe :
0 0

Gushyigikira abahanzi 15 baririmba umuziki wo kuramya no guhimbaza Imana, bakomeje guhatanira igihembo cya miliyoni zirindwi z’amafaranga y’u Rwanda azatangwa na ‘Rwanda Gospel Stars Live’ birarimbanyije.

Abakunzi b’umuziki wo kuramya no guhimbaza Imana, yaba abo mu Rwanda no hanze yarwo bakomeje gushyigikira abahanzi bakunda binyuze mu mushinga ‘Rwanda Gospel Stars live’.

Byitezwe ko tariki 30 Nzeri 2021 umuhanzi uzaba ahiga abandi kugira umushinga mwiza no gushyigikirwa cyane, azashyikirizwa miliyoni 7 z’amafaranga y’u Rwanda ziyongera ku yo yagiye ahabwa mu gushyigikira umushinga we.

Izi miliyoni zirahatanirwa n’abahanzi barimo Serge Iyamuremye, Israel Mbonyi, Aline Gahongayire, Tonzi, Gaby Kamanzi, Rata Jah Naychah, James na Daniella, Gisubizo Ministries, MD, Dorcas & Vestine, Chorale Christus Regnat, Gisele Precious,True Promises Ministries, Aimee Frank Nitezeho na Annett Murava.

Ni igitekerezo Mike Karangwa uri mu bategura ‘Rwanda Gospel Stars Live’ avuga ko bagize nyuma yo kubona ko abantu bo mu ruganda rwa muzika bagizweho ingaruka n’icyorezo cya Covid-19.

Nyuma yo kwitegereza ingaruka abahanzi bagizweho n’iki cyorezo, biyemeje gufasha abakora umuziki wo kuramya no guhimbaza Imana.

Kugeza ubu hatangijwe ubukangurambaga bwo gukusanya amafaranga yo gushyigikira imishinga ya buri muhanzi uri muri 15 bahatana.

Abahanzi batangiye gukangurira abakunzi babo kubaha inkunga yo gushyira mu ngiro imishinga yabo, binyuze mu bitaramo binyura kuri televiziyo y’u Rwanda.

Buri wese wifuza gushyigikira umuhanzi akunda muri 15 bamaze gutangazwa, arasabwa kujya muri telefone ye umurongo yaba akoresha wose, agakanda *544*300*nimero y’umuhanzi ushyigikiye hanyuma # cyangwa akanyura kuri Internet anyuze hano.

Nta giciro runaka cyashyizweho, buri wese yitanga uko yifite mu rwego rwo gushyigikira umuhanzi akunda.

Mu rwego rwo kongera ubukangurambaga, Mike Karangwa avuga ko bateguye ibitaramo bizajya bitambuka kuri KC2 abahanzi bagataramira abakunzi babo ari na ko babasaba kubashyigikira.

Yavuze kandi ko ku munsi wa nyuma w’irushanwa abahanga mu by’imishinga bazatoranya umuhanzi ufite umwiza kuruta iyindi.

Amajwi y’akanama nkemurampaka aziyongeraho ay’uzaba yashyigikiwe cyane bityo hamenyekane uwatsinze uzegukana miliyoni zirindwi z’amafaranga y’u Rwanda.

True Promises Minisitries bafite nimero 7, binjiranye mu irushanwa umushinga wo gufasha abana babakobwa batewe inda bakiri bato
Tonzi ufite nimero 10 afite umushinga yise 'Igisha ibyiza new generation' ugamije kwigisha abato kugira ngo bakurane indangagaciro z'umu kirisitu nyawe
Serge Iyamuremye ufite nimero 9, umushinga wo gufasha abakiri bato baturuka mu miryango itishoboye kujya ku ishuri, abaha ibikoresho n'amafaranga y'ishuri
Annett Murava ufite nimero 15, afite umushinga wo kubaka ikigo kizajya kizamura impano z'urubyiruko mu byiciro bitandukanye
MD ufite nimero 3, afite umushinga wo gufasha byibuza abana ijana bo ku muhanda kuva muri ubu buzima
Israel Mbonyi ufite nimero 6, afite umushinga wo kugura ibyuma byajya bimufasha gukorera abantu ibitaramo
Kingdom of God Ministries bafite nimero 5 bafite umushinga wo gufasha abana bava kugororerwa i Iwawa bakabura ubushobozi bwo gushyira mu ngiro ibyo bigishijwe
James&Daniella bahawe nimero 8, bafite umushinga wo kwigisha ijambo ry'Imana ababaswe n'ibiyobyabwenge n'abafungiye mu magereza atandukanye mu rwego rwo kugerageza kubereka ubwiza bw'Uwiteka
Gisubizo Ministries bahawe nimero 1, bafite umushinga wo kwigisha ijambo ry'Imana abana baturuka mu miryango itishoboye
Gaby Kamanzi ufite nimero 4 afite umushinga wo kwigisha abantu batandukanye cyane cyane abana kuririmba
Aime frank Nitezeho ufite nimero 14 afite umushinga wo gukora studio ikomeye ya muzika yaba itunganya amajwi n'amashusho mu rwego rwo guteza imbere umuziki wo kuramya no guhimbaza Imana
Dorcas & Vestine bafite nimero 11, umushinga wabo ni uwo kubaka studio nziza ya muzika itunganya amajwi n'amashusho yajya ibafasha ikanafasha abandi bahanzi by'umwihariko aba Gospel
Rata Jah Naychah afite nimero 13, afite umushinga wo kuzashyiraho uburyo buhuza abahanzi b'ibyamamare n'urubyiruko rufite impano mu rwego rwo kuzimurika no gushyigikira abato
Aline Gahongayire ufite nimero 2 anafite umushinga yise 'MIZAWADI YA AFRICA' ugamije gufasha abakiri bato bakunze guhura n'ihohoterwa rishingiye ku gitsina
Gisele Precious yahawe nimero 12, afite umushinga wo gushakisha no gufasha abana b'abakobwa bafite impano zitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .