Ikiganiro na Bad Rama: Uko yatewe n’imyuka mibi, umukecuru bivugwa ko akomoraho ubutunzi n’ibindi

Yanditswe na Uwiduhaye Theos
Kuya 24 Nyakanga 2019 saa 09:17
Yasuwe :
0 0

Muri iki gihe inzu ifasha abahanzi ya The Mane Music Label iri mu zihagaze neza mu Rwanda ndetse bipimirwa mu bikobwa bitandukanye by’abahanzi bayibarizwamo barimo Safi Madiba, Marina na Jay Polly.

The Mane Music Label ihagarariwe na Mupenda Ramadhan [Bad Rama] umaze kuyigeza kuri byinshi byatumye iba imwe mu nzu zifasha abahanzi zihagaze bwuma mu Rwanda.

Igituma iyi nzu yirahirwa ni uko mu gihe cy’umwaka umwe gusa imaze mu ruganda rwa muzika nyarwanda hari ibyo imaze guhindura byishimirwa n’ab’ingeri zitandukanye, bakurikirana uru ruganda.

Ikiganiro kirambuye IGIHE yagiranye na Bad Rama, ushire amatsiko kuri bimwe ujya umwibazaho utari uzi.

IGIHE: Muri iki gihe ubona The Mane Music Label ari uruhe ruhare imaze kugira mu guteza imbere uruganda rw’umuziki mu Rwanda?

Bad Rama: Biragoye! Ntanagiye kure nabanza nkareba iwanjye, kuba The Mane iriho, Marina arimo ari no mu bakobwa ntatinya kuvuga ko bitwara neza mu gihugu […] navuga nka Queen Cha nawe ko aho agereye muri The Mane ibikorwa byakomeje kwiyongera. Ni ikintu cyo kwishimirwa.

Wareba Safi Madiba nk’umuhanzi wari uvuye mu itsinda ni ibintu bikomeye kuba umuhanzi yava mu itsinda nka kuriya akongera agafata. Usibye n’itsinda niyo umuhanzi asohotse muri label ntabwo biba byoroshye, reba nka Rich Mavoko, kuva yava muri Wasafi ntabwo yongeye kumvikana kandi afite impano.

Navuga ko kuba Safi ahagaze neza nabyo ari ikintu gikomeye. Kuba twarasinyanye tugatangirana kuri zeru ariko ubu akaba ari umwe mu bahanzi bakomeye mu gihugu. Yakoranye n’ibyamamare bitandukanye bikomeye ibintu atigeze akora akiri mu itsinda ndetse n’abandi bahanzi bakomeye mu gihugu batajya bapfa gukora.

Turi gufatanya na TECNO kugira ngo tuvumbure impano nshya. Imyidagaduro y’u Rwanda The Mane imaze kuyigira ikintu gikomeye cyane, ituma abantu bashishikarira gusoma amakuru yo mu Rwanda ukumva ni ibintu bishimije.

IGIHE: Uherutse kugira urugendo muri Leta Zunze Ubumwe za Amerika, rwari ruhatse iki ?

Bad Rama: Nari maze igihe nkora cyane nkeneye kuruhuka ariko cyane cyane harimo ikintu cyo gusenga, ariko mu byari binjyanye byatumaga numva nishimye harimo n’uko kugenda kugira ngo nongere mfate umwanya ndi kumwe nabo twatangiranye gusenga. Mu byari binjyanye hari harimo uko gusenga ndetse n’akazi.

IGIHE: Iby’umupasiteri wavuze ko ugiye kureba we bihagaze bite?

Bad Rama: Pasiteri wanjye yitwa Samson, ni umukozi w’Imana uba muri Amerika. Ni umuntu twabanye, wankuye ahantu habi. Nahuye nawe mu myaka nk’ine ishize, nahuye na Sam mu by’ukuri nari mvuye mu bintu byinshi cyane hamwe ubuzima uba wumva ko icyo usigaje ari ukwiyahura.

Nahuye nawe mu buzima navuga ko bwari bwiza cyane ku myaka yanjye yari mike muri icyo gihe, guhera ku myaka 23 kuzamura nari ndi gukorera amafaranga menshi cyane ndibuka ko nari ndi muri Showbiz mu buryo bwo gushabika; kuko nari mfite amaduka yambika abahanzi ndibuka na PGGSS ya mbere nambitse abahanzi benshi barimo Tom Close, Rafiki n’abandi.

Nyuma nza kujya mu bintu by’akabari nari mfite akitwaga The Porch gusa imaze imyaka ine idakora. Muri icyo gihe narabikoraga mpura n’abahanzi benshi barimo Knowless, Kamichi n’abandi.

Aherutse kujya muri Amerika mu rugendo rw'akazi no gusura umuvugabutumwa wamugobotse

Nyuma naje kugira ikibazo mpura n’imyuka mibi navuga ko ariko haba harimo no kwiga n’Imana iba yakwegereye ibona ko hari byinshi ikigukeneyeho ariko hari inzira ukwiye kubinyuzamo kugira ngo ubanze wisobanukirwe unamenye inzira ukwiye kubinyuzamo umenye uwo uri we.

Nshima Imana kuba byarabayeho nkanyura mu cyo nakwita ikosi. Nagize ibibazo ibintu byanjye byose birahomba mbaho nabi, abantu bose baranyanga, wahamagara umuntu wese akakubwira ngo Rama yarasaze ntuzamwitabe n’ubikora uzaba umwiteje azaba aje kukuganyira ariko ibyo byose Imana yarabikoze kugira ngo umenye abantu, umenye uko bateye kuko abenshi muri abo ubu turakorana ndacyanabafasha mu gihe bo batabikoze kuko nicyo Imana idutegeka.

Icyo gihe rero naje guhura na Samson, akambwira ibintu bijyanye n’Imana ntanabyumva agenda anyigisha kenshi turasenga tugera naho mbatizwa. Nicyo nkunda kuvuga kuko kubatizwa mu mazi magari bihindura byinshi cyane mu buzima bw’umuntu guhera umunsi nabatijwe ubuzima bwanjye bwahindutse uwo munsi.

Kuva uwo munsi sinigeze nongera gusubira hasi. Byaranshimishije ni umuntu wamfashije cyane; noneho amahishurirwa, ibyo dusoma, ibyo Imana yatuganirije […] nanjye icyo gihe nari ndi mu mwuka w’Imana nshobora gusenga nkumva Imana ishobora kunyereka ibintu bitandukanye.

Ibyo nabonye ni byinshi, nyuma y’amezi ane tuganiriye, nari mvuye mu cyumba cy’inzu imwe nabagamo ndya rimwe ku munsi ahantu hose ngenda n’amaguru, ntashobora kuza i Kigali, ariko nyuma y’igihe gito umuntu asenga ibintu byarahindutse.

IGIHE: Icyo gihe hari ryari ?

Bad Rama: Nta myaka ine ishize, byari mu 2014 cyangwa 2015 gutyo.

IGIHE: Uwo Samson yasengeraga he?

Bad Rama: Icyo gihe yari akiva ku ishuri i Butare, yakinaga umupira nawe baza kumugirira ishyari. Bamukorera bya bindi umuntu akora ku mupira akabyimba amaguru, yari amaze kugera mu ikipe y’abato ya Rayon Sports kandi akiri umwana akiri ku ishuri.

Bibaye gutyo Imana iramubwira iti ntabwo nkeneye ko ukina umupira, atangira gusenga twahuye ubwo asengera mu rugo Mama we yaramuhaye icyumba, ariko nshima Imana cyane aho agereye muri Amerika ubu ari kubaka urusengero.

IGIHE: Wavuze ko wari uri mu byaha byinshi, watanga urugero ?

Bad Rama: Ntabwo nari nzi Imana. Sinari nzi ko ifite imbaraga ku muntu, icyo rero nicyo kintu kibi cyane. Ikintu cya mbere Imana irafuha, iyo utayemera utanayumva byanayisaza.

Bad Rama yigeze kugira ubuzima bubi yangwa n'inshuti asigara nta n'urwara rwo kwishima arya rimwe ku munsi ariko ubu ashima Imana ko yakoze imirimo ihambaye kuri we

Rero njye natunze amafaranga menshi nkiri umwana, ndabyibuka bwa mbere njya kureba amafaranga kuri konti ibyo nabimenyeye mu Ruhengeri ni nabwo namenye uko umuntu areba amafaranga afite kuri konti ye nari imyaka 22.

Narayifunguye nkajya mbikaho amafaranga, nyuma haza kuza umuntu arambwira ati ariko uragenda ukabaza umubare w’amafaranga, ndagenda ndabikora, ariko uko najyaga kuri banki banyitagaho cyane nkabyibazaho nti ese ndi mwiza cyane? Barankunda? Nkabona abashinzwe abakiliya banyitaho cyane nkavuga nti ese ni ibiki ? ariko bo bari bazi ko ndi umukiliya mwiza njye simbimenye.

Nyuma ampa agapapuro mbona arandika, nkabona imibare ni myinshi. Nsohoka mvuga nti ni nk’ibihumbi ijana na mirongo ine cyangwa se miliyoni na magana ane gutyo sinanabyitaho. Njye n’umushuti wanjye turi kunywa agacupa ndamubwira nti mbarira ati uzi ko ari miliyoni cumi na zingahe ndamubwira nti bara neza.

Icyo gihe turara tubara ijoro ryose biraducanga, mu gitondo njya kuri banki kubaza n’umunwa bambwiye amafaranga mfite ngwa mu kantu.

Noneho kuva icyo gihe nabaye nk’umuntu ucanganyikiwe; bavuga bati iki cyabaye nkaba ndiyo, uyu mukobwa ni mwiza, mu birori […] nyine njya mu bintu bidahesha Imana icyubahiro. Ubwo buzima mbubamo biza kurangira bigenze gutyo.

IGIHE: Waje kuva mu bukene gute ?

Bad Rama: Ni amasengesho nta kindi. Nta n’umwe wampaye n’igiceri cy’amafaranga atanu. Icyo Imana yakoze yamfunguriye amayira mbona nisanze mu bukerarugendo, ntangira gukorana n’abazungu sinari naranabyize naje kubyiga nyuma ariko iyo Imana yaguhaye biba ari ibyo.

IGIHE: Hari abantu bakubonye uri muri Amerika batangira gukwirakwiza amafoto y’umukecuru w’umuzungukazi bavugaga ko ariwe ukomoraho ubutunzi ndetse ko mwanajyanyeyo gusura umuryango we, byo bimeze bite ?

Bad Rama: Buriya nyine abantu niko bateye. Si nako baremwe nibyo bishyiramo ari nabyo bitera ubukene benshi bikanatera amashyari n’amatiku.

Aho kugira ngo abantu bishimire intambwe y’umuntu babanza kwerekana ko adashoboye ariko ndababwira nti Imana ibahe umugisha ibarinde amashyari n’amatiku, umwanya ufata ujya guhigahiga ibintu nk’ibyo ndavuga nti uwufashe uwukoramo ibyaguteza imbere nibyo byiza.

Mba mfite aho nahuriye n’abantu, abazungu mbanye nabo imyaka n’imyaniko naho nari ndi nari ndi kumwe nabo n’ejo uzambonana n’undi, ibyo nakorana nabo ni uburenganzira bwanjye.

Bad Rama ahetse The Mane Music Label, aha yari yagize isabukuru ari kumwe n'abo bakorana bose muri iyi nzu

IGIHE: Iriya yakwirakwiye se yo bimeze bite ?

Bad Rama: Ntabwo nibuka neza umwaka, gusa nta n’ubwo ari kera ngira na The Mane yari iriho sinzi ibintu nari ndimo za Musanze.

IGIHE: Iyo ubonye amakuru nk’ariya utekereza iki?

Bad Rama: Nta mwanya mbiha.

IGIHE: Hagaragajwe n’andi mafoto ye mu irushanwa rya Primus Guma Guma yambaye umwenda wanditseho The Mane!

Bad Rama: Icyo yaba cyose gitwaye iki Bad Rama? Abe umufana, mabukwe, abe umugore, abe ibiki… hari uwo abangamiye se? Bad Rama se hari uwo yibye? Njye natangiye gukora mfite imyaka icyenda. Niba waratangiye gushaka amafaranga ufite iyo myaka icyo wabona cyose uba warakivunikiye.
Tugomba kumenya ko ikintu cyose kirimo ubuzima bw’umuntu aba yaragikoreye.

IGIHE: Mu minsi ishize tuganira wavuze ko ufite imyaka 34. Ese ufite umukunzi?

Bad Rama: Kuva ku munsi wa mbere ninjira mu ruganda rwa muzika, ni uko mfite The Mane Music Label, mfite abahanzi, umwana w’umukobwa witwa Nanda wenda n’abandi bazaza. Ibindi byo ntabwo numva ko ari ngombwa ibyanjye n’umuryango wanjye biba bikwiriye kumenywa n’inshuti zanjye zo mu buzima busanzwe.

IGIHE: Wigeze kutubwira ko wabaye umuhanzi kera, ubu ko umaze kumenyana n’abantu benshi bashobora kugufasha mu ruganda rwa muzika ntabwo ujya utekereza kongera kwiyibutsa ibyo bihe?

Bad Rama: Kubera ibintu byinshi mfite biragoye ariko mbonye umwanya nabikora.

IGIHE: Gushyira Jay Polly muri The Mane Music Label ubona byaramwunguye iki ?

Bad Rama: Ni byinshi ngira ngo niwe wabyivugira. Ariko icyo nzicyo biramufasha kandi bimuteza imbere biragaragara, urebye ibibazo yavuyemo naho yanyuzemo naho yari avuye ntabwo byari koroha. Njye nemera ko umuntu ahinduka kandi ahindurwa n’abandi. Nanjye mpora musengera kugira azahinduke.

IGIHE: Mu Rwanda ntabwo ari ibintu bikunze kubaho ku bagabo gupfumura amazuru, wowe wabitekereje ute ?

Bad Rama: Njye ntabwo mbaho nk’uba mu Rwanda, nta rutangira mfite nshobora gukorera mu Isi yose, igihe cyose uri ku Isi. Njye ni uko nizera numva mfite imbaraga nyinshi ntabwo nakora ikintu mvuga ngo mu Rwanda cyangwa iki.

Njye nkunda umubiri wanjye, aho kugira ngo njye gusambana natobora izuru, aho kugira ngo njye kwiba nashyira ibishushanyo ku mubiri, aho kugira ngo nange abantu nashyiraho ‘dreadlocks’. Umubiri ni ikintu Imana yaduhaye, biriya ni nk’uko wafata imodoka ugashyiraho irangi. Ikintu kitantandukanya n’Imana yanjye mba mfite uburenganzira bwo kugikora.

IGIHE: Mu myaka itanu wifuza ko The Mane izaba ihagaze ite?

Bad Rama: Nifuza ko mu myaka itanu The Mane Music Label yaba ifite Radio na televiziyo yayo, ikindi ni uko nifuza ko izaba itakiri ikompanyi ya hano mu Rwanda ahubwo izaba ari mpuzamahanga.

The Mane Music Label ubu ibarizwamo abahanzi bane bakomeye mu gihugu
Uyu mukecuru wambaye umupira wa The Mane uri hagati yavuzweho gukundana na Bad Rama ndetse bivugwa ko ari nawe uyu mugabo akomoraho ubutunzi ariko Bad Rama we ntabwo yemeranye n'ababivuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza