Social Mula yahishuye inzira yamugejeje mu 10 bahatanira ‘Prix Découvertes’ (Video)

Yanditswe na Nsengiyumva Emmy
Kuya 20 Nzeri 2019 saa 08:22
Yasuwe :
0 0

Mu minsi ishize nibwo hatangajwe abahanzi 10 bahataniye igihembo cya Prix Découvertes RFI 2019 hagaragaramo Umunyarwanda Social Mula uri mu bakunzwe cyane muri iki gihe.

Iki gihembo giheruka guhira umunyarwanda Yvan Buravan ubwo yacyegukanaga, birashoboka ko n’uyu mwaka cyataha i Kigali.

Social Mula yavuze ko kwitabira Prix Découvertes yabitewe n’imbaraga yabonanye Yvan Buravan wegukanye iki gihembo umwaka ushize, icyakora ngo si ibintu yari yaratekereje ahubwo yabibwiwe n’inshuti ye yamusabye kwiyandikisha akagerageza amahirwe.

Yahishuye ko ibijyanye no kwiyandikisha no kuzuza ibisabwa yabifashijwe na Ben Kayiranga wamubaye hafi.

Social Mula wari umaze amezi abiri arangije ibyo kwiyandikisha yahishuye ko byagiye kumenyekana ko yatoranyijwe we amaze icyumweru amenyeshejwe ko afite amahirwe yo kugaragara mu 10 ba mbere bityo ngo we ntabwo byamutunguye.

Indirimbo yise ‘Ma Vie’ ni yo yamufashije kuko ariyo abatoranya abahanzi bagendeyeho kurusha izindi.

Abajijwe niba yarigeze aganira na Yvan Buravan ngo agire inama anuha, Social Mula yagize ati ‘’Ntabwo turabasha kuganira, ariko ndabiteganya vuba ndifuza ko hari inama namugisha. Kuko buriya hari inzira yaciyemo azi neza ashobora kungira inama akavuga ati gerageza ibi.’’

Ahamya ko usibye igihembo yahabwa aramutse yegukanye iki gihembo, icyamushimisha bikomeye ari ugukora ibitaramo bitegurirwa uwatsinze.

Ni umusore utazi neza igifaransa ariko ushimangira ko iyo idashobora kuba imbogamizi. Ati ‘’Ntabwo nzi igifaransa cyinshi ariko impano yanjye yatuma Abafaransa bayikunda.’’

Social Mula yatangiye umuziki mu 2013. Icyo gihe yafashwaga n’inzu itunganya umuziki ya The Zone. Yibandaga cyane ku ndirimbo zo mu njyana ya Dancehall na Afrobeat ndetse hari nyinshi yakoze muri ubu buryo zakunzwe nka ‘Abanyakigali’, ‘Umuturanyi’ n’izindi.

Mugwaneza Lambert [Social Mula] w’imyaka 26 yavukiye ku Rwesero mu Karere ka Gicumbi ariko ubu atuye mu Mujyi wa Kigali.

Iki gihembo cya Prix Découvertes RFI ari guhatanira umwaka ushize cyatwawe n’umunyarwanda Buravan.

Umuhanzi wegukanye iki gihembo ahabwa amayero ibihumbi icumi [€10,000] ndetse agafashwa gukora ibitaramo bizenguruka Afurika na kimwe gikomeye uyu muhanzi ategurirwa i Paris mu Bufaransa.

Ushaka guha amahirwe Social Mula kanda hano https://musique.rfi.fr/prix-decouvertes/vote

REBA HANO IKIGANIRO KIRAMBUYE TWAGIRANYE NA SOCIAL MULA

Social Mula yinjiye mu 10 bahatanira igihembo cya Prix Découvertes

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza