00:00:00 IGIHE NETWORK KN KINYARWANDA EN ENGLISH FR FRANCAIS

Igor Mabano yasohoye indirimbo ‘Nta kosa’, igaragaramo umukobwa wiyambuye ubusa igice cyo hejuru

Yanditswe na Nsengiyumva Emmy
Kuya 28 Kanama 2021 saa 09:35
Yasuwe :
0 0

Igor Mabano yasohoye indirimbo ye nshya yise ‘Nta kosa’, amashusho yayo agaragaramo umukobwa ugera aho akiyambura imyenda yo hejuru akambara ubusa nubwo agerageza gukinga ikiganza ku mabere.

Bene aya mashusho buri gihe akunze gukurura impaka mu bakunzi b’umuziki w’u Rwanda, cyane ko hari bamwe bakunze guhamya ko yonona umuco w’Igihugu ariko nanone hakaba abahamya ko ari umuco ugomba gukura no kujyana n’igihe.

Izi mpaka zikunze kubura gica, zihora zisimburana ku ndirimbo z’abahanzi batandukanye byaba bitewe n’amashusho, amagambo ari mu ndirimbo.

Kuri ubu inshya ishobora kubyutsa izindi mpaka ni ‘Nta kosa’ ya Igor Mabano, irimo amagambo yo gutaka ubwiza bw’umukobwa aba akunda ndetse anarata uburyo ateye neza.

Mu magambo agize iyi ndiririmbo hari nk’aho uyu muhanzi yagize ati “Look Look umubonye wese niko avuga, ahumura kurusha indabo zose nzi. Imana yarakabije kumugira mwiza bigeze aha! Oya simumenyera uko mubonye umutima uratera, ’she is so fine like my favorite wine.’ Niyo waba utemera Imana ubwiza bwe bwayikwemeza kuko ubwiza nk’ubu nta handi bwava, ni ukuri naremeye.”

Hagati mu mashusho y’iyi ndirimbo, umukobwa w’umunyamideri bifashishijemo yakuyemo imyenda bamufata amashusho atambaye hejuru.

Ni amashusho uyu mukobwa yafashwe bigaragara ko akinze ikiganza ku mabere kuko nta kindi kintu yari yambaye.

Igor Mabano avuga ko iyi ndirimbo ikoze mu njyana yitwa Compas Music yamamaye muri Haiti.

Ni injyana uyu muhanzi avuga ko abantu benshi batari bazi ariko ikaba yaraciye ibintu mu myaka yo hambere mu bihugu byo ku mugabane w’u Burayi na Amerika.

Uramutse udasobanukiwe iby’umuziki cyane ushobora kwitiranye iyi njyana na Zouk ariko mu by’ukuri we avuga ko bitandukanyemo ukuntu.

Nk’umuntu wize umuziki, unawigisha kandi usobanukiwe injyana zitandukanye, Igor Mabano avuga ko yagombaga kuzana indi njyana iryoshye kandi itamenyerewe mu muziki w’u Rwanda.

Ni indirimbo mu buryo bw’amajwi yakozwe na Ishimwe Clement mu gihe amashusho yayo yo yafashwe anatunganywa na Meddy Saleh.

Hari agace k'iyi ndirimbo uyu mukobwa agaragara yambaye ubusa hejuru agakinga ikiganza ku mabere
Amashusho uyu mukobwa atambaye hejuru ni amwe mu yashobora gutuma havuka impaka ku batari bake bakurikiranira hafi umuziki
Muri iyi ndirimbo Igor Mabano aba arata uburanga bw'umukobwa n'uburyo ateye bidasanzwe
Igor Mabano yasohoye indirimbo nshya 'Nta kosa' iririmbye mu njyana ya Compas Music yakomoye muri Haiti

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .