Igitaramo nzakorera i Kigali kizandikwa mu mateka-Alpha Blondy

Yanditswe na Munyengabe Murungi Sabin
Kuya 9 Kanama 2017 saa 11:01
Yasuwe :
0 0

Umuririmbyi w’icyamamare ku Isi Seydou Koné[Alpha Blondy] yemeje bidasubirwaho ko yiteguye urugendo azagirira mu Rwanda aho azaba aje kwitabira iserukiramuco ry’umuziki rya Kigali Up Music Festival.

Alpha Blondy ubu ufatwa nk’umwami w’injyana ya Reggae ku Isi, yasohoye video ikubiyemo ubutumwa bugenewe abakunda umuziki we mu Rwanda ashimangira ko yiteguye igitaramo azakorera mu Mujyi wa Kigali kuwa 20 Kanama 2017.

Yagize ati “Ndi Alpha Blondy, umuvandimwe wanyu. Ku bandimwe banjye na bashiki banjye bari i Kigali, ndabamenyesha ko ngiye kuza mu Rwanda kuhakorera igitaramo kinini cyane. Nizeye ko muzaza tukishimana, nizeye ko muzaza ku itariki ya 20 Kanama.”

Alpha Blondy watangiye umuziki mu 1981 yavuze ko igitaramo azakorera mu Rwanda kizasiga amateka akomeye. Ati “Ku bw’ubuntu bw’Imana, tuzaba turi i Kigali, nzahakorera igitaramo cy’amateka. Ndabakunda cyane […] Ndumva mfite amashyushyu yo kuzabana namwe i Kigali.”

Alpha Blondy ubusanzwe witwa Seydou Koné; yavutse kuwa 1 Mutarama 1953 muri Dimbokro, muri Ivory Coast. Ni umuririmbyi ufite amateka akomeye mu njyana ya reggae, ubu ni we muhanzi uyoboye kandi ukuze mu bakora uyu muziki muri Afurika.

Nyinshi mu ndirimbo yakoze guhera mu 1981 ari nabwo yatangiye umuziki zibanda ku nsanganyamatsiko zivuga kuri politiki, amahoro no guhashya amakimbirane n’umwiryane mu bihugu bitandukanye.

Mu ndirimbo yakoze zitabarika harimo izakunzwe cyane zirimo "Guerre Civile", "Téré", "Jerusalem" , “Brigadier Sabari”, "Les Imbéciles", "Journalistes en danger" yavugaga ku rupfu rw’uwitwa Norbert Zongo n’izindi.

Alpha Blondy asanzwe aririmba mu rurimi rw’iwabo kavukire rwa Dioula gusa aririmba no mu zindi ndimi zirimo Icyongereza, Icyarabu n’Igiheburayo.

Undi muhanzi w’ikirangirire utegerejwe muri Kigali Up Ismaël Lô na we uzwi ku rwego mpuzamahanga. Aba hamwe n’abandi benshi bazaririmba mu iserukiramuco ry’umuziki rya ‘Kigali Up Music Festival’ rizabera muri IPRC Kicukiro kuva kuwa 19 Kanama kugera ku itariki ya 20 Kanama 2017.

Alpha Blondy yavuze ko igitaramo azakorera mu Rwanda kizasiga amateka

Ubuyobozi bwa Kigali Up bwatangaje ko hari abandi bahanzi bazitabira iri serukiramuco bazaturuka hanze y’u Rwanda barimo itsinda rya Quantum Split rikora injyana ya Rock&Soul, iri risanzwe rikorera umuziki i New York.

Umucuranzi wa gitari Manou Gallo wo muri Côte d’Ivoire ndetse n’itsinda rikomeye ryo muri RDC ryitwa Nkento Bakaji na bo bategerejwe mu Rwanda.

Iri serukiramuco ry’uyu mwaka ngo rizagira umwihariko kuko hashyizwemo n’igice cyahariwe abana kizajya gitangira saa tanu z’amanywa kugeza saa cyenda z’igicamunsi hanyuma igice cy’abakuze gihite gikomerezaho kugera saa sita z’ijoro.

Alpha Blondy umunyabigwi muri Reggae na we yatumiwe muri Kigali Up
Ismael Lo wo muri Senegal na we yiteguye kuza i Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza