Aho igitaramo cya Sauti Sol cyagombaga kubera hahindutse ku munota wa nyuma

Yanditswe na Philbert Girinema
Kuya 16 Nzeri 2016 saa 12:13
Yasuwe : XX
0

Igitaramo cy’itsinda ryo muri Kenya Sauti Sol cyagombaga kuba kuri uyu wa Gatandatu kikabera mu ihema ryo muri Camp Kigali cyimuriwe i Gikondo ahasanzwe habera Expo.

Mu gitondo cyo kuri uyu wa Gatanu ni bwo abaririmbyi bane bagize itsinda rya Sauti Sol yo muri Kenya ryaje i Kigali kuhakorera igitaramo cyo kumurika album ya Gatatu bise ‘Live and Die In Afrika’.

Igitaramo cyari giteganyijwe kuri uyu wa Gatandatu tariki ya 17 Nzeri mu ihema rya Camp Kigali. Mu masaha ya nyuma y’imyiteguro, abagiteguye bamenyeshejwe ko bagomba kucyimurira ahandi kubera impamvu zitandukanye.

Twagira Bruce, Umuyobozi wa Rock Events yateguye iki gitaramo yabwiye IGIHE ko abamumenyesheje ko agomba kwimura igitaramo ‘ku bw’impamvu z’umutekano w’abafana’. Ati “Ni bo baducungira umutekano kandi ni bo bazi neza icyabangamira abaturage, badusabye kwimura igitaramo kandi twabyakiriye neza…”

Yavuze ko bafite impungenge z’uko abafana bashobora kutitabira nk’uko byari byitezwe gusa akizera ko itsinda rya Sauti Sol rifite umubare munini w’abifuza kuza kureba igitaramo cyabo.

Sauti Sol batunguwe n'impinduka z'ahagomba kubera igitaramo ariko ngo bizeye kubona ubwitabire bushimishije

Ati “Impungenge zirahari ariko na none ntabwo twacitse intege, ubwitabire bushobora kutagenda uko twabiteguye ariko byose biraza kugenda neza. Abafana twabizeza ko ibyo bagombaga kubona muri Camp Kigali ari nabyo bazabona i Gikondo.”

Kwinjira mu gitaramo cya Sauti Sol ni ukwishyura amafaranga ibihumbi icumi [10,000] ndetse amatike ari gucururizwa kuri Nakumatt UTC na KCT, Sawa Citi Supermarket, Ndoli Supermarket no kuri Jumia Market.

Sauti Sol agiye kumurikira album ya Gatatu i Kigali
Delvin Mudigi Savara
Willis Chimano ati 'Sauti Sol ije kwerekana urwego igezeho mu muziki'
Bien-Aimé Baraza umwe mu baririmbyi b'imena muri Sauti Sol

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza