Igitaramo cya 2Face i Kigali cyitabiriwe n’abafana batarenze 50 (Amafoto)

Yanditswe na Munyengabe Murungi Sabin
Kuya 24 Nzeri 2016 saa 09:11
Yasuwe : XX
0

Uvuze ko abateguye igitaramo cya 2face Idibia bahombye ntiwaba usobanuye neza uko iki gitaramo cyabereye muri Kigali kuri Serena Hotel cyititabiriwe ku rugero rw’uko intebe amagana zari zateguwe zasumbaga abantu batageze no kuri 50 bari baje gutaramirwa n’iki cyamamare.

- Ni kimwe mu bitaramo bikoze amateka atazasibangana mu Rwanda
- Cyagombaga gutangira saa moya ariko bigera saa tanu hari abafana mbarwa
- Byageze saa yine, muri Salle harimo abafana batarenze 30
- Tom Close na Urban Boyz bikuye mu bagombaga gufasha 2Face mbere y’uko igitaramo kiba “batinya kwamburwa”
- 2Face yaririmbye babanje kumwinginga atinya guhagarara imbere y’abafana mbarwa
- Mbere yo kuririmba yakoze mu biganza buri mufana waje
-Biragoye kubisobanura…

Ni kimwe mu bitaramo byari bimaze igihe bivugwa ko bikomeye mu Mujyi wa Kigali ariko nticyamamajwe ‘ari nayo ntandaro yo kutitabirwa’. Abatumiye 2Face batunguwe n’uko ku munsi w’igitaramo bisanze muri Serena Hotel bari kumwe n’abatumirwa bake n’abanyamakuru gusa.

Igitaramo cyagombaga gutangira saa moya zuzuye ariko byageze saa yine abafana bagera kuri 30 bumva imiziki gusa yacurangwaga na Dj Lenzo. MC Tino wari uyoboye igitaramo yabwiye abafana ko agiye kubazanira umuhanzi ukunzwe mu Rwanda akabaririmbira; Jack B yahise ajya ku rubyiniro aririmba indirimbo eshatu arataha.

Umuziki wakomeje uracurangwa MC Tino agacishamo akamara abafana [biganjemo abanyamakuru n’abatumirwa] irungu ababwira ko 2Face agiye kuza kuririmba. Yaje kurabukwa umuhanzi Gabiro Guitar mu bafana ahita amuhamagara ngo aze aririmbe undi na we ntiyazuyaza yiyamamaza kuri bake bari baje kureba 2Face.

Nyuma ya Gabiro Guitar nabwo MC Tino yasabye Dj gukomeza gucuranga mu gihe bategereje 2Face. Abagize itsinda ryita ku nyungu za 2Face bari aho igitaramo cyabereye ubona batishimye na gato, bazengurukaga muri salle bakongera bagasohoka nyuma y’iminota mike bakagaruka.

Abagize itsinda rya 2Face wabonaga ko basa n’abatunguwe bikomeye n’ubwitabire buke bw’abaje mu gitaramo ari nacyo cyatumye badahita bemerera uyu muhanzi ko aza kuririmba.

Mbere yo kuzana 2Face ngo aririmbe babanje kugirana ibiganiro mu bihe bitandukanye na Murerwa Belinda wateguye iki gitaramo, basaga n’abajya impaka mu buryo bwo kutumvikana. Byageze saa tanu abafana batangira kwijujuta bibaza niba 2Face atakiririmbye, ni nako abareba inyungu ze bakomezaga kunyuranamo bashaka icyakorwa ariko ukabona ko babuze amahwemo.

Yakoze mu kiganza abafana bose baje kumureba

Ahagana saa tanu n’iminota 20 abagize itsinda rya 2Face bagiye kumukura mu cyumba bamusaba ko yaza akaririmba arabemerera ariko mbere y’uko ajya ku rubyiniro yagumye hanze yanga guhita yinjira ubona basa n’abamwinginga bamusaba ko yakwihangana akaririmba.

Abafana bari bahagaze imbere gusa....abiganjemo itangazamakuru nibo bagaragaraga

Innocent Ujah Idibia[2Baba] yaje kuva ku izima yinjira ahabereye igitaramo azenguruka mu bafana akora mu kiganza cya buri wese.

Yahise agira ati “Kigali, muraho bantu banjye, nishimiye ko mwaje, uko mungana kose ndabishimiye […] Ntabwo tubivugaho byinshi murabizi, ndabashimira mwebwe mwaje. Ngiye kubakorera igitaramo cyihariye twishimane turi bake.”

Yaririmbye indirimbo enye zirimo ‘African Queen’ na ‘Implication’ zishimiwe cyane asezera abafana arataha.

MC Tino wari uyoboye igitaramo
Manager wa 2Face yari yicaye mu ntebe z'inyuma
Ntiyiyumvishaga neza ibyabaye...
Belinda Murerwa wateguye igitaramo [ibumoso] n'abajyanama ba 2Face wabonaga baganira mu buryo bw'impaka
Mbere yo kuririmba yabanje gusuhuza abafana bose abakora mu kiganza
Yakoze uko ashoboye boze abanyuramo abasuhuza
Abafana baje kumureba ntibarenze 50 ubariyemo n'abateguye igitaramo bose
Yageze igihe yicara imbere y'abafana ababwira ko "bakwiye kwishima nubwo ari bake"
Yari yazanye ababyinnyi babiri gusa
2Face yaririmbiye abafana mbarwa
Amaze kuririmba indirimbo ebyiri yasabye ko bamuzanira inzoga yitwa 'Campari' akica icyaka
Aba nibo baje bari baje kumureba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza