Ibyo wamenya kuri Gakwaya umaze imyaka 20 yandika ikinamico ‘Urunana’

Yanditswe na Uwiduhaye Theos
Kuya 18 Nyakanga 2019 saa 03:56
Yasuwe :
0 0

‘Urunana’ ni ikinamico ikundwa na benshi kandi imaze gushinga imizi mu Rwanda no mu bindi bihugu birimo abumva Ikinyarwanda.

Ikundwa na benshi kubera ubutumwa buba buyirimo bugenewe urubyiruko n’abakuze yaba ku kwirinda indwara zandurira mu mibonano mpuzabitsina, ibijyanye n’isuku bikaba akarusho iyo bigeze ku rwenya no ku bijyanye n’inkuru z’urukundo zikinwamo.

Ikinamico ‘Urunana’ yatangiye mu 1999 itangijwe n’umuryango w’Abongereza witwa ‘Health Unlimited’.

Ni ikinamico irimo amazina akomeye kandi akundwa na benshi arimo nka Bushombe, Kangwanzi, Shyaka, Muganga Devotha, Budensiyana n’andi menshi.

N’ubwo iyi kinamico ikundwa ariko hari abatazi umugabo witwa Gakwaya Vincent umaze imyaka 20 uyandika, IGIHE yamwegereye imuganiriza byinshi biteye amatsiko.

Gakwaya afite imyaka 49, yize mu iseminari ku Nyundo, muri Kaminuza yiga muri ULK.

IGIHE: Ibyo kwandika byaje gute ?

Gakwaya: Navuga ko natangiye kwandika ikinamico nkiri mu mashuri yisumbuye kuko nize mu ishuri ry’indimi kuko haba harimo n’ubuvanganzo, dutangira kujya twandika ikinamico twumva atari ibintu bishobora kuzagira akamaro, tugakora udukinamico abarimu bakadukosora.

Ninjiye mu by’ikinamico mu 1995, nandika izo mu ruhame. Hari itsinda ryabikoraga nabagamo ni nabwo natangiye kubona ko bishoboka.

Mu 1999 nibwo nabitangiye by’umwuga ubwo nahabwaga akazi n’Umuryango w’Abongereza, ntangira kwandika ikinamico ‘Urunana’ kuva icyo gihe kugeza uyu munsi ndacyayandika iyi kinamico.

IGIHE: Baguhisemo bagendeye kuki ?

Gakwaya: Bigitangira ntabwo nari nzi ngo ni ibiki bigiye gutangira ariko nibwo naje kumenya ari umuryango ugamije guhindura imyumvire y’abaturage cyane cyane bita ku rubyiruko no ku bagore bari mu kigero cy’imyororokere mu kubahindurira imyumvire no kubigisha no kubongerera ubumenyi. Numvise ko bakeneye umukinnyi w’ikinamico. Naranditse nkora ikizamini ndagitsinda.

IGIHE: Waba wibuka agace ka mbere wanditse?

Gakwaya: Ntabwo nakibuka kuko urumva kuva mu 1999 hashize igihe kinini ku buryo ntashobora gutekereza ngo igice nanditse cyari iki gusa ndumva kugeza uyu munsi maze kwandika ibice byinshi.

Icyo gihe twibanda cyane ku bijyanye n’ubuzima bw’imyororokere, ku rubyiruko twavugaga cyane kuri virusi itera sida cyangwa ku buzima bw’umubyeyi n’ubw’umwana urebye ni ibyo.

IGIHE: Ni irihe banga mukoresha kugira ngo ‘Urunana’ rube ikinamico ikundwa n’ab’ingeri zitandukanye kandi ihora ku isonga?

Gakwaya: Buriya bwoko bw’ikinamico y’uruhererekane hababo uburyo bwo kuyitegura butandukanye n’ikinamico zisanzwe, uretse umwanditsi nabo bafatanya bisaba ko nabo dushaka kwigisha babigiramo uruhare. Bisaba kubegera tukaganira ku nsanganyamatsiko runaka mbere y’uko twandika ibice bikurikira, bitabayeho twabaha ibintu bimwe.

Turabanza tugategura umurongo ariko dushobora kongeramo ibindi bintu bitewe n’ibindi bigezweho. Bisaba ko umwanditsi ari umuntu ufite amakuru mashya, niba ari gahunda za leta akaba azi uko zimeze niyo mpamvu musanga duhuza n’ibihe.

IGIHE: Iyo mugiye guhanga umukinnyi mushya bigenda bite?

Gakwaya: Ni ikibazo kiriho tuba dushaka gukemura. Iyo hari ikibazo runaka, tubanza kumenya icyo kibazo ni ikihe? Ni bande bagifite ? Imyumvire yabo ni iyihe? Noneho tukavuga tuti uyu ni umukinnyi mushya uje kuko ahagarariye urwego runaka cyangwa abantu runaka bafite imyumvire iyi cyangwa iyi.

IGIHE: Amazina y’abakinnyi ni nde uyazana ?

Gakwaya: Umwanditsi iyo yandika ikinamico aba afite uko abita bitewe n’uko tubishaka cyangwa uko tubyumva.

IGIHE: Mujya guhimba ‘Bushombe’ ni ikihe kintu mwari mugamije ?

Gakwaya: Byari ngombwa ko muri iriya kinamico habonekamo umuntu usetsa, byari ngombwa ko muri iriya kinamico habonekamo umuntu ufite iyo miterere ariko atari ugusetsa gusa ahubwo harimo n’inyigisho.

IGIHE: Nta gihe ujya wandika ugasanga abantu banze ibyo wateganyije ko bagomba gukina?
Gakwaya: Umwanditsi iyo yandika ntabwo aba atekereza ngo ubu se runaka uzabikina azabyemera cyangwa azabikunda. Umukinnyi w’ikinamico mwiza akina umwanya uwo ariwe wese yahawe. Twebwe abakinnyi bacu ni abahanga kandi babigize umwuga, umukinnyi w’ikinamico uteye uko wavugaga aba akeneye kongera gusobanurirwa ibiranga umukinnyi akigishwa agahugurwa.

Dufite abakinnyi iyo umwumva mu mukino wibaza niba bizashoboka cyane, ariko ugasanga umuntu ukina ibyo bintu imibereho itandukanye cyane n’imibereho isanzwe.

Ya ndaya yitwa Nadine yaba yabizambije, iyo abikina akabyinjiramo nibwo tumubwira ko ari gukina neza nyamara mu buzima busanzwe atari ko ameze.

IGIHE: Nta gihe byigeze kubaho ko mubwira umuntu gukina ibintu runaka akabyanga ?

Gakwaya: Byabayeho. Hari abo twabwiraga gukina umukino runaka ugasanga nk’abana b’abakirisitu ntabwo bumva ibintu byo gukina bamamaza udukingirizo.

IGIHE: Waduha urugero ?

Gakwaya: Hari uwitwaga Jeanne wari umugore wa Muhire, uwakinaga rero ibyo mbere byageze aho yumva ntabwo yabikina, akumva ibintu byo kuvuga udukingirizo ari ukwamamaza ubusambanyi. Bigeze aho abivamo.

Uretse no mu bakinnyi n’abanditsi bibabaho. Umwanditsi bitewe n’imyemerere hari ibintu adashobora kwandika n’izo nzitizi nazo zijya zibaho.

Hari ibifite ishingiro ariko kuko ibintu byose abantu bashaka gutambutsa mu ikinamico ntabwo ugomba byose kubikora urabanza ugashungura ukareba umumaro bizagirira umuryango nyarwanda.

Ni nayo mpamvu burya umukinnyi aba adakwiriye kwandika ibintu ngo ahite abisohora ahubwo aba akwiriye kubanza akabaza abandi bakamurebera niba nta kibazo kirimo.

IGIHE: Byigeze bikubaho ko abantu bakubwira kwandika ikinamico ukabyanga?

Gakwaya: Byagiye bibaho kubera ko nk’ibintu bijyanye na politiki ndabyirinda ngo hato ntabyandika ngasanga atari ko bimeze.

IGIHE: Muhuza mute imico isanzwe y’umukinnyi n’ikinamico?

Gakwaya: Ntaho bihurira. Twebwe icyo duhuza ni umuco w’umuntu uri muri sosiyete dushaka gukina. Uzabikina ntabwo wabihuza, ashobora kuba wenda atanabyemera ariko kubera ari umukinnyi wabigize umwuga w’ikinamico akabikina.

Naguha urugero rwa Mugisha ukina ari umurokore muri Nyarurembo ariko mu buzima busanzwe ugasanga ni umuyisilamu. Urumva rero ntabwo wabihuza. Ugiye kureba ibyo abakinnyi b’Urunana bakina n’ubuzima bwabo busanzwe usanga bihabanye.

IGIHE: Hari ubwo twumva ngo kanaka yimutse, cyangwa yapfuye. Biba byagenze bite ?

Gakwaya: Ubuzima bw’abaturage b’i Nyarurembo n’ink’ubw’Abanyarwanda basanzwe. Barapfa, barafungwa, bararongorwa, bajya kwiga …

IGIHE: Mumaze kwandika uduce tungahe ?

Gakwaya: Tugeze mu 2122.

IGIHE: Mu myaka 20 ishize wandika Urunana ni iki wishimira ?

Gakwaya: Ikintu cya mbere ni uko aho unyuze hose usanga abantu bazi iriya kinamico. Kuyimenya byerekana ko bayikurikira cyane. Dufite n’ibindi bihamya, iyo tuganira n’abantu natwe turabibabaza hari abaduha ingero bati dore nk’uriya arangije kwiga kubera cya cyemezo cya Bushombe. Hari abatubwira ko bakuyemo inyigisho zibafasha ku buzima bwabo.

Gakwaya Vincent amaze imyaka 20 yandika ikinamico Urunana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza